هلا بنوتات كيف همتكن مع رمضان ؟؟؟ معلش ع السريع ما فيني رد بالتفصيل وسلامي للكل
مشغول كتير بالي على هنودة عسى لخير غيابها

فتاة سورية
ما عندي خبرة بالمربيات بس رح أسألك مرة عم زوجي دائما بتعمل وبتبعتلي هي عايشة هون بس لازم يكون عندك (( كلس )) حتى يؤرش المعقود خيتو :)

رانيا ( سبانيش )
عزيزتي فتة الزيت كتير أخف من فتة السمنة ( البدوة ) بس لازم يكون عندك زيت زيتون أصلي وإلا ما بتنجح الفتة إلا إذا عندك مادة اسمها ( إيلي ) هي خصوصا لفتة الزيت حتى يفقس الزيت ما بعرف إذا رح تفهمي عليي ،، على كل حال طريقته بتسلقي حمص وبتفتي الخبز وبتضيفي حبات الحمص للخبز بدون مرقة وبعدين بتخلطي الزيت مع مرقة الحمص وبس تصير يختلط الزيت مع المرقة تماما ويصير لونها أبيض معناتها فقس الزيت وبتحطيهن على الخبزات وألف صحة ،، فيكي ترشي شوية كمون وفليفلة حمرا وبقدونس على الوجه وبالهنا والشفا إن شاء الله ،،
وإن شاء الله البنات يعطوك وصفات أدق مني لأني مو كتير خبرة ,,, ويمكن كون خبصت :)

لوليا
بيقولو شوربة السيليري مو لذيذة ما بعرف ليش ع كل حال أنا بقطعه وبحطه مع شوربة الخضرة كتير لذيذ ومفيد وكمان ممكن إذا عاملة معكرونة بالخضرة يكون من ضمنهن وكمان ممكن يتاكل طازج مع الـ dip متل ranch أو حسب الرغبة ,,, وهدا يللي عندي ،،،

مرحبا.. شو الأخبار؟
لوليا.. شكراً على السؤال :) ابني الحمد الله اليوم كتير أحسن.. بس مبارح غلالي قلبي, ما كانت تنزل حرارته و رجعت أخدته على الدكتور بنصاص الليالي.. بس الحمد الله مشي الحال و هلأ شحو قاعد جنبي و نازل مياعة و تبويس فيني.. ما أطيبه.. صاير عم يصلي معي و مع أبوه.. و الله مزبطها للصلاة, بعد ما أبوه يخلص قراية الفاتحة بيقول ابني آمين لحاله :) و بعدين بيسجد و بيقعد متل ما بيقعد أبوه للتشهد.. كيف بيزبط رجليه بالقعدة ما بعرف.. أنا لهلأ ما بعرف زبط رجلي بقعدة السجود !!.. و أحلى شي بيصير يحرك اصبعته و هو قاعد.. أبداً أبوه الخالق الناطق حتى بحركاته :)
عمر ابني سنتين و شهر هلأ.. الله يحميلي ياه..

و مشان الكرفس.. يا ستي أنا أبي بيحب الكرفس هيك بلا طبخ.. يعني بياكله متل الخيار مع العشاء.. و ماما أحياناً بس تعمل شوربة خضر بتقطع فيها كرفس.. يعني ممكن تقطعي كوسا و زهرة و جزر و بطاطا و كرفس و شو في عندك كمان خضرة و على النار بتسلقيهم.. ما في أسهل من هيك.. أسهل شوربة..
و إذا بدك هذا الموقع فيه كتير وصفات شوربة كرفس..
http://www.grouprecipes.com/s/celery-soup/recipe/1/relevancy

سبانيش فلور, متل ما قالت نور تسقية الزيت بدها شي خاص لتزبط الفقسة.. لأن معلومك الزيت و الماء لا يختلطان .. يعني لو حطيتي زيت فوق المي من اليوم لبكرة ما بيختلطوا.. بس في شغلة بيبيعوها بالشام بتحطيها عليهم فبيختلطوا و بيصير لونهم أبيض و بتصير طعمتهم بتجنن..
يا ستي انتي خليكي على تسقية السمنة.. أسهل شي و ما بدها تفكير..

دانية لك معقولة انتي عضوة بعالم حواء و ما بتاخدي وصفات من المنتدى؟؟ أنا كل كم يوم بجرب شي وصفة حلو.. أو فطاير أو عصير.. بس الطبخ الصراحة ما بحب غير الطبخ السوري مشان هيك ما بجرب طبخات تانية..
عموماً شو ما بدك طبخات اسألينا.. صحي أنا مو هالطباخة الفظيعة و ياما بتلاقيني على التلفون مع ماما عم اسألها عن شي وصفة.. بس ماشي الحال, بعد 3 سنين زواج صرت بعرف كتير طبخات الحمد الله..

نور و الله أنا متلك مشغول بالي على هنودة.. الهيئة توكلت على الله و عملت العملية و الله أعلم.. ما في حدا عنده رقمها بالشام؟؟ سوسو ما أخدتي رقمها؟
يللا ديروا بالكم على حالكم و الله ينولكم يللي ببالكم.. آمين

نور الدرب و عروس الشام
جازاكم الله خيرا
فهمت يفقس الزيت يا نور لاني عارفه ماده (الي) عندها في مصر اسمها بيكربوناتو (بيكربونات الصوديوم يعني) و بنحطها في الطعميه و احنا بنقليها
مشكورين يا بنات

هلا رانيا،، ما بعرف إذا نفس المادة ،، وع كل حال جربيها وإن شاء الله تنجح معك هي كتير أخف من فتة السمنة نحن بنسميها بدوة ،، وفي فتة اللبن كمان بالمرة رح أعطيكي طريقتها وكتير خفيفة ,,
بتخلطي الخبز مع حبات الحمص والمرق وبتكوني عاملة خلطة اللبن عبارة عن لبن = زبادي ومعها ملح وثوم بس وبتحطيهن على وجه الفتة وفي ناس بيحطو سمنة مع صنوبر على الوجه وبقدونس ورشة كمون وفلفل أحمر ،، وصحتين وهنا وإن شاء الله تكوني فهمتي عليي ،، لأن شرحي مو هالزود شكله,,

عروس الشام سلامات للحلو ابنك ونصيحتي توصي على أخ ولا تطولي لأن والله بكرى بيضيق خلقو ,, لحاله حرام ,,, والله ييسرلك ,,

يسلموا ايديك نور وعروس على شرح كطريقة التسقية لسبانش ..سامحيني سبانش ما عاد دخلت على النت

بس نحنا نور منحط سن توم مدقوق مع الفقسة يعني الزيت والمرقة ... بيعطيها نكهة طيبة

فص صغير توم مدقوق مع شوية ملح

وبالهنا والشفا يا رب