كيفكم بنات؟
ان شاء الله كلكم طيبات وبصحة وخير
هذي اول مرة اكتب موضوع هنا انا كنت متواجدة بقسم الصحة ( السمنة والنحافة)
لاني داخلة هالمنتدى لهدف معين اللي هو توعية البنات اللي بهالقسم من الناحية الصحية
وبعدها اتركه لاني صراحة مو حقت منتديات وهالسوالف يعني بنت و حقت تويتر و انستقرام و لاهية بدراستي وكذا بس القسم هذا عزيز على قلبي احب اقرا سوالفكم وارد عليها وقت الطفش 🌚😂
المهم حصلي اليوم موقف اثر فيني و حبيت احكيه امس كنت طالعة ابغى اشتري شي لامي من الصيدلية وانا ادور بالمحلات لقيت هذا خاتم الاستغفار الوانهم حلوة و اشتريت
وياما اشتري منهم وارمي بالدرج
لما رجعت البيت فضيت الاغراض من الاكياس و رميت الخاتم على الطاولة اللي جمب الكنبة اللي اجلس عليها و رحت كملت يومي
بعد ما نامو اهلي جلست على كنبتي بالصالة
انا طبعي يوميا لازم يكون لي وقت اجلس فيه مع نفسي بعد ما ينامون اهلي ويهدى البيت
اشوف مسلسلاتي او اقرا او اعمل يوغا و استرخي او احفظ كلمات جديدة من اي لغة اي شي احبه اسويه بهالوقت
توني بشغل حلقة المسلسل و جاية بصب شاهي الا جت عيوني على خاتم الاستغفار
حطيت اللاب على جمب و سرحت
بعدها مسكت الجوال و سويت سيرچ عن فوائد الاستغفار وجلست اقرا و اقرا
فوائد عظيمة واشياء جديدة عرفتها
تعمقت و صرت اقرا موضوع ورا موضوع و تجارب المستغفرين بعدين فجأة لقيتني عند مواضيع سورة البقرة وفوائدها وصرت اقرا و شوية عند الصدقة
وقيام الليل يعني صار هاليوم عن المواضيع الدينية
بعدها سرحت وجلست استرجع يومي
انا كل شي فيني و بحياتي معطيته حقه
بشرتي و جمالي له جدول وله اوقات عناية و له فلوس مخصصة لكريماته و اغراضه
شعري كذلك
جسمي برضو له جدول غذائي وجدول تمارين و عناية خاصة
دراستي لها نص يومي و كل جهدي
نفسيتي لها الاهتمام الاكبر اطلع و ادخل و اشتري والبس و ارقص و اتمشى واسترخي
لقيت ان كل شي بحياتي معطيته حقه كل شي الا ربي! مو تفهموا اني ما اصلي و اعبده ..الخ
لا اصلي بس الواجب علي والمفروض اللي هي الصلاة ال٥ و احياناً أأخرها
اتصدق .. اصوم .. اصلي .. اعبده
لكن بشكل مايليق فيه ابداً !
انا مو معطية ربي حقه ابداً و اصلاً مهما سويت انا ما بوفيه حقه !
ربي اعطاني بحياتي كل شي اتمناه
اعطاني عائلة سعيدة مافيها مشاكل
اعطاني حياة مريحة مافيها احزان وهموم
اعطاني الصديقات الصدوقات
اعطاني المال
اعطاني الجمال
اعطاني الصحة
درست وتخصصت بالتخصص اللي ابغاه !
ادعي ويستجيب دعائي !
يعني اعطاني كل شي
وانا ما اعطيته ولا شي مع انه في غنى عني و عن عبادتي اللي ما يحتاجها ، انا اللي احتاجها
دايما لما احد يعطيك شي تحبينه تشكرينه!
