ماحسيت برمضان😩💔

مبارك عليكم الشهر
بنات والله مو حاسه برمضان ذا ابداً .... هذا اول رمضان اصومه مع زوجي لاني تزوجت العيد اللي راح .. زوجي متعود على حياة العزوبيه يعني طول النهار نوم والمغرب يشرب مويه وقشطة وتمر وبعدها احيان يرجع ينام واحيان يجلس معاي احاول اسوي اكلات جديدة انوع اسوي عصير اضيف حلا اسوي فطاير اسوي بيتزا .. بس ماحسه يبي شيء يبغى ايام رمضان زي الايام العادية يقول لا تطبخين شيء ... الا وجبة وحدة ... مع انه يحب طبخي ودايم يمدحه ومرره تعجبه الفطاير اللي اسويها ... انا متعودة مع اهلي كنا نفرش سفرة كبيرة ونفطر من جميع الأصناف ونتقهوى ومانشيل السفرة الا قرب التراويح .. وحتى بعد التروايح ناخذ القهوة والحلا ونحلي وسوالف الا الساعة 12 واللحين احس بفراغ كبير فقدت جمعة اهلي وقهوتهم وطبخهم وطبعهم وكل شيء ... انا احب اكل واحب اطبخ واتفنن بالأكل مع اني نحيفة لكن برمضان احب انوع في الاكل لكن زوجي ما يبغى شيء وانا ماحب اطبخ واكل لحالي ... وربي ودي احس برمضان وجماله وجمعة الاهل وكذا لكن ولا شيء .. مافيه شيء تغير اللحين وقبل اسبوع نفس الوضع ... فوق اني حامل وفي الشهور الاخيرة واهلي مررره بعيدين عني ... احيان اقول ياليتني باقي بنت مع اهلي نتضارب سوا ونطبخ سوا ونسولف ونستهبل سوا .... واحيان اقول حرام زوجي طيب ومو مقصر معاي بس مشكلته للحين عايش بجزء من حياة العزوبية .. وسألته قلت له نبغى نغير من روتين حياتنا .. قالي على يدك امري وانا حاضر ... قلت له ابيك تساعدني انت بعد قال والله هاذي هي حياتي من يوم تخرجت من الثنوي وانا عايش كذا وهاذي السنة اول سنة يشاركني فيها احد فإذا قدرتي تغيرين الوضع اكون لك شاكر .... صرت اعذره واحط اللوم علي واحيان احط اللوم عليه .... استغفر الله ياربي اللهم لا تشغلنا الا في طاعتك ... اعطوني يابنات حلول او قولوا لي اني ماعندي سالفه او اني ابالغ .... مادري والله مادري 😩💔