بسم الله الرحمن الرحيم
تربينا وتعودنا على كلامات وامثله وتصرفات وخرجنا من بيوت اهالينا واحنا مقتنعين فيها تمام القناعه ولمن انتقلنا لبيوت حمولتنا انجبرنا على اشياء ماكنا نرضى اننا نسويها وتنازلنا عن اشياء بعمرنا ما كنا نفكر انها ممكن تمشي علينا وعشان كا ننهار وتتعب نفسياتنا موضوعي هذا اهديه لكل امراءه تبي تكسب اهل زوجها بدووون مايكون فيه مذله لنفسها او هوان كيف تكسبين اهل زوجك وانتي بقمة شموخك وكبريائك المتواضع الكبرياء يكون بتواضع لما يكون اساسه الصح والثقه بالنفس ..
تعودنا على كلمة (التعامل بالمثل) ... صح حلوه هالعباره لماااا يكون التعامل حلو وطيب فجميل اننا نبادر بالمثل اللي يحسن لك مو من العقل ماتحسنين له اللي يعاملك بطيبه مو حلوه تقابلينه بشر وهذا من تمام العقل وسلامة الفطره
ولكن انا اتكلم عن لما يكون التعامل سيء و مش كويس هنا انتي قاعده ترتكبين غلط وتكبرينه والمفروض انك تعملين على تصغير فجوه الغلط بينك وبين الشخص اللي احدتمي معاه سواء كانت (ام زوج او اخت زوج او سلفه يعني اي احد من طرف اهل الزوج) بامكانك تصغرين الفجوه قبل تكبر وهذا من السنه قبل مايكون من الادب وحسن التربيه وحسن العشره مع هالناس عندما قال الرسول صلى الله عليه وسلم
(وقابل السيئه الحسنه تمحها)
ما اقول لما يغلط عليك احد روحي وطيبي خاطره لا
انا تعاملت مع اهل زوجي بفن واسلوب ابدا ماندمت عليه والان قاعده اجني ثمار اسلوبي اللي اتخذته منهج لي وراح اظل انصح فيه كل من احب
باول زواجي كنت القى اى من سلفتي زوجة اخو زوجي ومن اخت زوجي كانواا ساكنين بالبيت وانا بملحق جنبهم كنت احيانا اروح لهم والثنتين مقفلين عليهم بالمطبخ سواليف وضحك وانا بالصاله مع خالتي وعمي ابو زوجي ويطلعون من المطبخ ويروحون الملحق حق سلفتي وانا ما كاني موجوده
كانوا لما يخرجون من امامي ابتسم ابتسامه عريضه يعني اني انا احترم خصوصيتكم لو كان بينكم خصوصيات وايظا انا سعيده بالجلسه مع خالتي وعمي كانوا بناتي يطلعون يروحون لهم وينزلون عندي يبكون يقولون عمتي فلانه ضربتنا تقول روحوا لامكم كنت اخذ بناتي ولما تنزل شلون اسيطر على الموقف
ما اتكلم عليها ولا اخزها بعيوني اللي راح تسي لي امام خالتي وعمي فكنت اسيطر على الموقف عندما
00التزم الصمــــــــــــت00
وما ادراكم ما الصمت يعني اطنش واذا كلمتني ما كاني اسمعها منها تعرف اني زعلت وبنفس الوقت ما اكون تملسنت معاها واخذت انا الموقف اللي مو حلو والصمت والله العظيم دواء لكثيررر من مشاكل اهل الزوج لما يسيئون لك ويجون بيتك وتستقبلينهم
(((بابتسامه +رسميه)))
فهذي سيدة العلاقات ولن تندمي على السكوت ولن تندمي على رسميه العلاقه ماحييتي الكلام ممكن تندمين عليه وتقولين ياليتني ماتكلمت ياليتني ماقلت الكلمه الفلانيه بس لما تصمتين محد راح يحاسبك على صمتك ولاحد راح يحاسبك على علاقتك الرسميه
راح تظلين بنظرهم امراءه محترمه غير ملسونه والاهم غامضه والغموض هو اللي يجنن اهل الزوج ويخلونهم يحسون انك غير عنهم لا تفشين اسرارك ولا مشاكلك انتي وزوجك لاخت زوجك او امه او سلفتك حاري حذاري اعتقد هذا اكبر جرم وخطا ترتكبينه بحق نفسك عشان مثلكم عارف الايام تتقلب ويوم لك ويوم عليك وماتجي ساعه تكون حياتك او مصيرك بيد وحده منهم
