ليه ............. ما تروشين ( سالفه مثيره )

سلام عليكم يا حريم ومساتسن الله بالخير

اليوم أبحاول أتكلم بلهجة مفهومه مشان خواتنا يفهمن وش نقول
المهم

سالفتنا اليوم صارت لي قبل أيام وحمدت الله يوم أنقضت على خير

يوم الخميس الى فات جتني عجوز بدويه طبعا من شناخيب حايل ( شناخيب حايل = بر وحوله جبال ) مسيره على وبنفس الوقت جايه تعالج تقول تسبدها توجعها يامنها شربت حليب النياق وهي ما تصبر عنه أبد
المهم هي طبت حايل البلد وما تخبر أحد تسكن عنده ألا أنا لاني من القبيله ومن فخذهم

وجت عندي وتعزبتنا 3 ايام بس يا بنات عليها نشاط ما صار تصدقون انها يا بلعت من الرز ما تشبع وتصب عليه روب وتاكله ( الله يجعله بالعافيه مهي مشكله المشكله في )

المشكله أنها ما تتروش أبد وتاكل من التمر وتجدعه على السجاد كنها ببر وعلمتها انا بس ما فيه فايده

وفي يوم من الايام ونا عازمتن جاراتي ومنهن المصرقعه على دله وشاي وقعدنا نحشحش بخلق الله( الله لا يواثمنا )
قالت بنت المصرقعه يمه يمه يمه
قالت المصرقعه يذرمه وش تبين
قالت العجوز هذي ريحتها قشرا
وانا أشوفها وضحكت وسكت وصرت أهمهم للمصرقعه بس المصرقعه تزحفت شوي شوي يم العجوز وشمت ريحتها وقالت أي والله أنت صادقه
وراحت وقالت لي يا عواطف وش بلاه هالعجوز ما تروش وريحتها كأنها ريحت تسلب ممطور
( تسلب ممطور= كلب ممطور ) يعني مبلل بالمطر
ألمهم قلت والله أنها فشلتن ولا يوم تروشت تحسب أنها بالبر
المهم
قالت لي المصرقعه علميها
قلت والله مستحيه منها
قالت لا عادي عطيها شمبو وأسفنجة صحون خليه تنظف زين الناس ريحتها والله تصرع الطير من السماء
قلت خلاص

ويوم جاء اليوم الثاني وكان يوم الجمعه قالت العجوز عواطف يا عواطف قلت هاه وش تبين
قالت عطيني منشفه وصابون تايت
قلت ليه قالت ابتروش
فرحت انا وبغيت اطير من الفرحه يوم قالت ابتروش
بس قلت لها ابعطيتس شامبو قالت لا ما أدانيه قلت ليه قالت يقشط بالجلد ( يقشط بالجلد= يسوي نفر )
المهم عطيتها الي بغت وراحت للحمام

وتروشت بالتايت واسمعها تنزف ما وتصب على نفسها وشوي وأسمعها تقصد وهي بالحمام

( تقصد = تغني قصيده )
ياليل ليل وش بلاه فضحتنا

المهم جاء ولدها وقلعها عنا والحمد لله بغينا نذبح ذبيحه يوم راحت









جميع حقوق النشر محفوظه لـــــــــــــــــــــ عواطف ابلعيهم @ 2006