سلاماات للجميع....راجعتلكن أطمن عالجميع بس حاليا أجاني هالايميل و حبيت أكتبلكم ياه خليكم تضحكوا شوي

القاموس الشامي الجديد

تحديث لمفردات القاموس الشامي ومع أنه بسيط إلا أننا أضفنا في شهر أكثر مما يضيفه "المورد" في سنة

شاضومة
تعبير مؤنث لا مذكر له يفيد كون المرأة غير مرتبة وليست من الأكابر وتحب الكلام غير المنمق وكثرته

· شرنه

(إنظر الشرح في تفسير مصطلح شاضومه )


ملحو على ديلو
يعني لا يقيم وزناً للعشرة والخبز والملح


يلي ببلي بالك
كناية عن أمر يتعذر ذكره


معصمص

نحيل بارز العظام صغيرها


يا إيدكم!
تعبير عن الهرب من شيء ما بسرعة


زمق
أي هرب ببراعة وحذق، وزمط شرحو


سرّي مرّي
أي جيئة وذهاباً بشكل متكرر إلى حد الغلاظة وتتبعها أحياناً أو تنوب عنها (خدني جيتك) و(كيلي ميلي)


حط بالخرج
أي لا تعبأ بما يقال


على قفا مين يشيل
كناية عن كثرة الشيء وشيوعه و(قابر القنى) مثلها


مأنّف
يعني لا يعجبه العجب ولا الصيام برجب


فش نيعو
يعني انتقم منه شر انتقام وهي بالحلبي: يفشر حنكو


أزّت نفسو

أي نفر من الشيء نفوراً كأنه رأى صرصوراً

جفص
صفة للجلف غليظ الروح


حنتر
أي "تيّس" و"بوزم" في الوقت نفسه


طلع من عيونو عامص

يعني دفع ثمناً غالياً وندم على ما نال


كل طلقة براحة
أي يقوم بالشيء رويداً رويداً بين الفينة والأخرى


يلي بدو يموت يوصّيك بولادو
ذم بصيغة المدح يعني أن المذكور غير أهل لحمل المسؤولية


على كراريت حلقو
يعني مصاب بغثيان شديد وإقياء لا يستطيع كبحه لا بحلال ولا بحرام

لا تكرّك عليه

يعني لا تلح عليه إصراراً


قلبه عميقول حق بق (كما قلنا أن القاف تقرأ ء)
يعني أنه يريد أمراً بشدّة لكنه يضمره إضماراً ولا يظهره إظهاراً ( مشان ما يزعل سيبويه)


لحم السير عالقبقاب وصاروا المبغضين صحاب
مبينه وما بدها شرح


يلي بيجي منمدلّه فرشة ويلي ما بيجي منرتاح من وشه
مثل نسائي بحت يفيد عدم الترحيب بأشخاص معينين ما عم يجوا أصلاً


شو هالتجرة
يعني الأفندي ما عجبته هالحكاية كلها وحاسس إنو تعبو ذهب سدى أو أدراج الرياح (كمان مشان سيبويه الله يرحموا)


وحياة خالقك ماني مفارقك
تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس بدي دايئك


العين الطرّاءة
عبارة عن التمسخر على المتكلم عنه وأن لا شيء فيه بينحسد عليه

بيقطش وبيلحش
يعني المهذار كثير الهفوات ومن يهرف بما لا يعرف ولسانه يسبق عقله


ولي على كسرتو
تعبير يفيد التحسّر على شخص ما مع لومه على ما فعل (في تناقض، مهيك؟)

كـــــــن
بكسر الكاف وتسكين النون يعني اهدأ أحسنلك

كروج

يعني درمل، وبتعبير أفصح افرنقع من هنا، وادحال مثلها

فــز
كمان بكسر الفاء يعني قوم (أوقف وانت بتكلمني)

جماش
أي همجٌ رعاع مستجحشون


مصطهج
يعني مسلطن، مكيّف، مبسوط أو كما قال سيبويه: منتشي


أفّّعت معو
يعني حمل القشة التي قصمت ظهر البعير وبلغ السيل الذبى


مو نفعان لا للخل ولا للخردل
يعني بلا فائدة تذكر، وأحياناً بقولو من نافع لألله بنافعة

لاطيلو
يعني كمن له منتظراً ومنها المتل القائل: "قلّو لاطيلك قلّو صاحيلك" يعني هدول تنين ناويين عالشر لبعض وكل واحد منتبه للتاني بس بدون كبريته ليشعلو

ادفشو وشوف ما أجحشو
يعني بالإنكليزي: Fools rush in where angels fear to tread


نازل عالمدينة (أو رايح عالشام)
يعني رايح عالسوق التحتاني، i.e. going downtow

سبرتاكو
القطعة الصغيرة التي تكون مسمّرة في كعب الكندرة النسائية من الأسفل (وبتطلع عند أول لبسة بالكنادر الوطنية)


قراضة
يعني نوع عاشر، شي تعبان بنوب (متل الكنادر المذكورة آنفاً والمسمّاة عند البعض: بضاعة لا حول)

يلي ببالك منو
كناية عن أمر يتعذّر ذكره لأسباب عديدة

انطمز
أي انزعج وبوزم وقلب خلقتو وما عاد يتحاكا

دواليب الجنة

مصطلح جديد للفلافل ومحاولة لرفع شأن هذه الأكلة الشعبية

عليّي ما عليّي
قسم يريد به المتكلم أن يحلف بالطلاق ولكن سمع أنو هذا لا يجوز فبطلها واستعاض عنها بهذه العبارة.

