متردده أساعدها لكن وضعها جدا مسكينة

السلام عليكم ورحمة الله وبركاتة
اهل زوجي عندهم بنتين وحده بالمتوسط والثانية تقريبا ٣٢ سنه عمرها اهل زوجي ناس بحالهم ومالهم معارف ابدا حتى اقاربهم من وين الوين عشان يتشاوفون من العيد للعيد
البنت الكبيره تقريبا من كانت تدرس بالجامعه وهي مرره ودها بالاستقرار والزواج لكن ربي ماكاب نصيب
سوالفها تلميحها كل شي تسولف فيه له علاقه بالزواج ودايم ام زوجي تنحرج منها وتسكتها او تغمز لها لاتسولفين بالزواج يعني اعطيكم مثال تقول حلم انها شافت نفسها عروس وزوجها وسيم يجنن ومن ذا السوالف او مثلا تقول انا اذا تزوجت بحط بزواجي كذا وكذا يعني تحسون الزواج هاجس الدرجة ام زوجي بعض الأوقات تتضايق
مرت السنوات والموضوع يكبر يجيها خطاطيب لكن غير مناسبين من وجهة نظر اهلها العمر ٢٨ تقريبا صار مايجي احد ابداااا ثم قبل سنه جاها مطلق عنده طفلين ورفضت وجاها متزوج ورفضت ويحق لهاالأن عمرها ٣٢ فكرت احط اسمها عند خطابة واحط شروطها لكن ترددت قلت وشدخلني وبنفس الوقت ارحمها اذا شفتها تلمح انه ودها تتزوج وتستقر تقطع قلبي
الله يرزقها بالزوج الصالح ومايحول الحول الا هي في بيت زوجها سعيدة ومبسوطة دعواتكم لها
تقولي امس أن شاءالله نهاية سنة ٢٠٢٠ اكون في بيت زوجي
والله رحمتها الله يكتب لها ياااارب النصيب الزين
وقبل انهي كلامي العمر مو عيب عندي صديقه عمرها ٣١ لكن هي تحس انها مو مستعدة نفسيا للزواج ومرتاحه بوضعها وعند اهلها تبارك الرحمن عمرنا ما نظرنا لها نظرة شفقه او قلنا مسكينه اما اخت زوجي من عمرها ٢٠ ودها بالزواج وانا كنت ارحمها يعني الشخص هو اللي يحدد رغبته مو العمر