متزوجة من أربع سنوات وعندي ولدين وحامل

لما اقرأ مشكلة وحدة تقول متزوجة من أربع سنوات وعندي ولدين وحامل واصله وإكتشفت أن زوجي يخوني! أكيد بيخونك وأنتي من يوم تزوجك ياحامل يانفاس ياعندك بيبي صغير تراكضين وراه ليل نهار. وحتى شخصيتك الحقيقية أكيد زوجك مايعرفها لأنك في الغالب حملتي في ثاني شهر زواج وبعد ماقد شافك رايقه ابداً إلا أول شهر زواج! طبعاً هذا مو عذر لأنه يخون والمفروض هذولي عياله زي ماهم عيالك والمفروض يساعدك عليهم بس الواقع غير. عندنا الأطفال مية بالمية مسؤولية أمهم، أبوهم بس يصرف عليهم ويحس أنه سوى الي عليه وأكثر. وأنتي تركضين ليل نهار وانتي حامل تنظفين وتطبخين وتغسلين وتهتمين بالصغار وهو يغازل والبنت الي يكلمها يقولها أنا أبحث عن الحب زوجتي مشغولة عني ولا كأنها موجودة وأنا أشعر بالوحدة!!!

بنات أصحوا اعرفوا وين مصلحتكم وارحموا انفسكم وكل شي بالعقل مو معقول تحملون ورى بعض وتحطمون صحتكم وحياتكم. متى تعيشون إذا حياتكم ضاعت في حمل وولادة ومطارد ورى هالعيال والرجل. ألقي نفسك أول وسوي لنفسك حياة جيدة موب كرف كرف الين نعجز وحنا ماعشنا ثم عاد نبدا نطالب عيالنا يعوضونا ومافيه شي يعوض الشباب والصحة والعمر الي ضاع أبداً. أنصحكم وأنصح نفسي