تكرر الرد

كيفكون ياصبايا بتعرفو الساعة عندي 3ونص بالليل وما كان يجيني نوم:09: قلت لأجي شوف شو أخباركون

الساجدة لله الله يخليلك بنتك وإن شالله بتشوفيها عروس وعلى سيرة أعياد الميلاد فأنا من وقت كنت صغيرة وماما بتساويلنا أعياد ميلاد وبتعزملنا رفقاتنا وكانت تجي آنستنا بالمدرسة وتشرف عالبنات مشان ما يطوشو وهي يلي تنظم الحفلة بس من فترة سمعت أنو عيد الميلاد للأطفال مو كتير محبذ لأنو بينمي الأنانية وأنو لازم نحتفل بالولد بس بشغلات تانية متل أنو حفظ قرآن أو راح عالمدرسة يعني بشكل يكون فيه تحفيذ للولد مابعرف أنتو شو رأيكون
صحي نسيت قلكون فتحت على موقع الشيخ محمد سعيد رمضان البوطي وكان رأيو أنو عيد الميلاد للأطفال آثارو النفسية مو كتير منيحة ياريت كل وحدة تقلي رأيها بالموضوع

أنا عمري ضاع الله يعينك ويفرج عنك بس ياريت ماتتندمي كتير على مامضى لأنو ما بتحسني تغيري شي ولا تضلي عم تقولي عمري ضاع لأنو لساكي بأول عمرك بس إذا استمريتي بهالطريقة حتخسري الباقي فياريت تحاولي تحسني نفسيتك وتحاولي تنقذي ما يمكن أنقاذه واطلعي على وش ولادك بتنسي الدنيا وما فيها وهدول أطفال مو ذنبهون

المزة الله يخليلك ابنك ويسلمو شو أخبار الوزن تاريتك متلي والله أنا وزني في صعود مستمر وبفيق بالليل جاية عبالي آكل حلو ما بلاقي حالي إلا جايبة كيك أو شوكولا وعم آكل الله يسترني من هالعادة السيئة

هيلين بالنسبة للبيوت خليا لله لمانزلت عالشام حاولت كتير دور على بيت مناسب ومالقيت وهلأ بابا الله يخليلي ياه عم يدورلي بغيابي بس أنا سمعت ومابعرف إذا صحيح أنو البيوت حترخص لأنو بدون يخففو من شرى العراقية للعقارات بالشام وأنا وجوزي واقعين بين نارين خايفين نشتري وتروح ترخص ومنكون خسرنا فرصة نشتري بيت أحسن أو نستنى وتغلى ونصفى لا من هون ولامن هون أحسن شي الله يختار الخير

هنودة الحبوبة تسلميلي أنتي ودعواتك شو حلوة الله يرزقك يلي ببالك يارب

نور الدرب الحق معك أكل الشام على طول غير شكل ماما الله يخليلي ياها بتعطيني ملوخية بتكون مقليتها ومفرزتها بأكياس قماش مشان ما تتأكسد السمنة بالتفريز وبتطلع كتير ظريفة بس المشكلة وقت تخلص بصير بدي دبر حالي من هون صحي عنا ملوخية خضرا بس مو متل طعمة الشامية أبدا

مرحبا حبيباتي كيفكن
يا حبيبة قلبي مزون الله يروقلك بالك يا حق .. تسلميلي حبيبتي انتي الأحلى
كلامك مظبوط حبيبتي ميه بالمية بالنسبه لأعياد الميلاد والأحسن متل ماقلتي انها تكون حفلة لأنو حفظلو شي جزء أو سورة من القرآن وبظن مافي مانع انو ندمج الشغلتين ببعض
أنا بتذكر إنو الماما ربي يديمها فوق راسي كانت تعملنا حفلة صغيرة و تقلنا إنو يوم عيد ميلادنا نشوف قديش اتقدمنا عن السنة يلي قبلها مثلا بحفظ القرآن وهيك بذات الوقت بنفرح وننبسط ونحس بذات الوقت شلون مرت هالسنة علينا بطاعه ولا حيالله سنه ومرت
بقى مابعرف إذا كان رأيي مظبوط ولا شلون!!!
خبرونا يا بنات عن رأيكن الله يرضى عليكن
شو وينكن باقي البنات طمنونا عنكن بطه وآيه وفي كتير بنات ما عاد بينو
يلا الله يسمعنا عنكن كل الخير .. يلا حبيباتي مابدي طول عليكن بس حبيت سلم
الله معكن كلياتكن ومابدي شي منكن إلا الدعاء.

