متى تنتهي مأساتي (1) فضفضة

السلام عليكم و رحمة الله
اترددت كتير في كتابة الموضوع لكن حسيت اني من جد محتاجة افضفض محتاجة احد يسمعني و يحس بية حتى لو ما يعرفني..
انا متزوجة عمري 23 عندي بنت و ولد و الآن حامل ( ماشاء الله تبارك الله)..عندي 4 اخوان و انا اكبرهم و ما عندي اخوات..
أحس عندي مشكلة لو أحاول أشخصها رح اقولكم انها مشكله نفسية و اجتماعية
أحس انه نفسيتي خربانة يعني قصدي تركيبها غلط او تأسيسها غلط..احيانا احس انه نفسيتي مالها حل و ما رح تتصلح..حاولت حاولت ما قدرت.. بحثت عن السبب اتذكرت انه امي لما كانت حامل بية و هية في شهرها الثالث اتضاربت مع ابويا و راحت لاهلها و قعدت عندهم الين ولدت... طبعا طول المدة دي و بابا ما سأل عنها و مشاااااااااكل
و نفسيتها كانت زفت و اساسا ماما عصبية مرررة...تتوقعوا ما اثر دا الشي في الجنين اللي هوة انا...
و بعد ما ولدتني تقول ماما اني مرررررررة كنت نكدية و بكائي مو طبيعي افتح فمي بالصراخ بصعوبة يسكتوني
تتوقعوا المشاكل اللي حصلت اثناء حملها فية ما أثرت فية و انا في بطنها؟؟؟؟
اوك بعد ما جيت للحياة استمرت المشاكل بين امي و ابويا و جاء اخويا بعد و لادتي بسنتين تقريبا و أمي كانت تصب غضبها فية دايما ايش انواع الكفوف ايش انواع الاهانات ... دمرتني نفسيا
اتذكر هاذا الشي امكن من انا 3 او 4 سنين.. احس امي كانت كارهتني كأني انا و اخوي غلطة عمرها لانها بسببنا ما تقدر تطلق..و خاصة انا
تقريبا لما صار عمري 6 سنين انتهت المشاكل نوعا ما يعني صارت اهدأ من اول بكثير و انجبت امي اخوية الثاني
لكن ما زال هناك فجوة بيني و بين امي... و مازالت تعاملني بطريقة تجرحني فيها و تهينني و غير السب و الشتم
( انتي بليدة انتي ما تفهمي ....) احس ما صار فية ثقة بنفسي ثقتي بنفسي صارت في الارض
احس اني حقيرة وانه الناس محتقرينني و انه فية عيوب
و كان هناك في عامل اخر أثر على نفسيتي و هوة انه ما عندي اخوات
كنت و انا صغيرة اجري ورى قريباتي اللي في سني و الصق فيهم و احبهم من قلبي لكن كانوا يقابلوني بالغطرسة و الغرور لأاني لاصقة فيهم و لانه كل وحدة فيهم عندها اخوات فكانوا مستغنيين عني و كانوا احيانا بنات خالاتي يتفقوا عليا و ما يعطوني العابهم و يتوشوشوا فيما بينهم و انا انظر لهم كأني شحاتة انتظر منهم يعطوني وجه..
كبرت و صرت في المتوسطة...حسسوني خالاتي اني قاعدة افرق بين بنات خالاتي اللي يصيروا اخوات
يعني اني افرق بين بنت خالتي و اختها .... ليييييييييش؟؟
اكيد لانهم شافوني لحالي مالي اخت قالو هاذي حاشرة نفسها بينهم...
و صارت مشاكل كثيييييييير بيني و بين بنات خالاتي مع اني و الله كنت في امس الحاجة لهم لانه معتبرتهم همة اخواتي ما عندي اخوات انا لكن و حدة منهم الله يهديها مررررررة كانت حاقدة و تكرهني و كنت احسها لو انا مت امكن تفرح...رح اسميها (ع) عشان لو ذكرتها تاني تعرفوها...
بالنسبة للجو العائلي كانت امي مقاطعة عماتي امكن من انا 6 او 7 سنين تقريبا و كنا كل اسبوع لما نروح لهم كانت ما تجي معانا بس انا و ابويا و اخواني... تقريبا كانت مقاطعتهم نهائيا...بسبب مشاكل كثير حصلت بينهم..
كنت اروح لعماتي و كنت احسهم ما يبغوني لاني بنت امي..و احيانا كانوا يرفعوا صوتهم عليا و يهزئوني..
كنت اروح هناك و يسالوني الخدامات : فين ماما انتي؟
و اذا عندهم عزومة يسالوني البنات الصغار: فين امك؟