طرفنده
تعبير مؤنث يدل على أنه شيء جميل جداً ومميز


جميع حقوق الغسيل والنشر محفوظة

اهلين بأحلى بنات
هنودة أنا هلأ بالشهر السادس ،، الله يهونها علينا،، وإن شاء الله مديرك يوافق وتروءي بين الأهل والأحباب
فتاة حبيبتي الله يقويكي يا رب ،، ويعينك ويفتح عليكي ،، ومتل ما قالت شام بالفعل أنتي أهم شي ،، هي حكمة يللي قالتها مو شلون ما كان
ساجدة الحمد لله ع سلامتك والله كتييييييييييييير اشتقنالك خير خير طمنينا شو صار ؟؟؟؟؟ الله ييسرلك
نايس سميل يسلمو كتير كتير حلو عن جد في شغلات ما بعرفها منه :)
سما إيجيبت خير عزيزتي ليش نفيستك مو مرتاحة :؟؟؟ هداك اليوم عملت تبولة وتذكرتك كتير ههههههههه طمنينا عنك ،، والله مشتهية جيب لبنتي كريجة عم تهلكني الله يحميها طول الوقت عم تحوص وتتطروء من قرنة لقرنة خوش البيوت علب كبريت ما شاء الله هون ،،
لوليا وينك طمنينا عنك ,,,؟؟؟
بطة ما عادت بينت كمااان
دانية حبيبتي والله كلنا بهالغربة عم نتعذب شو بدنا نعمل الله يقوينا أحسن شي وييسرلك ،، لايكون لأنه مو مطهر لابنك هيك عم يصير معه أنا ما عندي خبرة بس الله يعافيه يا رب وطمنينا عنه بعد الطهور ورح نعملك حفلة كماااان وإن شاء الله كل سنة بتعيدي انتي وزوجك ،، ولا تقلقي يا حلوة الحياة صعبة وين ما كان ,,,
عروس الشام والله أنا هيك مرات بيصير معي لا تنظيم ولا شي الله يهدينا ،، بس أنا حسب تجربتي أهم شي وقت الفجر قبل وبعد هو الوقت الوحيد يللي من غير شر سهل إنك تتعبدي وتقرئي وتصلي ،، يعني قبل السحور صليلك كم ركعة وادعيلك كم دعوة وبعدين لما يأذن الفجر فيكي تضلي عم تقرئي وتذكري لتطلع الشمس بتصلي ركعتين وبعدين بتنامي ليصحى ابنك من غير شر ,, ويللي عندو أفكار تانية يا ريت ,,
آية يا حلوة شو أخبارك وكيف البنات الله يحميهن ,,؟؟

باقي الصبايا لا تواخذوني إذا نسيت حدا ولا تنسونا من دعائكن ,,, والله ييسرلكن جميعاً ,,,
سلام

هنودة.. اشتقتلك عن جد يا ضرسانة... لك ان شاء الله الهي مديرك بيوافق و بتتهني بهالاجازة على كيف كيفك :) ديري بالك على حالك و لا توفري بسط بنوب لاحقة على الهم و التعتير.. طول ما انك ببيت أهلك انبسطي و اضحكي.. القهرمة جاية جاية.. هاها..


تسلمي يا مشرفتنا الغالية و هي حطيتلك صورة المراكب بمغارة موسى.. بس بيني و بينك و ما تقولي لحدا :) المغارة مو هالقد.. انو كنت مفكرة حشوف شي على مستوى جعيتا.. يعني مغارة بس تفوتيها تقولي ضغري سبحان الخلاق... بس مغارة موسى أكتر من عادية و الحفر على الجدران حديث و ليس أثري.. و بالنسبة للقوارب فالمكان به نبع مياه بس ما في نهر فشو عملوا الأذكياء؟ في مكان منخفض بالمغارة أكتر من غيره, وصلوا له ماء النبع بس بما انه لا يوجد مكان لتخرج منه المياه أصبحت المياه راكدة و مليئة بالتراب مثل مو شايفة بالصورة.. و مو حلوة الركبة بالمركب منوب, لأنك ما حتشوفي شي عليه القيمة... بس يللا ماشي الحال, مغارة نحكي فيها قدام الناس.. ما حدا أحسن من حدا.. :)



