ماني حاسه اني عروس

السلام عليكم
انا وحدة وصلت مشارف الثلاثين. عندي مشكله ضعف بالاطراف اجريت عمليات للاعصاب لذلك انا رافضه الزواج من اول وتقدم لي كثير لكن بسبب هالشي ماقدرت اني اقبل الى ان جى اليوم الي اجبرت اني اقبل وكان العريس اصغر مني بالعمر فرق بينا اربع سنوات وهالشي ماتقبلته اني اكون اكبر منه لو بيوم واحد وهالشخص ماعرفه ولاعرف من وين جى ولما شرح له الوالد الوضع قال ماكنت اعلم لكن مو مشكله طلب النظرة الشرعيه ووافقت. اني اطلع شافني وتم القبول انا صحيح مرتاحه للشخص لكن عندي قناعه ان مايصير الوحدة تاخذ اصغر منها واجتمعت علي قناعتي ووضعي الصحي والاجتماعي. ابوي متزوج من ثلاث حياتي فيها ضغوط ابوي قالها بالحرف الواحد روحي دوري رزقك لو مع واحد عمره ١٥ اهم شي تجيبين اولاد انكسرت من كلامه ومن الانانيه عند الرجال بانهم يشوفون المراءة بس اداه مالها مشاعر وزادني زوجات ابوي وتعليقاتهم علي وعلى عمري ناظرت وجهي شاحب نفسيتي مسدوده عن كل شي شعري شيب ماعرف اصبغ حتى ولو صبغت يطلع بيومين فكرت بعد هالعمر كيف بيكون الوضع وكلام الناس كيف بحس اني زوجه اصلا وكيف بتعدي اول ليله معي انا بالذات كيف بيتفهم حدد الزواج بشهر ٧ وانا طالبه اقل شي سبع شهور ابي اتقبل الوضع الجديد كنت مفكرة اروح استشاريه لان عندي رهبه من اول ليله و ابي اجهز مايمديني. الان ماعرف اشيل هم التجهيز والا نفسيتي انا امي منفصله ومتزوجه بشخص ثاني وبعيده عني وحياتها فيها صعوبات حاولت اني اسالها عن اشياء اقدر اسويها مالقيت تجاوب من ناحيه العنايه الداخليه ووووو من بيساعدني بجهازي كيف اقسم المهر شلون اشتري ملابس شتاء او صيف شلون بيتقبل جسمي ومنظر العمليات كل يوم قاعدة ابكي لان ابوي حطني بهذا الموقف اعرف انه يفكر بمصلحتي لكن الرجال تغيروا عن زمان وقالتها لي وحده من حريمه الرجال بيطفش منك اللي افضل منك بدلوهن فكيف انت ويش بيلقى فيك ماراح تقدرين عليه
انا ماعلم الغيب ومؤمنه بان عطايا الله تدهش لكن داخلي خوف وكلامهم مو شي جديد على مجتمعنا خلتني اخاف اكثر واكثر بغيت ادعي على بناتها لكن قلت ايش ذنبهم بكلام امهم
عطوني حل ابي اعيش باستقرار زي اي بنت
ابي وحده تشرح لي من الالف الى ياء كيف اتعامل مع الزوج واتقرب منه واكسبه لاني متاكده ان الشخصيه والطبع اكثر رسوخ من الجسد ابي احاول قد مااقدر
نفسي يعشقني بشكل ابرد في قلبي بكل وحده تهكمت علي وتأولت على الله وحكمت بفشلي اعطوني حلول لان ماعندي اي احد قريب اثق فيه جربت اسال وحده قريبه وفضفضت لها مخاوفي بلغت امها ونشرت كلامي ووصلته لا ابوي وخلتني بوضع محرج
وحتى هنا والله مااحلل اي وحده تنسخ كلامي او تصوره او تنشره بمكان ثاني عساها خصيمي يوم الدين