مجروحة من صديقتي .. وماني قادرة ارجع معاها مثل أول ..

السلام عليكم ورحمة الله وبركاته ..
باختصار أنا عندي صديقة مقربة مني جدا وأزورها وتزورني دايما لدرجة تتصل علي أحيانا وهي في الطريق وقول لي : سوي الشاهي أنا جاية ...
صديقتي هذي مرضت قبل فترة مرضة جامدة وطول مرضها .. والحمد لله وقفت معها في فترة مرضها وكنت معاها في البيت وفي المستشفى اصبرها وادعي لها لين الحمد لله تجاوزت المرحلة هذي وصارت تقريبا طيبة ..
المهم انها حبت تغير جو بعد المرض وأخذت استراحة وطلعت فيها هي واهلها وقرايبها وصديقتها الثانية وأنا ماجابت لي خبر الا اليوم الثاني بعد الطلعة !!!:confused: اتصلت علي وتسولف وتضحك وتحكيني عن المواقف اللي صارت وتقول شفت فلانة ايش سوت ( صديقتها ) كذا بكل بساطة .:frown:.. انا انصدمت وسكت قالت لي ايش فيك ؟ قلت لا بس تعبانة وبصراحة حز الموقف في خاطري وعزت عليا نفسي عشان كذا ما عاتبتها .. وبعدها بشوي اتصلت علي وطلبت ان احنا نطلع سوى للحديقة لكن انا رفضت وقلت لها اني تعبانة وما اقدر اروح ..
وبعدها صارت كل شوي تتصل وترسل على الواتس تسأل ليش انا متغيرة معاها وليش ما اتصل فيها مثل قبل ؟
للتوضيح العزيمة بحد ذاتها ماتهمني ولا كنت بروح لأن زوجي مايخليني اروح استراحات وكذا الا عند ناس هو يعرفهم .. لكن كان ودي انها كلمتني مو تسحب علي كذا !!!
المهم انا الحين احس انه صار فيه حاجز في نفسي وقلبي ماهو صافي من ناحيتها مثل قبل وهذا اللي مضايقني لأني اعزها حيل وهي دايما تقول انها تعزني وتعتبرني واحدة من اهلها ودايما تقول عمري ما انسى لك وقفتك معاي .. لكن ليش سوت كذا ماني عارفة !!
طيب الحين ايش التصرف الصحيح اللي اسويه ؟؟ فكرت اسوي نفس حركتها عشان ارتاح .. ايش رايكم ؟؟
للتوضيح : صديقتها الثانية اللي عزمتها تغار مني وماتحب اني اجي عندها وصديقتي بنفسها هي اللي قالت لي هذا الكلام من زمان ، فاحتمال انها ماعزمتني عشان ترضيها !!! وهذا اللي حاز بنفسي ...