للرفع

والله موقفكم تحفه
انا حاقولكم بس عن وحده من الولادات وانتو عليكم تتخيلو الباقي
في ولادتي الاولى طبعا كنت مفعوصه 17 سنه ولا اعرف ايش الولاده
وكنت حزنانه على زميل زوجي لانه مرت
ه مسافره وما عنده احد وقلت لزوجي يعزمه على الغدا بكره واتفقنا ايش نسوي غدا
والليل كله ما نمت من الالم واقوم الصبح اصحي جوزي العمل الا يلاقيتي مجهزه كيس فيه كل ملابسي حقت الحمل ولابسه العبايه

خيييييييير فين رايحه
الا اقول لزوجي انا حاسه اني تعبانه وابغا اروح ارتاح عند اهلي كم يوم واشد حيلي وارجع نعزم صاحبك
ووداني الساعه 7 الصباح واروح الا ماما في الدوام وعماتي وحده ساكنه معانا في البيت والتانيه فوقنا ولما شافوني عرفوا انه ولاده وانا يا غافل لك الله ويللا قرفه ويللا بيض مسلوق وانا ما احبه لحاله ودخلت المطبخ معاهم واسوي للبيض خلطه وبهارات واخلطه فيها
يميم
واشوفهم ياكلو بيضي ويعطوني بيض حاااف من غير شي
واقول مو قادره اكل شي بطني تعورني وضهري وهما يقولوا لازم عشان تشدي حيلك
ولما خلاااااص ما قدرت اتحمل الالم رحنا مع بابا المستشفى وزوجي لحقنا وماما كمان المهم انا وزوجي وبابا وماما وعمتي كلنا في المستشفى زحمه
وادخل غرفة المخااض والقابله مصريه وشايفه اني صغيره وتحكيني حكاية سندريللا وابغا اموتها انا معايا طلق وهيا تسالني
الامير عمل اييييييه
سندريللا لبست ايييييه
مرات باباها قالتلها اييييييييييه
اخر شي خلااص حاموت من الالم وادخل غرفة الولااده والدكتوره سوريه وتخاصمني
لك اولديي
لك اولدي
وانا اقولها ما اعرف كيف
وتضربني على فخدي
لك اولدي لك اولدي
وانا ابكي ودخلت معايا ماما وبعدين خرجت ما اتحملت ودخلت عمتي وخرجت لانه جوزي دخل والدكتوره تضربني
وانا من جد مني عارفه اولد والدكتوره ما تقول الا اولدي وتسب كلام ما اقدر اقوله
المهم اخر شي بابا كان يبغا يدخل وانا اصرخ اقولله لا ما تدخل ومن ورا الباب سار يخاصمني اولدي يا بنت والا ادخل
ياربي كيف يدخل وانا رجولي معلقه وكل شي باين المهم الدكتوره المجرمه خرجت خصله من شعر النونو ورمتها على صدري وقالت خلاص الراس تحت والنونو يتموت ازا ما خرجت وانا ديك الساعه كل قهر الدنيا جواتي والحمد لله انه الولاده مرت على خير لانه البنت كان وزنها كيلو وسبعميه جرام مررره صغيره وكانت ما تساعدني ولا تدف نفسها وكان الجهد كله عليا
وبعدين حطولي كمامه عشان الخياطه واشوف اخشام الممرضات الفلبينيات كلها اجتمعت وسوت حلقه دائريه بس الاخشام وتطيير وتغني
طبعا الاخشام
واقوم من البنج واطالع في الممرضات واضحك وهما مو عارفين ليش بس يحسبو حاله هيستيريا من التعب
واغطس تاني مع الكمامه واشوف نفس الاخشام تلعب قدامي
وطبعا هادا كله والولاده كلها وجوزي كان معايا ويبكي من شكلي الله يسعده
والمستشفى قلبت مسجد بابا وماما وعمتي كلهم يصلوا برا عند غرفة الولاده
وانتهت المغامره على سلام بس انا كل ما افتكر الاخشام اضحك والين دحين فاكره الاغنيه
عمو نيفلص شنيصيص
عمونيفلص شنيص يص
عم فيليطس


يللا غنوها ازا تقدروا

نسيت اقولكم
البيض اللي اكلته كله خرج بالزباله

هههههههههههههههههه
كلهم كوم وانتي حكاااااااايه ياشعنونه

ياربي معقول هالاغنيه من البنج ؟؟والا كنتي تعرفينها اول

اثاري الولاده ابداع وتطلع المواهب المدفونه خخخخخخخخخ
عمو نيفلص شنيصيص
عمونيفلص شنيص يص
عم فيليطس

روووووووووووووعة لا يوقف