صباحوووووو بنات .. كيفكن حبيباتي
اليوم حاسه حالي كتير متنشطة و الحمدلله الجو اليوم كتير رايق الله يديمه على هالحال والله طق قلبي من الشوب !!

دانية تسلمي لقلبي شو حبابه وظريفه .. الله يحميك ويهنيك
لأه لا تخافي إنشالله ربي رح يبعتلك كنة مافي أحسن منا وإنشالله ربي يحميلك ياه ويهنيك بشوفته بأحسن الأحوال .. وتأكدي إذا إنتي حبيتيها هي كمان رح تحبك من قلبها وإنت ما شالله باينتك حبابه بقى كيف ما بدها تحبك .. إيه لأه بدها تحبك وتحطك جواة عيونها إنشالله

سرالورود .. أهلين يا حبابه .. تسلملي هالطلة إنشالله
إيه هيك بدنا ياك دائما تطلي علينا .. بتعرفي ؟!! أنا كتير بحب اسمك بحس حالي بالربيع .. ماشالله عليك
المهم إنت كيفك وكيف صاير الجو عندكن .. إنشالله هلأ كل شي تمام

يلا طولت عليكن حاجتي لعي من عند الصبح
سلالالالالالالالالالام

السلام عليكم :
دانية كيفك ياأمورة ، والله قصة حياتك رتمها سريع ، بصراحة معك حق ، يعني الحمل المتكرر
وإنت لساتك صغيرة ، وفوقها غربة الله يصبرك ويهديلك بالك ويسعدك دنيا وآخرة ، يللا بكرة
بتربيون مع بعض ، وبتفضي لحالك بس يوعو شوي وبتقدري تكملي دراسة وعمل وبتكوني
أمنت على شغلة الولاد ، وأنت لسا بالعشرين وهاي ميزة ربنا حباك إياها بس اعرفي كيف
تستفيدى من الموقف لصلالحك ، يعني شغلة ستتين تلاتة وبتنطلقي بالحياة وبتحققي يلي بدك إياه
المهم ما ضيعي وقتك بالتفكير السلبي وما تهدري طاقتك بالتحسر على ما فاتك ، استثمر تفكيرك
بالتخطيط لمستقبلك ، وبالنسبة للغربة مسألة وقت إلا ما يجي يوم وتشوفي أهلك وأن شاء الله
يكون قريب ، على فكرة أنا ما بعرف شو أقصى احلامك بس الي متأكدة منه إنوأكيد قابلة للتحقيق

هنودة : تسلميلي على هاللسان إلي عم بنقط عسل ، الله يخليلنا إياك بس عندي سؤال إنت بمصر
ولا أمك مصرية ولا شو القصة بالضبط ليش مصر ريحانتك ، باينتك بتحبي الطبيعة وروحك روح
فنان أو شاعر هيك حسيت .

سلام للبنات الباقيين ولكل الأعضاوات

اهلين سر الورود شكلنا سوا عالخط انا زعلانة منك هيك بتجي لجنبي وما بتزوريني عالقليل قوليلي كنت انزلتلك عالسوق شفت البناية الخضرا العااااااااااااااااااالية انا هنيك بيتي

أهلين بالصبايا
سر الورود يسلملي عمرك شو مذوقه .. الله يجبر بخاطرك
إي حبيبتي أنا متغربه بمصر مع أهلي وصرلي هلأ شي 8 سنين .. ودارسه هون جامعه( ليسانس لغة عربية ودراسات إسلامية) وعم اشتغل وكتير مبسوطه الحمدلله بشغلي ،، وإلي رفقات مصريات كتير أوادم وحبابات.. لهيك كتبت

(مصر ريحانتي ،، والشام نرجستي):26:

بس أنا شاميه بنت شامي من الميدان وأمي تقبر قلبي شاميه بس أمها تركيه .. يعني تيته أم أمي من تركيا بس عاشت بالشام وبتحكي شامي بس كل سنتين بتروح زياره عتركيا .. يلا هي كتبتلك قصة حياتي!! إنشالله ماكون تبايخت وكترت حكي..:42:

شو يا بنات مالي شايفه حدا فات اليوم إنشالله خير !!

اهلين صبايا ,,,
نحن كان عنا متل ما بتعرفو عطلة سبت وأحد بقى ما فيني اعقد كتير وعم اتعب كماااان
شو أخباركن ؟؟؟
تسلمي يا سر الورود والله كللك ذوووق وعقبالك ,,, وحكياتك لدانية كتير عجبوني كتري منهن شوي ،،،
دانية عزيزتي أنا متلك صار فيني اجتني يللي بنعرفها كلنا مرة وحدة بعد النفاس بشهر وبسسسسسسسسس وبعدين حبلت بس أول تحليل عملتو طلع سلبي فقالتلي دكتورتي يمكن لأنك عم ترضعي تلخبطت معك وبعدين بلش التعب وأنا قول يمكن لأني عم اصحى بالليل ويمكن ويمكن هيك ,,,,,,, بعدين حللت مرة تانية بس بعد شي أكتر من شهر ونص من التحليل الأول ولهيك الدكتورة قالتلي رح نعملك ألترا ساوند لنشوف ايمتى موعد ولادتك المتوقع وطلع بـ 24 ديسمبر2007 والله أعلم وع فكرة أنا ولدت شام بـ 2 ديسمبر 2006 خخخخخخخخخخخخخ سبحان الله يعني الفرق بينهن بالضبط شي سنة بإذن الله وهي أنا كمان حكيت قصة حياتي :)

هنودة إن شاء الله دوم مروقة ومبسوطة والله يهنيكي ع طول

ميس خبرينا ضبطت خطتك ولا لسة أنا كتير انبسطتلك والله يتمملك يا رب

آية كيف البنات الله يحميهن ؟؟ وكيف الشوبات بالشارقة ؟؟؟

ساجدة الله ينولك يللي في بالك وطمنينا عن بنوتاتك الحلوات الله يحميهن

وهيلين ما أحلى طلتك كتير بنبسط بحكياتك الله هيك يجمعنا فيكن وانا متل ساجدة بحبك في الله كتير وايمتى نازلة ع الشام؟؟؟؟؟

وين باقي الصبايا طمنونا عنكن ولا تنسونا من دعواتكن يا حلوات ,,,,

نداء إلى شام الغالية طمنينا عنك يا حلوة اشتقنالك وافتقدناك ,,,