كيفكون بنات ان شاء الله بخير بس حبيت سلم عليكم واهلين باللي انضمو النا وبدنا ال سي في كالعادة هههههههههههه
يالله انا بدي روح مستعجلة
سلام

اهلين يا غاليات

سامحوني مستعجلة مدري شو صايرلي مرضانة مدري مكربة والله اعلم

صاير ما في حيل امشي وتعب قوي ورغبة في النوم ومهما نمت بضل نعسانة وطبعا رمضن ما فيك تنامي كتير

يمكن لأني ما عم آكل منيح عل ىالفطور وبتنسد قابليتي وبعدين ما بتسحر ؟؟؟

انا باكل كم تمرة وبشرب مي كتير لان مافي غيري بيتسحر بالبيت وانا ما برغب هيك لحالي آكل مع انو بالشام ماما الله يخليلنا ياها كانت ما تخلي شي من زمان تقلي هالنخاعات مع البيض والشوربة الحمرا والمعكرونة والبيض المقلي مع البندورة

يا عيني شي بيفتح القابلية

المهم نور وساجدة واللي طلب المايونيز

هي لعيونكم

جيبي بيضتين وافقسيهم وخدي البياض بس وحطي بالخلاط وقيمي الصفار على جنب ما بيلزم

هلأ شغلي الخلاط وغطي الإبريق منيح حاكم رح يطرش الدنيا

وبعد شي دقيتيتن حطي التوم المدقوق منيح منيح شي خمس سنان تقريبا وسط مو صغار فصعين متل تبع الشام (( أنا تعقدت من تفصيص التوم بالشام )) ههههه

وشغليه كمان لينخلطوا منيح بعدين جيبي عصير ليمونة وملعقة خل صغيرة خل أبيض وإذا ما في بلاه مو مشكلة حطيهم فوق هالبيض والتوم وكمان خليه عم يدور يعني افتحي الفتحة الفوقانية تبع الخلاط ونزلي الحمضات شوي شوي وغطيه بإيديك الجوانب مشان ما تتطرشي مو تقولي ولي على قامة هالوصفة اللي عطتنا ياها شام

ايوه

بعدين ابدي نزلي الزيت متل الخيط الرفيع لا تنزليهم بقوة بعدين بيفرط المايونيز

هو اصوله زيت قلي مازولا بس احيانا بحط زيت زيتون اكسترا لايت بيطلع منيح ومافيه طعمة قوية

يعني بيحتاجوا شي كاسة شاي ونص ...انت لما تنزلي الزيت شوي شوي حيتقل القوام وبعدين حتلاقيه وقفوا ما عاد برموا منيح وساعتها معناتها كلشي جاهز

صحيح لو عندي قلقل ابيض حطي رشة صغيرة كتير وهو عم يبرم

وخلص هي هي القصة

وطعمته كتييييييييير طيبة متل تبع فروج البروستيد تبع القصور بالشام

ايييييييييه تنذكر هديك الأيام

هلأ انا تعلمت شغلة من جديد أنو اخلط هالمايونيز مع الكتشب وحطه بالسندويشة تبع الشيش طاووق أو الفروج

يا لطيف شو طيبة ماعاد يتأل عليك المايونيز

يعني أنا بخلط شوي صغيرة على جنب وبترك الباقي

هي الكمية بتكفي يومين وبدك تغطيهم ببلاستيك بالبراد مشان يضلوا تازة وبضلوا اسبوع تقريبا

والف صحة وهنا

الشيش طاووق سهل
قطعي صدورة جاج مربعات صغيرة وبعدين انقعيهم شي ست ساعات على الأقل بهالخطلة

توم مدقوق شي 7 سنان كبار ركض
عصير ليمونة ونص
معلقة خل أبيض أو بلاها معلش
كم معلقة توميتو بيست
زيت بلدي
ملح بهار أوريغانو

وبعدين اشويهم بالفرن شي ساعة زمان أنا برد بحط فوقهم شوية زيت قلي مشان زوجي بحبها الأكلة مبلولة مو ناشفة

ونبارح دقناها يا لطيف شو طيبة
جبنا خبز صمون وحطيت الكتشب والمايونيز مع بعض وفوقها هالشيش طاووق والبطاطا وفوقهم مخلل بقى سيدي وشوفي الطعمة

وسامحوني لأن ي عم احكي عل ىالأكل وانا صايمة

فتاة أنا هيك صار معي
كنت منزلة معي مرطب جلدي ريحته حلوة كتييييييييير وجديد وغالي أول مرة بشتريه وبسخى على حالي هههه
نزلته معي بشنطة ايدي مشان لما بدي شوف اهلي تكون ريحتي حلوة قاموا كبولي ياه بلندن يبعتلهم حمى ان شاءا لله

قال كل عطر أو ساثل يعني بالشنطة لازم يكون مقداره قليل حتى يسمحو فيه وحطولي الباقي بكياس شفافة
وكبولي دوا الساسية تبع ابني اللي منحاتجه للنوم وقت الضرورة