كنت احس اني محرومة من الجو العائلي المريح.. جو فيه مشاحنات و قلوب مليانة..و ايش ذنبي طيب انا
ايش ذنب بنت صغيرة
كان الجو العائلي المريح الوحيد هو جو خالاتي و لكن للاسف لم يبقى هاذا الجو على حاله
من اول الاسباب المشاكل اللي حصلت بيني و بين بنات خالاتي... يعني عالمتوسطة.. و كان سببها ضعف شخصيتي. عدم القدرة عالمواجهة..و ثقتي بنفسي المعدومة...
كانوا يطنشوني و لا يعبروني و انا ادور عليهم و همة احسهم ما يبغوني و صارت المشاكل على دا الاساس...
عالثانوي انقطعت عنهم فترة اشوفهم بشكل متقطع اهم شي عندي دراستي
و كونت صداقات في المدرسة و لكنها للاسف لم تدوم...
نهاية الثانوي خطبني و لد خالتي...ولد خالتي هوة اللي كان يبغاني... و من هنا بدات مشاكل جديدة كأني ان ناقصة
من يوم اتزوجت ولد خالتي اصبحت اشعر انه خالاتي ما كانهم خالاتي بل كأنهم اهل زوجي فقط
حتى جدتي ام امي...و بنات خالاتي كانهم اخوات زوجي فقط...و للمعلومية (ع ) ليست من اخوات زوجي لانها بنت خالتي الاخرى...
من يوم خطبوني و انا احس انهم ما يبغوني... و كنت و الله ابكي . ما اعرف اقبل و لا لا
بالذات انه ولد خالتي الصراحة يعجبني و فيه كل المواصفات اللي ابغاها و اللي اتمناها من زمان و خاصة انه شارييني
لكن امه و اخواته ما حسيتهم يبغوني
استخرت و قبلت
حصلت الملكة و برضهم احسهم مو رغبانين فية
و قبل ملكتي بفترة بسيطة اتزوج اخوه الكبير
و كانوا شايلين زوجته شييييييل و رافعيييينها للسما
لما انا ملكت ما شفت شي من دا كله و لا اي تقدير لية قلت في نفسي امكن لو تزوجت
اتزوجت و برضه ما في اي تقدير و كانوا مفضلينها علية في كل شي
ليييييييييش؟ ايش ذنبي؟ محد غصبكم عليا؟ اخدتوني من الشارع و هية من بيت اهلها؟
تخيلوا انا اتزوجت عمري 18 سنة و الله حرموني من شعوري اني عروسة متزوجة جديد
ابدا ما في اي تعبير اي اهتمام اي تقدير الا القليل القليل
سلفتي حملت وولدت فرررحوا بولادتها و يزينوا باب المستشفى و و و و و و
هية جابت بنت.... كانوا بس يشيلوا في بنتها و يحطوا فيها و ياخدوها عندهم من و هية عمرها شهور
و جدتي ام امي سوت يوم سبوع مكللللللللللف و اليوم اللي بعده على طول سوت رحماني كبير و هدايا
قلت في نفسي امكن لو حملت و جبت بيبي رح يسووا معايا نفس الشي
و حملت و ولدت
صارت مشكلة و انا في المستشفى بسببهم
تخيلوا جوا المستشفى بدل ما يهتموا بية قعدوا يهتموا بأهل سلفتي لانهم كانوا عندي بيزوروني
دخلت اخته و عدت السرير و سلمت على اهل سلفتي و ايش ضحك و ايش كلام و بعدها جات سلمت عليا
و ام زوجي سلمت عليا و اعطتني ظهرها تماااااااااااااااما و قعدت تتكلم مع اهل سلفتي
امي و قتها مرة اتنرفزت و بان على وجهها راحوا الناس و اهله من هنا و امي تشتكي لزوجي من هنا و اترفع صوتها وانفعلت مرررررررررة
لانه الصراحة من يوم ما اتزوجت و نحن ساكتين على حركاتهم
انا و الله ايش اتنكدت و انا في المستشفى حسيت الدنيا دارت بية و كرهت كل شي حوليني
يعني حتى في و لادة بنتي نكدوا عليا حسبي الله و نعم الوكيل
و جدتي ام امي لا سوت لي لا سابع و لا رحماني و لااااااااااااااااااااااا شي و لا حتى مجاملة
و تمر الايام و يستمروا خالاتي بعاملتي كانهم اهل زوج
و بنات خالاتي كاخوات زوج
و ( ع ) من يوم اتزوجت زاد حقدها عليا اكثر و و الله كنت احسها تكره تشوف النعمة عليا
و تنقلب فجاة عليا لو شافتني متشيكة و متكشخة اعوذ بالله منها

