الله يجزاك خير خمولة وبما اني في اجازة ومددة رجليني راح اسدح لكم تجربتي

انا متزوجة تقريبآمن 19 سنة ومن تزوجت وانا مثل البلهاء ورى زوجي اركض وراه رغم اني كنت مدللة عند اهلي وشخصيتي قوية بس بعد زواجي صرت دجاجة
اركض وراه ركض ابية يرضى ولا يرضى وكنت من تزوجته وانا موظفة والله احيانآ يقوم يوديني بهوش وتهزيء وحالة واخر الشهر ياخذ الراتب بربطته
عشت ايام مرة وجبت عيال وكبرت وكبرت دباشتي معي وبدأت الخيانة من زوجي وعلاقات ومكالمات ووو وانا مازلت مصرة على دباشتي وتزوج علي وشفت الويل منه ومرضت ومراجعات وروحات للمستشفيات وهو ولا يدري عني الا بالهواش والتجريح ومازلت متمسكة بدباشتي
وحدث اول تصادم وطلقني اول مرة وللاسف سمعت نصيحة وحدة ادبش مني ورحت اعتذر منه وتمتدى وصار الأمر عيني عينك لحد ماحصل التصادم الثاني وحصل الطلاق الثاني
وماكنت غلطانة ابدآ بالعكس كان هو اللي راكبه الغلط من اوله لأخرة

والله برحمتة ارسللي وحدة من هالمنتدى كان لها فضل كبير علي وساعدتني
قالت انتبهي تعتذرين او حتى تحتكين فيه وروحي لما يطلع اجمعي ملابسة وطلعيها له برا خصوصآ البيت اللي كنا ساكنين فيه ايجار وهو اصلآ لأخوي وقالت قولي له خلاص انتهينا بصراحة انا خفت ونرددت بس هي قالت انت وش راح تخسرين الحب او الحنان ولا شئ هو اللي راح يخسر
وهي تجربة صابت كسبتي خابت ماخسرتي
وفعلآ كان طالع وجمعت كل اغراضة وحطيتها له برأ وارسلت له رسالة على جواله وقلت له خلاص انتهينا لحد كذا ويكفي
وجاء للبيت منهبل ويطق الباب وانا ولاكأني اسمع اخذ اغراضة وراح وغطس كم يوم ولا سألت عنه كل يوم اداوم وعيالي يروحون للمدارس وبصراحة ارتحت بس هو مارتاح وبدأ اتصالات ورسائل وانه يبي عياله قلت تعال للبيت اي وقت وشوفهم حالك حال اي ضيف حدك المجلس لأنه مطلقني قال لااباخذهم عندي وابحرمك منهم قلت عليك بالعافية خلاص اجهزهم لك وخليت بنتي تدق علية وقالت بابا احنا جاهزين تاخذنا عندك هو اعتذر وقال انا مشغول خلوها بكرة
وكذا كل يوم اليوم واخرتها جاء للبيت يبي يشوف عياله وانا كنت نايمة بغرفتي مادريت الا هو داخل علي اقسم بالله انه يبوس رجلي يقول ارجعيلي طالعته وقلت اسفه ماقدر قال انت في العدة واقدر ارجعك قلت لها بيني وبينك بس العيال والا انا عقتك كرهتك وكرهت تصرفاتك قد ماكرمتك اهنتي وقد ماعزيتك ذليتني
وتعالي شوفي وعود ووعود
ورجعنا لبعض صار لنا سنتين وهو يتجنب يصير بينا اي خلاف لأنه حس بتغير صارت لي ردود فعل وصار لي استقلالية راتبي في حسابي اصرفه انا مو هو يقول شي ماهو صحيح اعترض ولا يهمني وانا فهمته من قبل انه لو صار طلاق ماني خسرانة شئ

وكذا احس اني كسبت نفسي وحياتي وصحتي وزوجي صار يداريني ويقول مااتخيل اعيش بدونك ولااتخيل حياتي من غيرك صار حريص على ردود فعلة وتصرفاته

واسمحوا لي اقولكم ان الفضل من بعد الله في تغيري يرجع لكم ولهذا المنتدى بالذات (هذاك اول ) اللي ادين لها بالفضل الكبير من بعد الله في تغيري الله يشفى ولدها ويخليه لها
وطبعآ انتم وتجاربكم اللي المفروض نستفيد منها ماتمر مرور الكرام نتعلم من غيرنا وناخذ اللي يناسبنا

وعلى فكرة صدقوني الرجال ماينفع معهم لبس ولا ليالي رومانسية بياخذ اللي يبغاه ويمتع نفسة واللي تهين نفسها يدوس عليها لكن اللي تعز نفسها يحب راسها

ماشاء الله عليكم

والله يسعدك خموله على هالموضوع وصراحه كانو بنات المنتدى محتاجينه من زماااااااااااااان وانا انفخ في قربه مقطووعه وكل ما دخلت موضوع وقلت كلمة بعض البنات شوي ويكفروني ويقولون ان اللي يفرق بين زوجين ......... وان مافيه كرامه بينهم << مدري وين القرآن اللي منزل فيه هالصفه بين الزوجين !!

