مالقيت عنوان لمشكلتي اللي معذبتني

السلام عليكم ورحمة الله مالي بالمقدمات عندي مشكله كبيره مع امي بدأت معي من وانا صغيره انا الحين متزوجه ولازلت اعاني الا بالعكس من زواجي زاد الوضع مشكلتي غريبه مالها وصف لكن بشرح تفاصيل ومن هالتفاصيل ان شاءالله تفهمون معاناتي , موضوعي طويل اللي مالها خلق لا تقرأ . سالفتي ان لو صارلي شي من الناس امي ماتنحاز لي كـ بنتها , ابد ابد ابد ابد ما تنحاز لي بأي شكل من الاشكال حتى لو انحياز بسيييط يحسسني اني بنتها ويحسسني ان عندي عزوه ووراي ام وعندي ظهر الحريم بكل مكان مستعده تموت عشان ماتكسر خاطر بنتها وتوقف مع بنتها ضد اي احد الا امي بدأت المشكله من يوم اني بزر بالابتدائي كنت العب مع الاطفال وتعرفون الا مايصير ضرب وهواش بين الاطفال كنت لما انظلم ويتعدى علي اي طفل كانت توقف تتفرج بكل قسوه توقف زي الصنم بالضبط حتى ملامحها ما فيها زعل علي او قهر تعرفون الطفل ما ينسى كانت ولاتنصفني ولا تحاول حتى تدافع عني ولاعمرها بحياتها كلها هاوشت طفل واحد تعدى علي لو السالفه لهنا كان مو مهم بس مشكلة امي اكبر كان يوم يروح الطفل امي تلعن خيري ليه استفزيتيه خليتيه يضربك؟ ليه زعلتيه خليتيه ياخذ لعبتك؟ انتي السبب انه فلان ضربك انتي السبب , الزبده تحملني مسؤلية غلط البشر معي فوق انها تخلت عني ولا وقفت معي!!! كنت يوم اجيها مضروبه من بنات الجيران وانا طفله مسكينه لاحول لي ولا قوه اجيها اصيح يمه شوفي وجهي او شوفي يدي يكون مضروب اول سؤال تسألني وش سويتي لها خليتيها تضربك كذا؟! بعدين تقولي مالي شغل وتسسكت ما انسى شعوري كنت اخاف خوف واحس برعب بس مو فاهمه معناه بس كان خوف قوي مافهمت معناه الا الحين يوم كبرت كانت تخلي الدنيا تلطمني حتى النصيحه كانت تستخسرها فيني يمييييييييين بالله عمرها ماشافتني اخذ حقي الا وتلعن خيري لو انها ماتساعدني بقول ضعيفه وهذه شخصيتها وامري لله لكن يوم اخذ حقي توقف بوجهي! لو نصحتني عالاقل بقول تبيني قويه واواجه الحياه لكن هيهات هيهات لا تدافع ولا تنصح ولا حتى اضعف الايمان ماتزعل ابد تسولف مع الطفل وتضحك معه وتعطيه هدايا وعاادي مره عندها ان احد يقهرني كان هالشعور يقتلني بس ما افهم معناه , شعور ان كيف تلاعبين وتضحكين مع اللي اذاني؟ كبرت وللاسف كبرت هالصفه مع امي وصارت زياده عن اللزوم لو وش مايسوون معي البشر ماتزعل لا علي ولا منهم وكأني شي رخيص رخيص عندها مالها الا هذا المعنى من صغري وانا شي رخيص عندها وتشوف اني استاهل كل شي يحصل معي والمصيبه تحملني سبب تعدي البشر علي ! وكلما صارت لي اذيه من البشر تكرهني زوووود وتعاتبني اكثر وتتخلى عني اكثر واكثر وكأنها (( ترقع لضميرهــــا)) عن طريق انها تحط اللوم علي ! مع ان مافي انسان سلم من البشر حتى الرسول عليه السلام كانوا يرمون عليه الحجاره ويأذونه هل معناته انه كان فيه خطأمنه؟؟ حاشاه طيب انا زي كل البشر اتعرض للتعدي وان الناس تغلط علي زي اي احد بس امي تشوف ان الناس ما اخطأت معي الا اني ناقصني شي وبالتالي استحق اللي يصير معي وتهرب مني وتتخلى عني وتخلي الدنيا تلطمني . مع العلم ان اكثر شي عانيت منه مو انها ما تدافع عني وبس لا اكثر شي كان ولا زال يحرق قلبي انها ماتاخذ بخاطرها على الشخص ولا تزعل منه ولا حتى تحسسه بأي شي تتعامل معه زي الحلاوه ضحك وقهقهه ووناسه وتلفونات ورسايل مايعوقها شي وانا الحيـــــــــــــره والقهر ملازميني طوووووووول حياتي من صغري ليومكم ذا هالشعورين ( الحيره والقلق) كانوا ولا زالوا اعــــز اصدقائي . احتار يوم اشوف امهات الاطفال اللي اتهاوش معهم يجون يضربوني او يهزأوني او يصرخون علي مع ان عيالهم الغلطانين وامي مالها وجود وياليت كذا وبس كان قلت عنها خوافه وعذرتها وربي لكن الادهى يوم تحملني المسؤليه كامله ويوم كبرت فهمت ليش تحملني المسؤليه عشان تهرب من مسؤليتها وهي الدفاع عن بنتها فتلبسني الغلط عشان ترتاح من عذاب الضمير بس هي ماتدري انها دمرررررتني وسببت لي عقد ومشاكل نفسيه مايعلم فيها الا الله وحده وببدأ الحين اسرد لكم بعض المواقف اللي دمرتني بحياتي وانتوا احكمو تخيلوا ان بنت عمي معلمه وراتبها كبير مابيني وبينها شي وهي تراسلني واتس يعني مافي شي بيني وبينها المهم انخطبت وبيوم امي اتصلت علي قالت وصوتها غضب وزعل قوي انتي معزومه عالملكه؟ قلت لها اي ملكه؟ قالت ملكة فلانه (( بنت عمي المعلمه)) قلتلها وشو؟! لااا محد علمني وش السالفه؟ قالت اليوم ملكة فلانه وعزمت كل الناس حتى البعيدين عزمتهم وذكرتلي اسماء المعزومات والله ان بنت عمي عزمت ناس يقربون لنا من بعيد وعزمت امي وخواتي البنات واكتشفت اني الوحيده اللي مو معزومه وانا متزوجه لين هنا الصدمه مقدور عليها مع ان القلب نار لكن الصدمه الحقيقيه الكلمتين اللي قالتهم امي لي حملتني مسؤلية قلة ادب بنت عمي معي ! وقالتلي انتي السبب انتي ماتزورينها عشان كذا انتقمت منك وحقرتك وما عزمتك انلجم لساني من موقف امي وتحميلي المسؤليه !كنت ابي اقلها ترى بنت عمي لين امس وهي تراسلني صباح الخير ومساء الخير بس الناس يعرفون يسوون كرامه لانفسهم ومزاجيين مو مثلك توقفين ضد اقرب الناس لك ولا تسوين لبنتك كرامه! لكني سكت لاني عارفه انها راح تطربقها على راسي وانتهت المكالمه وهي واخواتي جهزوا نفسهم ومستانسين ورايحين يوجبون وحده ماقدرت اختهم الكبيره ( انا اكبر اخواتي) وامي مافكرت حتى بموقفي قدام زوجي وحمولتي واحراجي وفشيلتي قدامهم وفعلا ام زوجي يوم قابلتها هاتك يا اسأله واستغرااااااب من قلب قالت بنت عمك عزمت الكل وش فيها عليك؟ بينك بينها شي؟ انا وبناتي مصدومين صاير شي بينكم ؟ طبعا بما ان ما وراي ظهر ولا عزوه صرت ارقع لنفسي قلت لعمتي لا وربي مابيني وبينها شي ورويتها رسايل بنت عمي اللي راسلتها لي قبل ملكتها بيوم وعمتي استغربت انها تراسلني قالت بس عيب عليها تراها عزمت الكل وانتي بنت عمها اولى من نص المعزومين ( عمتي مو حب فيني بس تصطاد بالماء العكر) لكن وش اسوي هذا احسن الموجود لو عالاقل وحده من خواتي عالاقل خذت موقف وزعلت من بنت عمي وماراحت كان موقفي ترقع شوي وما صار فيه فرصه لعمتي انها تتشمت وطبعا بنت عمي سوت حفلة الملكه بفلوسها الخااااصه لانها معلمه امي واخواتي وام زوجي وخوات زوجي الكل درى ان الحفله من فلوسها الخاصه والمعازيم هي اللي عزمتهم وكتبت اسمائهم بنفسها يعني طنشتني عمدا . ومره رحنا عزيمه وكنت انا الوحيده اللي متأخره بحملي 5 سنوات كل وحده فيهم مخلفه الا انا ويصير نقاش بيني وبين وحده عن موضوع سخيف عن الالوان قالت اللون الاخضر باللبس احلى من الازرق قلتلها مو ذاك الفرق بين الاخضر والازرق لانهم متشابهين وينقلب وجهها صار وجه وحش بس هذه الجمله اللي قلتها لا زودت ولانقصت (شوفوا الناس كيف تزعل على نفسها حتى لو الموضوع بسيط) قامت رمت علي كلام تعايب على تأخر الحمل مدري وش دخل موضوع الالوان اللي تناقشنا فيه بتاخر حملي وهي اعتبرتني اهنتها لاني قلت اللونين متشابهين قامت وجهت كلامها للحريم وقالت احيانا تأخر الحمل وعدم الخلفه يسبب عمى الوان!! وامي جالسه جمبي والمجلس كللله سكت وفهموا قصدها وجوههم تلونت اكثر مني والله اني جيت كلمت وحده منهم عشان ارقع موقفي واغير السالفه قامت تنهدت بقوووه قالت الله يرزقك بالذريه الصالحه اللي تعزك يارب معليش كل تأخيره فيها خيره.. هذه الغريبه حزنت علي وامي فاتحه بيتها ليومكم ذا لهاللي عايرتني بتأخر حملي وتجيب طاريها وتمدحها عالطالعه والنازله واخواتي يموتون فيها ما يطرون الا هي كل سوالفهم يذكرونها واحيان اتصل على امي تقولي امس فلانه كانت عندنا وتعشينا مع بعض وسهرنا الله يسعدها فرحتنا بجيتها !!!!! ومره من المرات امي حطتني بموقف لا احسد عليه قدام زوجي وامه يوم عمتي خطبتني لولدها جا واحد من محارمي وبنفس الوقت من محارم ام زوجي وسبني عند عمتي وكانوا خالاتي وجدتي وامي موجودين وهو تجرا يسبني قدام امـــــــي وقال لام زوجي مالقيتوا الا ذي لولدكم؟ سمرا و فيها وفيها وفيها ام زوجي طنشت كلامه وامي ساكته ولا حرف المهم ان خالاتي وجدتي علموني ورحت اشتكي لاختي واقولها شفتي امي شلون ساكته ماتدافع عني ولا سكتت فلان ؟ امي كانت تتسمع عند الباب ودخلت علي الغرفه وصرخت وتفلت علي ودعت علي اني ليش اقول انها مادافعت عني! طيب دام عندك هالقوه كان تشطرتي و دافعتي فيها عني قدام اللي يبي يفركش خطوبة بنتك ؟ واختي بكل خبث راحت ورى امي وطنشتني وصفت مع امي المهم بعد زواجي امي قامت تزور محرمنا هذا اللي تكلم عني وحاول يفركش خطبتي وجاب عيوبي قدام عمتي!! راحت له البيت وسلمت عليه وقالت له وش رايك نخزي ابليس ونرجع علاقتنا؟!!!!!!!!!! وهو اللي حاول يأذيني ومن يوم تزوجت قاطع امي غيره عشان كان يبي زوجي لبنته وكل جماعتنا يعرفون هالكلام واولهم ام زوجي قالتلي كل هالزعل والسب لكي عشان يبي ولدي لبنته , امي حره بحياتها بس انا مستغربه شلون تكلم واحد كان يبي يقطع رزق بنتها لا وهي اللي بدأت الصلح معه! زوجي قالي والله لو كان فلان ذا تكلم عن وحده من خواتي ربع الكلام اللي قاله عليك وجا يعتذر ويبوس رجول امي كانت امي بتوكله تراااب وامك الله يهديها شلون رايحه له بنفسها؟؟!! والله ماعرفت ارد لان اصلا هالكلام كان هو اللي يدور ببالي وماكنت انام الليل ودعيت الله ليل نهار ان زوجي وامه مايدرون بتصرف امي لكنهم دروا وقدر الله لي اني اتفشل قدامهم بسبب امي وتصرفاتها الغريبه العجيبه ومره صار موقف وحده قريبتي سوت عزيمه وعزمت امي واخواتي وماعزمتني وامي واخواتي راحوا حتى ماعلموني انهم رايحين بتقولون يخبون عنك عشان ماينكسر قلبك بقولكم للاسف ولا جابوا خبر زعلي راحوا العزيمه وانا اخر من يعلم الا ماعملوني بالمرره ويوم رحت انا وزوجي نزور اهلي فشلتني قدام زوجي وقالت ترى قبل كم يوم كنا بعزيمه فلانه عزمتنا وعزمت ناس كثيير وقدام زوجي قالت انبسطنا ورقصنا وفليناها وعشتنا احلى عشا الله يسعدها جابت لنا بوفيه والله كان ما ودنا نطلع من عندها من زود الوناسه !! تخيلوا الموقف بس؟ اول شي راحت عزيمه حتى ما حطتني بالصوره انا ما اقول انها تستأذن مني مين انا عشان تستأذن مني ؟ لكن عالاقل تعطيني خبر ما اكون زي المغفله اهلي رايحين عزومه كبيره وسهره وانا مدري وين الله حاطني والشغله الثانيه تدعي لوحده حتى مافكرت ((تقـــــــــــــــــــــــــــــــدر بنتك)) والشغله الاخيره قدااام زوجي تقولين انها حشمتكم وعشتكم ورقصتوا واستانستوا وش بيقول زوجي؟ امها واخواتها مستانسين ومقدرين وحده ماقدرت بنتهم واختهم؟؟؟؟؟؟ المهم بعدها بأسبوع واحد بس نفس قريبتي هذه سوت عزومه ثانيه بقاعه كبيره وعزمت ناس كثير (الله يشهد علي من سابع سماء ان مابيني وبينها شي لازعل ولاشي حتى يوم نتقابل بمكان نسلم على بعض بحراره) المهم انها ماعزمتني! وامي واخواتي كلهم راحوا لها بعد وقدروها وكانوا اول الحاضرين ولا تحركت فيهم شعره ناحيتي ودعيت الله ان زوجي مايدري واتفشل والحمدلله زوجي مادرى ومره من المرات بنت خالتي كنا بمجلس ورمت علي كلام بمزح قمت رديت عليها مزحه بردحه هي تبي ترمي كلام ومحد يرد عليها شخصيتها من صغرها مغروره المهم مع الايام اثاريها راحت لامي تتشكى عدها تقول كنت امزح مع فلانه وردت علي! مو هنا المشكله ابدا لان الناس تحب نفسها ولايرضون على انفسهم حتى لو كانوا هم الغلطانين, المشكله ان امي اتصلت علي وقامت تعاتبني بلسان بنت خالتي! وانها تمزح ومو قصدها بس انتي ماتتحملين! يعني يا امي تعرفين تتشرهين وتعاتبين؟ وينك طيب عن معاتبة اللي يخطون معي؟ وين لسانك مايتحرك عليهم بس يتحرك علي؟ اصلا بنت خالتي لو تعرف عن امي انها تصف مع بنتها مهما كان الثمن ماكان تجرأت تتشكاني عند امي صح ولا انا غلطانه؟؟ كان عرفت ان بيجيها كلام يجمد الدم بعروقها لكنها عارفه امي ماتموت الا على اخواتي اما انا من صغري تاركتني للدنيا تلطم فيني تلطيييييم والناس مهما تدعسني عاااادي على قلبها واذا قررت تاخذ موقف تاخذه ضدي انا بس اما البقيه مسموحين! افتقققققققققققققد بقوووووووه شعور العزوه والله بقوووووووه افتقد هالشعور احيان انام وانا حاضنه المخده ومقهوره احس المخده لو نطقت بتقدر الايام اللي نمتها عليها احس لو الجدران اللي ببيتي تنطق كان ممكن تصف معي وماتنكر الايام اللي عشتها معها كيف ترضين القهرررر والضيم لبنتك ؟ كيف مايهمك كسر قلبها كيف ؟! من صغري ياناس مقهوره ولا مره انصفتني وياليتها ماتنصفني وتكتفي بالسكوت كان ارحم الا تطول لسانها علي بالمعاتبه وان مواقف الناس معي انا سببها ! كل موقف سيئ يحصل معي تحملني مسؤليته بحجه ليه يسوون معك كذا اذا ماكنتي تستحقين؟؟؟؟ جننتني وربي يابنات عقلي مو صاحي بس قدام الناس اسوي نفسي عاقله بس بداخلي مجنونه معرف متى انا صح ومتى انا غلط امي لخبطت علي المفاهيم من صغري لين الحين عمري 31 سنه وهي طول عمرها ضدي مع الناس واذا طلع منهم العيب عاتبتني او ماتزعل منهم ولا تاخذ موقف واذا طلع مني العيب عاتبتني بككككل قوتها وانا صغيره ما افهم لكن الحين بعدما كبرت وتزوجت توصلت لقناعه انها مستعره مني اشك 99 بالميه انه هذا السبب ماتفتخر فيني لو تفتخر فيني كان لاشعوريا تدافع عني وتنحاز لي وتاخذ موقف لأي شي ممكن يمس كرامتي صح ولا انا غلطانه؟؟ المصيبه ان الحريم اللي حولنا سواء جماعتي او حتى الحريم بعوايلكم انتم يالقارئات ومن القصص اللي اقرأها بالنت كلهم منحازين مع بناتهم وخواتهم ويزعلون لزعل بناتهم ويرضون لرضى بناتهم هنا انقهر اضعااف امووت قهر والله زي بنت عمي اللي سوت ملكتها تخيلوا امها حيه ومع ذلك تجرأت انها ماتعزمني ولا خافت من امها لان شورها له قدر عند امها حتى سمعت من بنات عمي ان امها رقصت معها وبكت بكااااااء من الفرحه لبنتها وانا امي حتى ما فكرت تاخذ بخاطرها من بنت عمي انها ماعزمتني ولا فكرت حتى تتشره عليها لا هي ولا اخواتي انا لاهمتني عزايم ولا تقدير ولا مواجيب انا همني ليش امي عادي عندها ماتزعل ان الناس ماتقدرني ؟ ولا تاخذ بخاطرها ؟ ولا يحز بنفسها ليش ليش ؟؟ هذا اللي قاهرني والا اللي مايبيني ما ابيه الله الغني عن مناسباتهم انا اتكلم عن امي تحديدا مصيبتي الثانيه والاخيره خواتي تعلموا منها نفسسس الاسلوب والله العظيم خواتي كلهم الطقم كامل اخذوا طبعها ميه بالميه وضاق صدري اكثر مما هو ضيق يشوفون وحده ترمي علي كلام عادي يضحكون معها ويتكلمون معها لاتقولون لو شافوك على حق كان صفوا معك واخذوا موقف لصالحك لا وربي انهم متأكدين وشايفين انو ينغلط علي بس خلاص امي غرزت فيهم هالطبع من صغرهم وكبروا وصاروا نفسها لو يشوفون وحده تمد يدها علي عادي مايزعلون من بكره يكلمونها ويستقبلونها احسن استقبال وصداقه معها وتمشيات وعلى عينك ياتاجر علمتهم امي هالاسلوب وهم اصلا وراثه زيها فيهم قسوة قلب مررره عكسي انا غبيه قلبي يحزن ويتعاطف ودمـــــي حار على لحمي ودمي وياما ياما زعلت واخذت مواقف من ناس تعرضوا لامي وخواتي وخسرت هالناس عشان امي واخواتي واقول فدوه ومالقيت الا الجحود يشهد الله مو كلام منمق اكتبه فعلا فعلا مالقيت الا النكران والجحود ورب البيت من بكره اتعرض لموقف القاهم اصنام لا ارى لا اسمع لا اتكلم ولو انهم مجرد مايوقفون بصفي مابزعل منهم لكنهم للاسف حتـــــــــى ما اشوف يحز بخاطرهم ولا يشيلون على الشخص بتاتا وربي انهم عادي مع الشخص حتى مايقولون لي انهم مقهورين علي او يواسوني بكلمتين يبردون كبدي شوي الا بالعكس يستفزوني ويذكرون طاري الشخص قدامي يعني لاتحسبين بنتهاوش مع الخلق عشانك ترى كيييفك ماعلينا منك مع العلم اني اختهم الكبيره وانا بطلت ادافع عنهم خلاااص مات قلبي بسببهم كذا مره اشوف ناس تغلط عليهم يفور دمي ابي احامي عنهم اتعوذ من ابليس واتذكر نذالتهم معي ومواقفهم واقول لا والله طزز فيهم هم مو مستعدين يخسروا حتى طفل عشاني ليه انا اخسر الناس عشانهم؟ لكن هذه مو حياه وش فايدتهم اهـــل وربي انهم فشلوني قدام زوجي وامه مليون مره زوجي يسمع من الناس ان امي واخواتي بحفلة فلان وبعزومة علان ويشوفني انا قاعده بالبيت عنده وواضح ان ماعندي خبر بس ولا يسألني عشان لايحرجني وانا اكون متأكده انه عنده علم لان الناس اللي معاه بالواتس يكونون من ضمن الحاضرين وام زوجي ياما سمعت بتوجيب امي لناس مقصرين معي او متهاوشين معي او يكرهوني ونفس الشي القى وجوههم استغراب لو تشوفون زوجي واهله واخواته شلون متكاتفين وقلوبهم على بعض آآآآآآآآآآآه شي يحرق القلب . لو احد زعل واحد منهم او قصر مع واحد منهم البقيه يقلبون عليه خلاص تعبت من الكتابه سامحوني عالتطويل بس وجع كبير بقلبي حبيت اطلعه وللمره الثاني هاقول انا لاهمتني عزايم ولا تقدير ولا مواجيب انا همني ليش امي عادي عندها ماتزعل ان الناس ماتقدرني ؟ ولا تاخذ بخاطرها ؟ ولا يحز بنفسها ليش ليش ؟؟ هذا اللي قاهرني والا اللي مايبيني ما ابيه الله الغني عن مناسباتهم انا اتكلم عن امي تحديدا