الحجره السريه :

على كثر ما قريت و استفدت من هالمنتدى ما عمري سويت لي حساب او فكرت ارد على احد او اكون جزء منه .. قبل دقيقه بالضبط من اقرا موضوعك سويت حساب هنا و سبحان الله اول موضوع قريته انتي … تمنيت اني جنبك و اضمك و اطمنك و اقولك انه لا يوجد مستحيل على الله اولا و ثانيا مافي مشكله مالها حل و مافي معاناه للابد و يغير الله من حال الى حال في ثانية … مهما حسيتي الظروف ضدك و كل شي يلاحقك ماضيك و حاضرك و مستقبلك تاكدي ان دائما فيه امل و فيه مخرج لكن احيانا نحتاج نتوه في الظلمة كثير لين نلقى النور في اخر النفق لحكمة لا يعلمها الا الله و لدروس تصقلنا و تخلينا اشخاص اروع مما كنا قبل هالظلام … تدرين ان اروع القصص و اروع الانتصارات و التغيير في البشرية اللي كانت بدايتها الم و معاناه .. كل اللي انتي فيه فعلا شي صعب و لكنه ايضا قد يكون سبب لنعم كثيره في مستقبلك .. كل المك هذا حوليه لطاقه في نفسك و حياتك الجديده للتغيير للافضل .. صدقيني مافي حافز اكبر من الالم و مافي انتقام اكثر لذه من النجاح و السعادة … الحلول سهله و طرق التعامل كثير و بنعطيك نصايح من كل مكان و بتجيك نصايح من جميع انواع التفكير و بجميع طرق العنايه لكن مو هنا مربط الفرس … السر يا حبيبتي في الحافز و الاراده و العزم اللي داخلك لان التغيير اللي تبغينه لازم يكون للعمر كله تبغين تكونين انسانه جديده تبغين ترمين الماضي و توقعاتك عن نفسك و توقعات الناس عنك ورا ظهرك و تبدين صفحة بيضاء كانك توك مولودة … هذا كله يحتاج قوه و بصيرة و عزم يكفيك تكملين طول العمر مو يوم و يومين او اذا واجهتي اي عقبه ممكن تثنيك عن رحلتك اللي راح تغير حياتك .. نصيحتي لك قبل اي خلطه راح تسوينها و طريقه عنايه و دورات للتعامل و كل حاجه بتحتاجين تتعلمينها … اجلسي جلسه صادقه مع نفسك و اعزمي على التغيير .. صلي ركعتين اخر الليل و كلمي ربي و طلعي كل اللي في قلبك و اطلبيه العون في رحلتك الجايه .. استخدمي كل المك حافز لك حددي اهدافك تخيلي الحياه اللي تبغينها بتفاصيلها و اشتغلي انك تحققينها كلها .. و اهم شي اشتغلي على نفسك لان اذا انتي حبيتي نفسك و حسيتي انك تستحقين كل السعاده و الحب اللي تحلمين فيها باذن الله كل شي حولك بيتغير .. زيدي ثقتك بنفسك و كل يوم سوي شي لها .. و لا تدورين اعذار و لا تقولين انا غير او عندي كذا او فيني كذا .. كل هذا ما يهم .. الله ما خلق على هذي الارض بني ادم نفس بني ادم ثاني خلقنا مختلفين حتى في بصمه اليد لحكمة .. هل كل الناس السعيدين و الناجحين على وجه الارض حلوين و اغنياء و ظروفهم كويسه و صحتهم زي الفل ؟ طبعا لا .. الارض مليانه ناس سعيده مع ان كل الدنيا ضدها و الابتلاءات ما تتوقف .. مثال بسيط يجي ببالي زوجه رئيس فرنسا شوفي كم عمرها و كم عمره ؟ شكلها بسيط جدا و عجوز كبيره و مع ذلك حبها و تزوجها و هو رئيس دوله!! عارضات ازياء بمقاييس جمال لا تقاوم يرفضون من رجال كثير و يتزوجون نساء بسيطات .. فعلا مثل ما قلتي الشخصيه و التعامل اثرها اكبر من الشكل، البنات ما قصروا بالنصايح و لكن لازم تعرفين ان الشي المهم يتغير هو تفكيرك و روتين حياتك في كل شي عشان تتغيرين كشخص و تتغير حياتك .. استعيني بالله و تصدقي بهالنيه و ما اقول الا الله يسخر لك زوجك و يفرج همك و ييسر امرك .. الله يجعل القادم من حياتك اسعد ما عشتي و يصب عليك الرزق و الراحه و التيسير صبا .. الله يجعل هالرجل لك زوج و صديق و حبيب و عضيد و اب لابناء صالحين يملون حياتك حب و سعاده و تعيشين معاهم الطفوله و المراهقه و الشباب اللي تمنيته .. انتي امراه رائعة .. كل حبي و تقديري لك

على كثر ما قريت و استفدت من هالمنتدى ما عمري سويت لي حساب او فكرت ارد على احد او اكون جزء منه .....