وانا قررت اشكر ربي و شكر ربي غير شكر اي شخص عادي
وشكره يكون بعبادته
ف قررت التزم بصلاتي في وقتها وباقي عباداتي
وقررت ان زي ما لكل شي احبه وقت خاص له
يكون لربي وقت و طبعا له كل وقتي بس اقصد كذا وقت لربي و بس بدون الانشغال باي شي ثاني
وكلنا نعرف اقرب وقت يكون فيه العبد قريب من ربه هو ثلث الليل
قررت بهالوقت اقرا سورة البقرة يوميا و استغفر
و من اللي قريته ان حطي بنيتك شي تتمنينه وانتي تستغفري و تقري و بيتحقق ، فكرت ايش اتمنى؟ مافي شي محدد ابغاه بشدة فقلت نيتي بتكون رضا الله
و اتكلم مع ربي و احكيله اللي حصل بيومي
واقوله اللي ضايقني و اشكره على اللي فرحني
و غير كذا قررت اصوم كل اسبوع نافلة اذا ربي قدرني و اخصص مبلغ بس للصدقة وما استخدمه لشي ثاني والصدقة انا ملتزمة فيها من زمان
لازم قبل كل طلعة للمول اجهز مبلغ اعطيه اي عامل نظافة قدامي
ومن الاعمال اللي احب اسويها بعد كل غدا اجمع العظم و ارتبه بصحن و اخلي اخوي ينزله للبسس
واحب اساعد الناس جداً ويمكن تكون من اسباب حياتي السعيدة دعوة صادقة بالغيب من الاشخاص اللي ساعدتهم
ما احب اقول الاشياء اللي اسويها لربي عشان لاتصير رياء بس ابغى اوريكم ان اشياء بسيطة زي عظمة ترميها لبسة او ريال تعطيه لعامل تحول حياتك ❤️
المهم بعد هالقرار رجعت كملت الشاهي اللي صار ثلج و نمت
اول ماقمت لقيت صديقتي كاتبتلي رغد حلمت فيك
ولدتي بنت سميتيها جنى محمد
و كأي بنت ما بمخها لا زواج و لا عيال مت ضحك
وقلت خليني اشوف التفسير
و وولادة البنت كان تفسيرها جدا جميل وبالمختصر بعني الحياة الرغيدة
وكان في دلالة بالحلم فسرتها وكانت تدل على بشارة
و اسم البنت بالحلم ماله تفسير لكن معناه جميل
لما قريت التفسير حسيت اني بدمع عرفت ان هذا رد الله على قراري
بتبشيري بالحياة السعيدة !
رد سريع خلى قلبي يعتصر و يتندم على كل لحظة كنت فيها بعيدة عن ربي
مجرد قرار وفكرة اعطتني هالبشارة فكيف اذا داومت والتزمت فيها؟
هالقرار كنت ما ابغى احد يعرفه لكن كتبته للفائدة
كل مواضيع القسم هنا تحلطم و شكاوي وقرف من الحياة
فكرتي قبل ما تكتبي شكوتك هنا تقوليها لربي؟
فكرتي قبل تطلبي المساعدة هنا تطلبيها من ربي؟
بنات ربي عظيم ارحم الراحمين
قبل تطلبي او تشتكي لا اي احد ! توجهي للرب الصمد
وتفائلي بالخير بتلاقيه ، و اطلبي اللي تتمنيه بيتحقق .
طولت كثير بالكلام بس جد نفسي كلكم ترجعوا تعيدوا التفكير بحياتكم
ايش معطيك ربي؟
وايش انتي قدمتيله؟
قدمي لربك ولو شي بسيط بتحصلي على اضعافه وكوني من عباده الشاكرين لنعمه لا الجاحدين بنعمه!
وتذكري الاية هذي دائما : { ولئن شكرتم لأزيدنكم}
جزاك ربي الجنة
بلا حساب ولاسابق عذاب
كلامك يفرحك
اقراء وانا مبتسمة 😃
يارب عفوك ورضاك والجنة