ليه ما أقدر وهو يقدر؟؟؟

السلام عليكم ورحمة الله وبركاته

أنا قاعدة أكتب وفيا بكوه و متضايقه ومحد حاسس فيا لكن مو شي جديد اللي نفسي اعمله انه متى ما زعلت نفسي أخد بعضي وأخرج أتنفس شويه أتمنى أقدر اخرج وأجري الين ما أتعب نفسي أبكي بصوت عالي بس بدون محد يسمعني لأني مخنوقه وحاسه إني مدفونه ليه الرجال يقدرو يخرجو متى مايبغو ومتى ما اتضايقو واحنا لأ مالنا غير البيت والمخدة نبكي فوقها أنا الحمدلله مو ناقصني شي المشكله إني حاسه بالوحده وأهلي بعيد عني وعندي رجال أناني مو هامه إلا نفسه ومافي بيننا أي قواسم مشتركه صحيح هو طيب ومو مقصر بس مو حاسس فيا ولاهامه إذاكنت زعلانه أو طفشانه بالعكس إذا شافني متضايقه ياخد بعضه ويطلع طبعا ايش يقعد يسوي معايا في حاجات أهم حتى ما يسألني ايش فيه ولا يفكر يقول أخرجها تغير جو يعني شويه يحسسني انه مهتم بالرغم من إني كلمته قبل كده وقلتله يعبرني شويه ويعطيني وجه لكن لاحياة لمن تنادي للأسف فيه برود ولامبالاة تنرفز لكن الحمد لله على كل حال أنا بس كنت حابه أفضفض عشان ارتاح شويه ولأني اعتبركم اخوات ليا بالرغم انه ماعندي اخوات والله يخلينا لبعض عشان نشكي همومنالبعض ونلاقي احد يطبطب علينا ويسمعنا ويهتم.........!