مرت سنتين بعد زواجي حسيت اني افتقد جو العائلة جو الاسرة
رح تقولولي فين زوجك و اولادك اقول لكم الحمدلله طيبين
لكن لا بد من جو عائلي كبير يجمع العوائل الصغيرة
هاذا الجو اللي يجتمع فيه النساء مع بعض و ينبسطوا و يتكلموا و يتبادلوا الخبرات و الاخبار
رح تقولولي فين امك و ابوك
الحمدلله موجودين و اخواني كمان لكن
و الله لما اروح لهم ملللللللللللللللل عندهم كل واحد مشغول بنفسه
ما في احد اضحك و اتكلم معاه الا قليييييييل مرة
العادة العادة ابويا قدام الكورة و الاخبار
و ماما يا عالجوال تتكلم يا مسدوحة يا منرفزة
و اخواني اللي عالكمبيوتر و اللي بيدرس طب مو فاضي لاحد و الاتنين الباقيين صغار عني اعمارهم 9 و10 سنين تقريبا
ما عندي اخوات اتكلم معاهم و لا اضحك معاهم و لا اتناقش معاهم و لا استهبل معاهم و لا استشيرهم ...
جو كئيييييييييييييييييييب جدا
و بالنسبة لجو جمعات خالاتي ( اهل زوجي) صرت اكرهها اكرهها اكرهها اروح و احس اني مخنوقة محد يكلمني الا بالمجاملة و الرسميات ما كأني بنتهم و منهم .. يعاملوا سلفتي احسن مني و ايش مدح فيها قدامي و ايش و ايش
و انا اذا جوا يمدحوني يمدحوني لما ما تكون سلفتي موجودة يراعوا مشاعرها لكن انا محد يراعي مشاعري
و قليلا ما يمدحوني اساسا
الكل يمدح اطفالها و انا لا
انا ينتقدوا اطفالي حتى لو على اشياء دقيقة المهم يطلعوني اني ما عرفت اربيهم و اني ما اعرف اوجههم و و و و
انا الحمدلله معروفة بالشياكة و انه ذوقي حلو خاصة في الالوان التنسيق الترتيب لية طابع خاص
العيد اللي فات عيدوا عليا خالاتي و كاتنت معاهم اخت زوجي
احسها متفاجأة اني جددت في البيت و قعدت تتفرج عالبيت و هي ساااااااااااكتة و مخبوطة
لو اللي جددت سلفتي كان مدحوها و رفعوها السما و كان فرحوا لها لكن انا لا

و احيانا لو جيت اتكلمت مع احد فيهم يرد على قد الكلام كانه بيجاملوا سلفتي و لا ايش مني فاهمة
ابدا جو مو مريح
و كمان (ع) احيانا تحاول تغيظني و تلم على سلفتي و تشيل بزورتها و ايش ضحك و هرج
و كمان اخوات زوجي يلموا على (ع) و اخواتها
او يلموا على سلفتي و انا يطنشوووووووووووووني
كانهم بالعنية يبغوني قاعدة لحالي محد معبرني
بالله تتوقعوا رح اكون مرتاحة؟
كرههههههههههههههههت جمعاتهم خلاص ما ارجع الا منكدة
فكرت اصلح العلاقات مع عماتي
صرت افرض نفسي عليهم و حسيتهم اندمجت معاهم شوية شوية
و تقريبا صاروا يهتموا بية ويسالوا عني
فرحت
و حسيت انه اخيرا صار عندي جو عائلي حلو
و انبسطت معاهم مررررررررررررررررة
لكن امي مو عاجبها
لانها مقاطعتهم و تقوللي انتي مو لازم تلصقي فيهم يكفي تصليهم بس
لكن ليش تنامي عندهم و تمشيات و روحات و جيات
طيب انا ايش اسوي؟؟
انا فاقدة هاذا الجو.. و ما صدقت لقيته عندهم
المهم استمريت مع عماتي تقريبا سنتين لكن اضحك على نفسي و عليكم لو اقولكم انهم نسيوا مشاكلهم مع امي
برضهم احيانا بينظرولي على اني بنت امي

احس لسة القلوب ما صفيت
حسيت انه في شي مو مريح
قررت اسحب منهم بهدوء
لكن ما قطعتهم
بس خففت زيارات