اللي اعرفه في القرآن ان الموده والرحمه بينهم !!
واللي اقراه من سنة الرسول انه مدلل زوجاته ويحرص على رضاهن وهذا ما قلل من قيمته او نزلها !!
معيشين الرجال السعودي في قصر مشيد وياويل اللي تقول انزل افتح الباب !!!!!!! خخخخخخخخخخخخخ
يعني الكبار في السن نقول بكيفهم عندهم افكار عاشوو عليها وعجزوو عليها بس رجالهم كانو يستاهلون مافيهم الخيانه ويتحملون المسئوليه ولايعرفون الطق !!
اما رجال اللحين وش يسوون ؟؟؟؟؟؟؟؟؟؟؟؟؟؟؟؟؟؟؟؟؟؟؟







وانا معك ياقلبي قلبا وقالبا
واقول اللي ما تحب نفسها وما تحترمها لا تتوقع من زوجها الحب والاحترام والعكس
وترى هذا من تجربه وتعامل فوق ال8 سنوات
واقول ان المرأه نفسها اللي تحدد اسلوب تعامل زوجها معها !!

ومثل ماقالو البنات : لا افراط ولا تفريط
آخذ حقوقي منه ولا اظلم وآخذ حقوق غيري من اهله

يااااه كل هل ماسات عشتوها وربي ان عشت مع كل وحده فيكم واقعد اقراء رده مره ومرتن
وابكي مع تفاصيل قصتها وخاصتن كم قصه اثرت في يااارب تفرجلهم عاجلا وليس اجلا وتسعدهم وتفرجلهم من عندك بنات حابه اقول شغله مومعناته اني مامرت بصدمات وازمات
بالعكس مريت بضروف كثيره بس عشان اكون صريحه معكم ماتوصل للضرب ابد خلينا اقعد
اكتب لكم مقتطفات بسيطه مدام انه هالشي بيفيدكم انا زمان كنت مطيوره لو حصل خلاف
وشفته تطاول علي بالكلام انا اقعد اعصب واتكلم مدري وش اقول بلمره>>>>لني بعيده عنكم
لعصبت ماشوف الي قدامي انجرح بقوه لني حساسه حساسيتن ماله طعم بايخه المهم اني ماسكت =تحسبوووني استفدت شي لاوالله الى المشاكل هي هي وقعدت فتره طويله ونا كذا
ومرره اذكر اني زعلت شوفو اختكم المطيوره وش سوت خخخخ كالعاده خلافات كلام ومني ومنه واجيه قلتله ياله قوم ودني قال ماني موديك واقعد ازن عليه قلتلك ودني الحين قال عقب
لصبحن يكون خير وقتها 11 ليلا المهم رجعت قعدت ازن عليه قالتله ترا ان مودتني ابكلم
اخوي يجي ياخذني قال بالطقاق يوووومني ولعت خلاص عقب هالكلمه مالي مقعاد والله لاكلم
اخوي ولايحزنون اخذ اولدي وواقفلي ليموزين وعلى طول بيت اهلي والله انها اول مره بحياتي
اركب ليموزين لن اخواني قبل اتزوج المره الي تركب ليموزين ماهي عاقله ولو نموت ولاوحده
تهوب الشارع وبنت ابوها بس تطلع عند فم الباب خخخخخخخخخ المهم الزين بيت اهلي قريب
ودخل عند اهلي وانا وجهي طايح توي انتبه اني هاجه وجايتهم متاخره وتوى احس اني مطيوره من قلب خخخ فعلا اعقلهم كاخريش الابل خخخخخخخ المهم الزوج المصون مدرى اني
طلعت يحسبن اني اجغر بغرفتي احتريه يحن علي يراضيني بعد مادورني وتاكد ماني بالبيت انخرش ايقول هالمحرمه وين طست ومادريت اليى جاي عند بيت اهلي عاد ماصدقت ع بالي
انه بياراضيني وياخذني معه مدريت الي يسال امي من عند الباب ونا اتسمع بنتس عندس يبي
يتطمن الاخو قالت امي ايه قال زين اجل مع السلامه ويرووح خخخخخخخخ واسبوع مننطقه
عند بيت اهلي وعقبها حرمت توووووبه اطري هالطاري وعقلت ومن يومها الى اليوم والله
وانا كل اموري وخلافاتي احلها بالصمت وحكمه ولبغيت ازعل وهو غلطان اقعد ببيتي مادام
الامر متعدى حدود الاهانه وسلامتكم <<<مدري حسيت قصتي بايخه ياله انتو مثل خواتي
هههههههههه استرو ماوجهتو

تسلموا على هذا الموضوع

نعم للمراه كرامه
نعم للمراه كرامه
نعم للمراه كرامه

مكانه الزوج محفوظه و طاعته واجبه

لكن اذا الاسلام اعطى المراه حقوقها لما تتنازل عنها للمجتمع