ومهما حسيتي بنفور من اخوات الزوج وحسيتي ان الوق والادب والرابه ماتنفع معاهم ظلي على ما انتي عليه ولا تفتحين بينك وبينهم باب عداوه ابددد وبالمقابل احرصي ثم احرصي ثم احرصي على
((ابو زوجك وامه))
لو كسبتي هالشخصين اضمني انك بترتاحين وبتكسبين كثير وماراح يصدقون فيك كلمه وراح يظلون بصفك مهما حسيتي بجفاء من ام الزوج تراها واااالده وتموووون ووقت الشدايد مابيفزع لك الا هي لو احسنتي لها مهما شفتي منها مهما ذقتي منها المر اكسبيها ل كان زوجك زي العسل معاك ترى الرجل مثل الفاشه يتقلب وماله امان بس لو صار بينك وبينه شي وانتي مطينه العلاقه مع امه راحت حياتك بشربة مويه
وعلى العكس لو كسبتيها بتوقف بوجه ولدها عشانك
استغلي مناسبات مرض ام الزوج عشان تظهرين محبتك لها امامها وامام الجيران ترى ام الزوج تنبسط من مرة الولد اللي تمدحها قدام الناس يعني لو مثلا مرضت خالتك او صلحت عمليه وطلعت صلحي عصريه او عشاء مسكت للجيران وقولي هذا بمناسبة سلامة الغاليه ام الغالي فديتها امي الثانيه واهدي لها هديه وتعالي شوفي سحر هالحركه كيف تخلي خالتك تحط بعيونها وتمدحك بكل مكان وتصير تحارب بناتها عشانك
وانا مجربه وياما سويتها لخالتي وياما مدحتني وحطتني فوق راسها حتى بعد طلاقي تدعي لي ليك ونهار
وابو الزوج ترى الرجال بطبيعتهم طيبين وماهم مثل الحريم واااو من الحريم اللي يدققون بكل صغيره وكبيره وعيونهم عليك عشر اما الرجال ترى لو شاف منك موقف واحد يقتنع انك بنت حلال فما بالك لو تحترمينهم ولما يجيك تحبين يده وراسه وتزينين مكانه وترحبين فيه وتجيبين العود ودهن العود وتشقين وجهك من الضحكه ولما يجي بيخرج لو تطيحين عند رجله تطلبينه يتعشى معاكم او يتغدى او ينام وتحسسينه بحزنك انه ماظل معاكم والله ان عمي ابو زوجي يحبني زود عن بناته بسبب مثل تصرفاتي هذي اروح لهم ببيتهم ولما يكون بغرفته اروح له
عمي تحتاج شي تبي اغسلك ثوب تبي اكوي لك شي تبي ارتب غرفتك تبي ادهنك وتكلمي معاه بذرابه ولما تخلصين حبي على راسه واطلعي
اخوات الزوج وحريم اخوانه ((الابتسامه والرسميه )) وماراح يلقون عليك مجال ومدخل يدخلون عليك فيه
الجاي لربي لو واجهتي موقف صعب بس لا تتلاسنين مع احد ولاتغلطين على احد اكتمي القهر بقلبك وفوضيه لرب العالمين وايقني اذا تبين تعيشين وتبين الستر واهلك وخصوصا لو كنتي ماتقدرين ترجعين لاهلك انك لازم تقدمين تضحيات وتنازلات وحطي ببالك ان كل شي تسوينه احتسبيه عند الله واحتسبي الاجر من الله وفوضي امرك لله حاولي تصفين قلبك اول باول
