ما هي اسباب فشل العجينه ((تعالو نتبادل الخبرات))

مرات يكون الزيت كثير
و مرات الخميرة
و مرات الحليب
حسب كل واحدة شو استعملت مواد و مقادير

اتوقع نوع الدقيق (افضل الكويتي ) والخميره (لازم تكون حبيباتها ناعمه وصغيره الي تجي بكيس مضغوط وعليه الطباخ وشرط انج ماتحطين مع الخميره ماي ساخن لازم دافي كل شي سائل تدخلينه على العجين لازم دافي هذا الي عندي واذا تذكرت شي ثاني اقول

والله انا على تجربتي بالمعجنات وعندي عجينتي الخاصه ولي 7 سنين اسووي فيها
وتنفع للبيتزاء وللفطاير وللخليه ،،،

لكني حبيت اغيرها من الملل ،، وكل مره اخذ وصفه من بنات عالم حواء ماتضبط ليه مدري ويكونون منزلين صور تشهيك تخسرين وعالفااضي ،،

مدري وش السبب


لكن في عجينه عطتني اياه ام عزيزان انفعتني حييييل بالفطاير تجيك نافشه وحلوو وطلعت فطايري ازين عن فطايري الاوليه ،، بس العجينه لو استخدمتيها للبيتزاء تطلع اي شي ما انصحك فيها

اسم العجينه ام عشر دقايق دوريها بالقسم تلقينها لان ضيعت اسم راعيتها وانا كاتبتها بورقه ودري وين الورقه



بالنسبه للخلط
معرووف لازم تكوون النواشف ثم البيض اذا فيها بيض وعقب ماي واخر شي الزيت مهم الزيت يكون اخر شي علشان يعطيك عجينه صح وتكون لينه
وكمية الماي ماتكون كثيره حتى لو انك عجنتي وكانت مقطعه بيدك وتتلصق ماعليه حطي كمية زيت اقل من الماء وهي راح تشكلك العجينه عدل


بالنسبه للطحين معروف الطحين الكويتي ازين شي ،، والخميره اللي عليها صورة الطباخ ،،،

وفيه شغله مهمه الا وهي درجة حرارة المكونات لازم تكون دافئه يعني الطحين درجته درجة حرارة الغرفه لان ساعات ناس تحط الطحين بالثلاجه ويكون بارد

البيض كذلك الحليب السكر ،،،


نجي اللحين للعجن ،،، اذا عجنتيه مهم تغطين العجين وتخلينه بمكان دافئ انا احطه بخزانة المطبخ فهمتي يجيك عدل وتنتفش


وفيه شغله مهم هي انك لياا جيتي تكوورين الشكل المطلوب سوى دوائر او مثلثات او جديله
لازم تقسمين العجين كور وتصفينه بصينيه كبيره ويرتاح 5 ــــ 10 دقايق
وعقب شكلي وهمم اذاا دهنتي الوجهه بالبيض ورشيتي سمسم خليها ترتاح شوي قبل لاتدخلينها الفرن



الفرن لازم يكوون دافئ يعني شغليه من قبل ،، لان اذا شغلتيه وحطيتي الصينه بيستوى اللي تحت ومايستوي من داخل

وتجيك عجينه والطعم مايسر





^
^

هذرتي زايده ،، بس حبيت اعطيك خبرتي بهالمجال ،، وان شاء الله تستفيدين انتي وغيرك ،، ولاتنسونا من الدعاء





سلااام

مشكورات خواتي على انكم عطيتونا خبراتكم...
الاخت orkidia مشكوره الغاليه على ردج.و بالفعل كل الاشياء اللي ذكرتيها اتاثر..و نور الموضوع...

الاخت أحلى كويتيه : مشكوره الغاليه على الرد....وبالفعل نوع الطحين اياثر....انا من يومين استخدمة طحين انجليزي غير اللي متعوده استخدمه و فشل لي العجينه...وتسلمين على اعطنا خبراتك...

الاخت منتظرة ضمة غلاك: مشكوره اختي على هالمعلومات الصراحه كفيتي و وفيتي بهذا الرد الحلو..و عجينة العشر دقائق مجربتنها حلوه للسنبون و الفطاير...
واتصدقين كنت افكر اجربها حق البيتزا زين يوم خبرتيني.....
وإن شاء الله كل البنات يستفيدون من هالمعلومات و نووور الموضوع...

أدري ردي متأخر لكن توني أنتبه لموضوعك
بالنسبه لخبرتي المتواضعه :
**نوع الدقيق (أفضل شي هو الدقيق الكويتي )

**الماء أو الحليب اللي تضيفينه للدقيق مايكون حاااااار لأن امي تقولي إذا كان حاااار يموت الخميره عشان كذا لوتحطينها تخمر بدل الساعه ساعتين ما تخمر لازم يكون دافيء

**أثناء ماتشكلين العجينه تولعين على الفرن عشان يكون حاااار
بس حبيت أفيد ..