الان انا متزوجة لية 5 سنين و نص
اشعر انه ما عندي اهل
لا خالات يعاملوني عدل
و لا عمات
امي اساسا من و انا صغيرة علاقتي بيها ضعيفة فما بالك الان
اخوات ما عندي
صحباتي كللللللللللللللللللهم انشغلوا بنفسهم و حياتهم
و الله و الله يا اخوات انه يوم يجيني خبر حلو او يصير شي حلو يفرحني ابغى اقول لاحد ما الاقي
مالاقي احد يشاركني الفرحة
اقرب مثال الان لما عرفت انه اللي في بطني بنت طررررررررررررررررت من الفرحة عشان رح اجيب اخت لبنتي و مارح تعاني المعاناة اللي انا عايشتها انه ما عندي اخوات
جيت ابغى احد يشاركني الفرحة
اتصلت على امي ما عندي غيرها
كان ردها بااااااااااارد و ما في اي مبالاة
تحطييييييييييييييييييم
تراها مو اول مرة تعمل كدة معايا
ااااااااااااااااه بس
لما اجيهم يكونوا عندي سوالف و حكاوي ابغى اتكلم
اجيها احكيها يا انها ما تهتم او انها تنتقد و ياااااااااا حبها لانتقادي و يا انه يتقلب الموضوع لمشكلة و تترفع الاصوات

يا بنات...و الله احس بوحدة رهيبة.. رهيبة
بس قاعدة في بيتي.. مع اولادي و زوجي..... الحمدلله
و زوجي مشغول دائما دائما دائما
و اطفالي صغار
ما الاقي احد اتكلم معاه و اتناقش و اضحك و و و و و
جوالي نادرا ما يدق
اذا دق تطلع امي و الاغلب في مكالمتها تكون سريعة و احيانا عتاب و لا مخاصمة و انتقادات
او اكلمها كل شوية تقطع كلامي يا بتخاصم الشغالة و يا بتكلم اخويا
احس انا عندها مالية كرامة
لو احد تاني تتكلم معاه بالساعات و ما تقطع كلامه

اشعر اني و حيدة و حيييييييييييييييييييييييييييييدة
ما في احد يلم عليا
ما في جو عائلي او اسري اشعر فيه
كل تجمعات العائلة كرهتها
كلها ما ارتاح فيها
احس فيها اني ما بأتعامل مع اهلي
احس اني باتعامل مع زملاء او ناس ما يبغوني
تجمعات تصير امامي بقصد اغاظتي
دي تطنشني و دي تحاول تغيظني و دي فرحانة باللي يصير فية
اي جو عائلي بس؟؟؟؟

انا الان حامل في الشهر السابع
قاعدة اعمل توزيعات الولادة حقة المستشفى بنفسي
اشتريتها و اشتريت الشرايط و الورق و الحلويات و الكروت كلها رح اجمعها بنفسي
نفسي لو كان عندي اخوات يشاركوني
نقعد انا وهمة عالارض و نفرد الاشياء و نلفها مع بعض
انا اللي رح اولد
و انا اللي اعبي توزيعاتي
محد يشاركني
لو جيت فتحت سيرة التوزيعات عند اهلي تظهر عليهم علامات الملل و الانتقاد و الاستخفاف بإهتماماتي
حاسة اني مقطوعة من شجرة
مالي اهل
مالي احد
محد يسال عني
و لا احد يدور عليا
شخصيتي الناقصة و المتهززة اعجزتني ان اكون علاقات
قلة ثقة
قلة شخصية
احيانا اشعر بالفصام


انا عارفة اني طولت عليكم
حسيت كلام كتييييييييييييييييييير ابغى اقوله في قلبي
لكن لو ابغى اختصر كلامي في كلمة واحدة رح اقول
(( انا و حيييييييييييييييييييييييييييييييييييييييييييييييييييييييييييييييييييدة)

رجاء ردوا على موضوعي لو عندكم حل... و اذا ما عندكم ارجووووووووووووووووكم ادعولي ارجوووووووووووووووووووكم
حتى لو في ظهر الغيب

قولولي كيف المفروض تكون شخصيتي و كيف اتعامل مع الناس اللي مستهونين بية و مستخفين بية و خاصة انه زيارتي لهم صارت بالغصب لانه خالاتي همة نفسهم خالات زوجي
فلما زوجي يروح لازم انا اروح معاه
كيف اخللي لنفسي تقدير عندهم؟؟؟
كيف افرض عليهم يحترموني و يحسبولي حساب؟؟؟


قد يكون هناك فضفضة(2) الجزء الثاني
اتمنى تتابعوني و ما تتركوني
حتى لو لله بس