لك دانية الله يوفقك و يهنيك يا رب و يخلصك من الصين .. طولي بالك .. و لا تخافي على ابنك ان شاء الله ما في شي.. عموماً ما بيطهروه ليفحصوه و اذا في شي بعيد الشر حيعالجوه بالأول... بس كتير تأخرتوا بطهور الصبي.. انتبهي خليهم يخدروه موضعي لأنه حرام حتيوجع كتير.. مو اكتشفت انهم ما بيخدروا الأطفال الولدانين جديد بس يطهروهم؟؟ لما دريت زحل عقلي و قلت لو كنت عرفانة ما كنت تركت ابني الا لما إتأكد انهم مخدرينه.. يا حرام عليهم... قال ما بيتذكر.. شو اذا ما بيتذكر ما بينوجع يعني؟

سوسو.. خير شو في؟؟ ليكون قصص بيت احما؟ عادي يا ستي هدا في منه كتير.. أنا تعلمت شلون طنش بمراقي و بس ارجع بقول لجوزي اتحملت كرمالك طول الصيف و اجى الوقت تعوضني.. و بتبلش الطلبات :) لازم تعرفي تستغلي كل شي لصالحك

أيوش.. الله يسلمك.. تعي بدي إسألك, كيف نضفتي آية؟؟ غسون جنني و ما كنت أعرف نضفه.. بالأحرى أنا كسلانة :)

سما... شفتي شلون الله عوضك و كنت مقهورة انك مو نازلة على الشام.. يا ستي عن جد أنا دائماً بقول قدر الله ما شاء فعل و بحس اني ارتحت لأن الله دائماً حكمته فوق حكمتنا نحن البشر..

فتاة.. إيه هاه.. هيك روحي على المول و ارتاحي.. عن جد قد ما كنت متضايقة بس اشتري شي شغلة بنبسط و بنسى :) خصوصاً لو زعلانة من جوزي بلاقي متعة غريبة بصرف مصاريه :)
و حاولي تهتمي بدراستك قد ما تقدري لأن حيجي يوم و تفيقي و تقولي عملت كل شي لجوزي و أولادي و أنا وين رحت؟؟ و جيبي لولادك شرايط فيديو افتح يا سمسم كتير منيح و بيعلم الفصحى.. و دائماً شغلي قرآن بالبيت, هيك بيتشربوا القرآن باللاوعي و شوي شوي بتلاقيهم عم يحفظوه.. أما البيت فدوري على شي وحدة تجي مرتين بالاسبوع و تساويه.. في شغلات أهم تركزي عليها بحياتك.. أو اذا أولادك كبار شوي عطي كل واحد مهمة.. واحد بيمسح الغبرة و واحد بيضب اللعب.. و هيك بتخلصي بسرعة.. ماما كانت موزعة علي أنا و أختي شغل البيت.. كل وحدة عليها مهمة.. و الله ساعة زمان و نكون مخلصين البيت و بما انه ساعدنا بالتنظيف منصير حريصين ما نوسخ و نروح تعبنا على الفاضي فبيضل البيت نظيف طول اليوم :)

تسلمي يا نور على النصيحة.. بس المشكلة اني برمضان بهلك طول النهار فما بعود على الفجر قدرانة أعمل شي.. يللا بحاول ان شاء الله.. و حدور على شي جدول يساعدني.. اذا لقيت بحطلكم ياه..
يللا ديروا بالكم على حالكم.. نراكم

مسا الخيرات ،،

فتاه حبيبتي إي هيك هه انبسطي وروقي ،، والله الدنيا ما بتسوى الله يروق بالك ويديمك معافيه

نايس سميل يبعتلك الهنا إنشالله والله ضحكتيني كتير بنبسط وقت بقرا هيك رسائل
يسلمووووو هالإيدين ياحق

نوارة حبيبتي ماشالله الله يكتبلك التمام علخير ويقويك ويجبر بخاطرك ويارب مديري يوافق حاكم عم قول إذا ما وافق بدي ضل بالشام غصب (يبعتلي الهنا شو قويه!!!)
بس إنشالله يوافق

عروس حبيبتي تشتقلك مكه والرسول ،، يسلملي عمرك شو مزوقه الله يجبر بخاطرك
ولا تخافي عليي مابظن في حدا متلي بالبسط والرواق آخده حقي وزيادة (مطبله بالأرض مزمره بالسما)!!
وعقولتك لاحقه عالهم والتعتير ،، الله يديم أهلي فوق راسي وما إعتاز لحدا منوب

مزون الهيئه رحتي عالشام وأنا مالي خبر ،، يلا إنشالله بتتهني بين أهلك وربي يجبرك ويرزقك ساعه مهونه ويفرحنا بقيامك سالمة يارب

يلا حبيباتي تصبحوا على خير ،، سلملم :)

سلاااااااااااااام لاحلى بنات الله لا يحرمنا هالجمعة انا بلشت دورة انكليزي هلا كل يوم 3 ساعات فيادوب ارجع اطبخ وساوي كم شغلة والمنتدى مدري شو قصتو احيانا ما عم يفتح معي والله ييسر اموري واموركن جميع

في امان الله