صباح الخير يا بنات.

إي هيك ، خلو المجلس يتحرك شوي و نبعد عن موود الكآبة اللي نازل على الكل.

عاشقة : مبروك على علامات سوس الFull mark ، و الله التفوق حلو ، مع إنه عمر لساه بKG2 بس طار عقلي بشهادته لما شفتها كلها علامات كاملة و ملاحظات المعلمات عنه كلها مدح .
بحسي تعبك مع الأولاد ما راح على الفاضي ، بس إن شاء الله يتوفقوا بحياتن بعدين لإنه الظروف كل مالها لأصعب.
و الله الإجازة كمان هم تاني ، الهدايا و الأسواق و الشناتي و يمكن لإني أهلي معي ما بتشوق أبدا للإجازة و خصوصي هالسنة ، يعني ما رح نقدر لا نطلع مشاوير و لا نروح و لا نجي ، الله يعين.

ساجدة : كيفك حبيبتي ، وكيف قمراتك ، الله يخليلك ياهن ، يالله تحملي فترة صغيرة ، و بس يكبروا شوي بيصيروا يلعبوا مع بعض و يلتهوا عنك ، أنا بلأول كنت نفس حالتك ، كل شوي بكا ، بس هلق شوفيهم ما بيقدروا بلا بعض .

آية : شو أخبارك و كيف قطاقيطك، إن شاء الله تشوفيهم صبايا و تفرحي فيهم . صحيح شو صار منشان مدرسة بنوتك ؟ قررتوا و لا لاء ؟

سر الورود : بالأول ما عرفت إنو عم تقصديني لما قلتي ( شامو ) ، تعودت البنات ينادولي ميس ، و يا ستي أنا من حلب و درست هون إعدادي و ثانوي و جامعة كمان ( درست كومبيوتر بجامعة عجمان ) ، متزوجة من 7 سنين و شوي و عندي ( عمر و علي ) .
و بالنسبة للهوايات و القراءة ، تعرفت من المنتدى على هواية حلوة كتير و دخلت مزاجي و هي خياطة اللحف ( Quilting) عن طرق ترقيع الأقمشة و رح تلاقي موضوع عنها كتير حلو بقسم الأشغال اليدوية و حاليا كل الكتب اللي عم بقراها عم تحكي عن هالموضوع ، و الشي التاني علي تكميل كذا ختمة قراآن من عزاء بنت حماي لإنو كانوا الناس يبلشوا قراءة و ما يكملوا ، و باقي العائلة أغلبهم مشغوليين كتير فتبرعت أنا أخلصهم ( بيني و بينك حاسة حال تورطت لإنو الشيطان شاطر ، كل ما بمسك المصحف بيطلع ببالي شي مية شغلة إعملها ).

مزون : الله يبارك بعمرك حبيبتي و عقبال عند إبنك إن شاء الله تفرحي فيه و بشهاداته و عقبال قيامك بالسلامة و نشوف معك أحلى عروس ، و منشان المشاوير أنا مو كتير أكلانة هم ، لإنه دغري سجلتهم بحضانة بتعمل أنشطة صيفية و و بيرجعوا ع البيت الساعة 3 و يادوب بين غداء و تلفزيون و حمام و شوية لعب بيصير وقت النوم .
بس عمر عم بينق بأبوه بدو يتسجل بنادي لتعليم الكاراتيه ، و يمكن يسجله مع إني مو كتير حابة ( نحنا بلا كاراتيه مو مخلصين من لعب الصبيان المتوحش ) بشتهي مرة لاقيهن عم يلعبوا بش غير الوحوش و سبايدرمان و سلاحف النينجا ، الله يعينا على هل كم سنة.
بالنسبة لقصة ابنك ، ديري بالك و أنا بعرف شعورك لإنو مرة كنا بالحديقة مع أهلي و مجموعة كبيرة من الأصدقاء و كانوا الأولاد جنبي و فجأة شفت علي شايله واحد و ماشي فيه و نازل فيه تبويس و ما بعرف كيف ركضت و لا طرت لعنده و أخذته من إيده و اتفاجأت إنه مراهق ، يعني شي 17 - 18 سنة مو أكتر ، و الله كل ما بتذكر الموقف بحس دمي فار.