شو مشان صار الموضوع بالصفحة التانية وينكون صرلكون يومين مو مبينين اشتقنالكون تعالو طلو علينا

هنودة والله فكرتك حلوة وبهالطريقة منكون ربطنا بين عيد ميلاد الولد والشي المنيح يلي ساواه طول السنة الله يجزيكي الخير على هالفكرة الحلوة وياريت باقي البنت يعطونا رأيهون كمان

أهلا غالياتي

كيفكن شو اخباركن .....؟؟؟

البردات عنا شي على كيف كيفك يا نور خانم .؟؟؟؟ سبقنا القطب الشمالي من كم يوم

ولسا من 3 اسابيع لهلأ والتلج عم يندف والتلج القديم مكانك راوح

من كم يوم اضطريت روح واشتري غراض صار عندي قحط بالبيت الله وكليكم

فأنا ماشية بالسيارة التلج صاير متل الحجار وتسمعي صوت السيارة عم تعنعن وكأنها ماشية فوق حجار

الله يجيرنا
بس منظر التلج على الدفلات الصغار وهو عامل متل الحرام هيك متدلي ومدندش بياخد العقل
سبحان الخلاق

مشان عيد الميلاد نحن من وقت صغار كمان ما كنا نعمل
وأنا ما بعمل لولادي ..... وما بروح على عياد ميلاد إلا ما ندر .. يعني مو معقول ابعت ابني وبعدين قله ما بدي اعملك

بس أنا بجبلهم هدايا وبطير عقلهم وبجبلهم كيك مزين وبخليهم يطفوا الشمعة هي ولادية

بس بدون حفلة

فابني الكبير 7 سنين بلش يحس أنو لازم يعزم رفقاتو وكذا

فالصيفية الماضية قلتله انو إذا حفظت هالقد قرآن بعملك حفلة مطنطنة
وبالفعل حفظته بس عزبني كتير وبالنهاية حفظ شي تسع سور من جزء عم الصغار :( بس وبعدين قلت لرفيقتين عندي بحفظو ولادهم وقلتلهم كمان حفظوا ولادكم ومنعمللهم حفلة

المهم ..... عملتلهم تيجان حلوين وبياخدو العقل تاج للبنات لونه أحمر وتاج للصبيان لونه أصفر وحطيت عليهم للبنات هيك الماسات وكريستالات ملونين وطلعوا حلوين كتير وطريقتهم كتير سهلة

ولما بدي لبسهم التاج كل واحد صرنا نغني : تهانينا تهانينا يا فلان تهانينا ...... ونلبسه ياه وشوفي وشهم شلون يصير أحمر ويستحوا ...... الله يحميهم

وبعدين حضرتلهم كم لعبة

لعبة الميوزيك تشير وحطنالهم غنية أحلى حروف الكلام هي حروف كلمة ماما ...... كتير حلوة وسريعة

وبعدين لعبة الطابات بيحملوها بالمعلقة وبيمشوا والشاطر اللي بيوصل بدون ما توقع منه
والثالت هي كروت منخبيهم والاشطر اللي بلاقي أكتر عدد ممكن


والله طار مخهم

وجبتلهم هدايا كتير وحطيتهم يكيس المفاجآت وصرنا نسأل أسئلة واللي بجاوب صح منعطيه هدية
وربحنا كل واحد هديتين على الماشي

والله انبسطوا كتير وانا انبسطت لأني حسيت حالي انجزت

والبيت زينته واخترت الزينة السبورت يعني رسمة زرقة وعليها طابات وبيسبول وهيك حلوة

وبوالين وكذا .:..


وبعدين كنت محضرة عشا للكبار يلنجي وتبولة وحرة باصبعه يمكن وشاورما وشو كمان نسيت وجبنا بيتزا للولاد

تصدقو والله كتير كانت حلوة وذكراها لهأ ببالي

لأن حسيت فيها بركة ورضوان من رب العالمين ورجعتلي ذكريات الشام وحفلات الصيف اللي بتاخد العقل


كتبتلكم ياها هالفكرة بركي بتتشجعوا وبتساووها

ومشان غاليتنا أنا عمري ضاع أنا عم فكر باسم حلو الها بس والله مخي مقفل
شو رأيكم نحتارلها اسم حلو جماعيا


يلى بأمان الله