نجاح ميت اهلا وسهلا فيك نورتي المنتدى

انا شامية متغربة بامريكا من 9 سنين وعندي 3 ولادي

ان شاء الله بتنبسطي معنا

عروس راجعلتك مشان تفصيلات البيوت

الله يسلم هالإيدين

هلا شام ...صحي انت كنت عم تسألي اذا كلياتنا منتلف بعد المغرب .. عن نفسي اي وكتيييييييير ..يعني بدون مبالغة من بعد الاذان لوقت يناموا الاولاد وابوهم هاي ساعات بعتبرها عذاااااااااااب في عذاااااب وما بصدق متى حط راسي على المخدة ونام... حتى الجمعة والسبت لان تاني يوم مافي مدرسة ما بستنى الاولاد يناموا بروح بنام قبلهم وبعد كام ساعة بقول شوف شو صار فيهم

وسلامتك شامو الف سلامة من الكريب والمرض

نور الدرب والله كنت ناوية اكتب اسأل عنك بس بينتي ما شاء الله عليكي ...كيف بنوتاتك وكيف الحمل ...الله يعينك ويقويك يارب .... ما قلتي لي شو عم تطعمي شام ....معتز صار له يومين مو على بعضه مرشح وما عم ياكل وخلاقه تعبانة كتير

الله يشفينا جميعا واولادنا وازواجنا ويحمينا من كل شر وكل سوء

هلأ عم اتفرج على باب الحارة و عم اضحك على معتز كيف ما عرف يسخن الأكل :) لك لو قلو أبوه يطبخ شو كان صار؟ كان وقع بأرضه يمكن.. هالرجال مو نفعانين..

ايه.. نجي للمهم...
هنودة كيفك يا قلبي؟ شلون جرحك؟ ان شاء الله عم يطيب بسرعة؟ و الله يشفيلك امك.. شبها من غير شر؟

أيوش شو أخبارك؟ ان شاء الله أحسن؟

سوسو شلون صارت بنتك؟؟ و تسلميلي يا حق.. بلا ما صدق حالي و بلش اصرع جوزي.. أنا من دون شي بقلو دائماً نيالك على مرتك :) لو بتلف الدنيا ما بتلاقي متلي.. ----> وحدة آخدة بحالها مقلب..
بعدين من وين لوين ست بيت.. خلينا ساكتين.. و الله ياما قاعدة عم ابكي لأني مو ملحقة و ابني عم يبكي و لسه ما طبخت.. بتصير بأحسن العائلات.. و أول ما اتجوزت, الله وكيلك ما بعرف اقلي بيضة.. بتذكر مرة جوزي اشتهى بيض مقلي.. قام فات على المطبخ و شافني واقفة بعيد و تاركة البيضة لحالها على النار.. قالي شبك؟ قلتله بخاف من السمنة.. بس تنقلى البيضة بطفي النار و بس تبرد السمنة بمسك المقلاية.. ضحك علي و أخد من المعلقة و قلاها لحاله.. شو كنت خويفة.. و ياما مطعميته المسكين رز مو مستوي, أو رز مخبص.. يا حرام شو آسى معي لبين ما زبط طبخي..
و مشان السكيب.. و الله من أول ما اتزوجت ما عدت أعرف شو أخباره.. ههه.. كنت استخدمه أيام الخطبة حاكم كان جوزي بالامارات و أنا هون و 24 ساعة قاعدين على النت عم نحكي..

شاي و مزاج, شو أخبارك؟

شامو عن جد هيئتك تعبانة.. يا بنت الحلال ليكها جاية الويك اند, ما تعملي شي.. خدي اجازة من كل شي.. جيبي أكل من برا.. المهم ارتاحيلك شوي.. صحتك بالدنيا. و يسلموا ايديك على المايونيز.. اشتهيت لاقي هون مايونيز بيفش القلب..
بس شو بتعملي بصفار البيض بعدين؟

بطة كيف الحمل معك؟

نجاح, يا مية أهلا و سهلا فيكي.. متل ما قالوا البنات.. السيفي أوام..

فتاة..ان شاء الله ما تكوني ضعتي على الطريق لمدرسة ابنك.. كيف كانت مسرحيته؟ ايمتى ابني حيكبر و روح على مدرسته احضر مسرحية.. أنا بموت بهيك قصص.. وقت ما يكون في أي نشاط بمدرسة أخي الصغير, بتلاقيني أول وحدة هنيك :)
و ان شاء الله بتنحل مشكلته و بتعرف على اولاد متل العالم.. انتبهي لرفقاته من هلأ.. نصيحة من وحدة ملدوعة.. انو أخي ما نتبهنا لرفقاته قام التم على شلة فسدانة.. و انتو عندكم الموضوع أكبر.. و كلها كم سنة و بيصيروا مراهقين و شغل بنات و دخان.. فانتبهي لرفقاته منيح..

دندون.. شو عم يجعك لسانك؟؟ ما حكيتي اليوم متل العادة؟

يللا ديروا بالكم على حالكم و آسفة اذا سقط حدا سهواً..
سلامات