ما اشوف القشــره و العوبه وقليلة الادب ضرهم شي

حياتنا فيها نماذج لناس عوب وبعضهم قليلين ادب ويجرحون الناس ويدقون بكلام ينقط سم وفيهم قشاره
وبالرغم من كل صفاتهم هذه الا انو ماضرتهم بشي اي نعم حياتهم ماشيه زي الساعه ومن احسن مايكون وربي لاتقولون البيوت اسرار بعضهم عايشين معهم وشايفين كيف حياتهم وكل الناس تدري عن حياتهم واصلا بهالزمن خلاص كلن انفتح على الثاني والدنيا صايره صغيره ماعاد شي يتخبى فيها المستانسه الناس تعرف عنها والتعيسه الناس تعرف عنها ماعاد شي يتخبى زي قبل
انا بصراحه اللي اشوفه ان الناس ماتقـــــــدر الشخص الهادئ وتستوطي حيطه وكلن يتجرأ عليه اللي يسوى والا اللي مايسوى يتجرأ عليه اما اللي يعطيهم على راسهم حتى لو بأدب بس يعطيهم على راسهم يحترمونه! دنيا مقلوبه عجيبه غريبه يعني لازم نكون قليلين تربيه عشان الناس تحترمنا؟ مهما اقنعتوني بالعكس مابقتنع لان شفت هالشي مو بس بمجتمعي وقريباتي لا شفت هالشي عن طريق المواقف والقصص اللي تنطرح هنا بالمنتدى سواء عن سلايفها او اخوات الزوج او او او, اللي هادئه يدعسونها اما القويه الكل يحترمها حتى اللي اكبر منها يطقون لها تعظيم سلام
كذلك الناس اللي عرفتهم ولاتربطني فيهم صلة قرابه احسهم يشوفون نفس الشي المشكلجيه والقشره و القويه حتى لو بقلة ادب للاسف تنحط عالراس اما المحترمه العااااااااااااااقله هذه تصير مثل الكوره كلن يشوتها وسهل يتجرأون عليها حتى الناس اللي يحترموها ممكن لو مزاجهم اتعكر عادي يقلبو عليها بدون خوف ولاضرب حساب لها لانهم تعودو عليها عاقله ومسالمه ولوبيوم طلعت منها زله قامو عليها بحجة (غلطة الشاطر بألف وماهقينا تطلع منك انتي يالعاقله) طيب يعني غيري يدعسكم ولا شرهتو عليه وانا قلت كلمه قومتو قيامتي بس لاني عودتكم عالادب؟؟؟؟ يعني انتو تتبرمجون يا ابيض يا اسود ؟؟؟؟
استغرب من هالدنيا الخايسه والمبادئ المقلووبه طيب ليه كذا حتى الخدامات شي عجيب عجيب عجيب القشـــــــــره اللي تضرب خدامتها وتجوعها وربي الخدامه تصير وفيييه ومخلصه وتحترم راعية البيت ولاتفكر تهرب واللي تبتسم مجرد ابتسامه مع الخدامه خلاص تقرأ على نفسها الفاتحه هاتك يامرادد وتأفف وقلة ادب وتقصير وتضرب البزارين كنها راعية البيت
حتى العمه ام الزوج لاجات حرمة ولدها مقصره معها لاتحط ولاتشيل ولاتفزع ولاتسأل ولا تبتسم وتحرش ولدهم عليهم وتكره الزوج بأهله وتسوي اللي براسها ولاهمها احد احترمتها وهابتها ولاتحارشها ولاتزعلها حتى عيال القويه يتعاملون معامله ملكيه غيرررر عن عيال حرمة الولد الضعيفه
حتى الاب والام اقسم بالله لو وحده من بناتهم عنيييييييده ومتمرده و شورها من راسها احترموها وانصاعو لها وعطوها صلاحيات انحرمت منها البنت الهادئـــــــــــــه المطيعه المسالمه
حتى بالصالونات لو وحده من الزباين ملسونه وقشره وماعجبها شغلهم و سوت لهم فضيحه يدارونها عكس الهادئه لو اعترضت على شغلهم لعنوا خيرها
بمجالس الحريم يختارون الهادئه عشان يحارشونها اما ام لسانين واللي ترد الكلمه بعشرين كلمه محد يدوسلها على طرف بالعكس يتوددون لها لانها تكسر راسهم فيتأدبون
وربي اعرف وحده عجوز عمرها 68 سنه تخاف وتهاب وحده عمرها 21 سنه بس عشان ام البنت قوووووويه مره وماتعطي وجه ونفس هالعجوز ماسحه البلاط بوحده عمرها 40 لان شخصيتها مسكينه وهادئه والابتسامه ماتفارق وجهها! وش هالدنيا الظااااالمه؟



ليييييه الناس ماتمشي بالادب؟ معقوله الناس ماتحب الا اللي يسوقها ويذلها ويكسر خشمها؟
شاركووني بالله ابي رأيكم باللي قلته
ابي مواقف مريتو فيها من هالنوع
ابي تفسيركم ليه الناس تتعامل مع القوي تعامل غير عن الهادي