هنودة : كيفك يا قمر و كيف الماما ، إن شاء الله ارتاحت من السفرة .
الله يعينا على هاصيفية ، باينتها جهنم من أولها ، و الواحد إذا طلع شي نص ساعة من بيته بيرجع حيله مهدود من الشوب و ماله قدرة يعمل شي .

ولي ؟؟؟؟؟؟؟؟؟؟؟

أنا كتبت كل هاد ؟؟؟؟

معليش يا بنات ، دخيلكن لا تواخذوني ، بس الظاهر صاير عندي فائض بالحكي و ما لقيت محل فضي غير هون ؟؟

بنات سمعوا هالقصة الحلوة.

يروى : أن الامام أحمد بن حنبل .. بلغه أن أحد تلامذته يقوم الليل كل ليلة ويختم القرآن الكريم كاملا حتى الفجر .... ثم بعدها يصلى الفجر

فأراد الامام أن يعلمه كيفية تدبر القرآن فأتى اليه وقال : بلغنى عنك أنك تفعل كذا وكذا ...
فقال : نعم يا امام
قال له : اذن اذهب اليوم وقم الليل كما كنت تفعل ولكن اقرأ القرآن
وكأنك تقرأه علي .. أي كأننى أراقب قراءتك ... ثم أبلغنى غدا
فأتى اليه التلميذ فى اليوم التالى وسأله الامام فأجاب:
لم أقرأ سوى عشرة أجزاء
فقال له الامام : اذن اذهب اليوم واقرأ القرآن وكأنك تقرأه على
رسول الله صلى الله عليه وسلم
فذهب ثم جاء الى الامام فى اليوم التالى وقال
لم أكمل
حتى جزء عم كاملا
فقال له الامام : اذن اذهب اليوم .. وكأنك تقرأ القرآن الكريم على الله عز وجل
فدهش التلميذ ... ثم ذهب..
وفى اليوم التالى ... جاء التلميذ دامعا عليه آثار السهاد الشديد
فسأله الامام : كيف فعلت يا ولدى ؟
فأجاب التلميذ باكيا : يا امام ...والله لم أكمل الفاتحة طوال الليل !!!!!!
يقول الله عز وجل فى حديث قدسى شريف
يا عبادي ان كنتم تعتقدون أنى لا أراكم
فذاك نقص فى ايمانكم
وان كنتم تعتقدون أنى أراكم
فلم جعلتمونى أهون الناظرين اليكم؟!!!

ميس حبيبتي يسلمو ايديك على هالقصة الحلوة...............وبالنسبة للحكي خدي راحتك وفضفضي...............اما المدرسة اي قررنا على مدرسة اسمها الزهور ......... وهالشويات شي مو معقول..........هنودة الله يخليلي ياك انت وامك وخليها تدعيلي الله يوفقك..........مزون والله معك حق شي بيوقف القلب الله يخليلك ياه يارب وتفرحي فيه وباخواتو.............سر الورود والله سؤالك محرج لانو من يوم اتجوزت طارت كل الهوايات وبلش الكسل ...............

مرحبا حبوبات :26: :26: :26: :26:

الله بيعلم بكبر شوقي الكم هالـــــــــــــــــــــــــــــــــــــــقد هههههههههه
انا كتير منيحه والحمدلله
بشهر حزيران في معرض بنعرض فيه كل اللي اشتغلناه بكورس التطريز بقا عليي شغل كتير ان شاء الله اقدر لحقه

بالنسبه لعطلة الصيف اقامتي التركيه بتخلص بنص شهر آب بقا ان شاء الله يجددولي اياها قبل بوقت والا بدي ضل علقانه لتتجدد بموعدها وبكون راح عليي الصيف والاعراس والمناسبات
والله يكتب الخير للجميع

تبقا ضلو تذكرو ان في الكم اخت بتحبكم من كل قلبها اسمها بطه :)