واقتنعي ان الشي اللي تسوينه من باب الاحترام نعم الاحترام هو لما تحترمين نفسك قبل تحترمينهم والله والله اني عشت مع اهل زوجي 11 سنه والله ماتلاسنت مع وحده فيهم مع اني ذقت عندهم الضيم والظلم والظلايم وخرجت من بيتهم ماسمع مني احد كلمه مو زينه والله ان عمي ابو زوجي كان يعزم تقريبا بالشهر مرتين اذا مو ثلاث وان خالتي ترفض العزايم لانها تعبانه يجيبهم عمي عندي ويجون اهل زوجي واخواته وحريم اخوانه في العشاء بالمناكير والاستشوار والعطور واخر كشخه وانا احيانا بجلابيتي او قميصي يادوب ادخل البس اي شي كنت انقهر بس ابث همومي على سجادتي اخر الليل واطلب ربي النصر والراحه وجنيت ثمار تصرفاتي اتزوج زوجي عليه مرتين وقفوا اهله معاي واولهم ابوه وكان يقول لزوجي تبي ترضيني راضي خاطر فلانه يقصدني اذا رضيت رضيت ويروح لخالتي تقوله انا راضيه عنك اذا تعدلت مع مرتك وتقوله طلعها مشها ودها جبها همهم انا جاء الوقت اللي عرفوا فيه قيمتي وتطلقت ومايقطعوني وخالتي تدعي لي الليل والنهار لانهم ماسمعوا مني كلام شين ولا تملسنت مع احد ولاشافوا بوجهي تكشير ولا اسات لاحد كان ظلمهم نار تحرقني بس ربي يبرد ناري ويعوضني بالرضا والقناعه ان الحياه فانيه وزايله ماتستاهل اخذ ذنب احد او اخذ الردى وقلة الاصل
واسعد امراءه ممكن تعيش هي المراه اللي توصل علاقتها بربها على الوجه الاكمل مرت عليه ظروف ومشاكل ومصايب وكنت ابحث عن سببها مالقيت الا الذنوب هي الي تتسلط على صاحبها فتحرمه الراحه
واكثر مايكره اهل الزوج فيك لما يشوفونك تضربين عيالهم االي هم عيالك قدامهم او تنهرينهم وااااو ي ان هالحركه تقتل الود بقلوبهم عليك واقل كلمه ممكن يقولونها عنك((يهوديه ماعندها قلب ولارحمه))
سبحان الله يبغضونك فانتبهي من هالشي اتحملي عيالك الين تختلين فيهم ثم اتفاهمي معاهم
واهل الزوج يلتمسون راحة ولدهم معاك من لبسه ومن مظهره ومن صحته والله مهما حاولتي تغبين عن اهمالك او كسلك والله ان يعرفون ويفهمون فاحرصي على هندام زوجك وانه مايروح لهم جوعان ويقولون هي اللي اتطبخ هي اللي تنام وتترك زوجها هي المهمله حتى بخاطر ولدهم يعرفون انتي منكده عيشته والا مريحته الا اذا كان ولدهم سي خلق فهم اعرف به منك
لاتجين تقولين لاهلك اهل زوجي مايرحمونه او مبهذلينه او مايحترمونه انا مره قلت لاهلي كذا وندمت وعضيت اصابعي ندم لانهم ببرود قالوا لي ماراح ترحمينه ولاتحبينه اكثر من امه وابوه ماراح تكونين اخوف واحرص عليه من اهله
واحذري مع الزوج واهل الزوج تكثررررررين مدح الاهل المبااااااااااااااالغ فيه مثل بعض الحريم وخصوصا الرجال لو حب يرتاح منك فتره يسافر يتمشى يشم هوى لو كره مسؤليه الزواج وحب يريح عمره بيقول اهلها حلوين معاها وماراح يقصرون عليها ويصير يتركك عند اهلك بالشهوووور مايسال
لاتقولين كل شي طلقني على الي يسوى واللي مايسوى طلقني ولاتغترين بالاهل انهم طيبين ومافيه منهم وان كانوا كالك فترى واقع الحياه وواقع الطلاق غيررر عن كل كلام وراح تنصدمين من اهلك اشد صدمه
حطوا ببالكم كلمه كانت امي تقولها لي تقولي (ي فلانه ترى الاهل ماهم عزوه يبغونك ضيفه والا جنازه ومايطيقونك راجع يعني مطلقه وترى (الاخ صاحب ) ومابينفعك احد بالاخير الا نفسك وحكمتك لو حطيتي عقلك براسك )
يعني اخوك بيصاحبك على مصلحه على مصالح على اهداف بس ترى كلهم بكره بيتزوجون وتجلسين انتي تقابلين الجدران لحالك والام والاب ماهم دايمين اذا تزوجتي رجال ورزقك ربي منه بعيال فاصبررررررررري الرجال على قسوته لكنه بيتحمل عياله وبياخذ له زمن ثم يرجع لك نادم مهما طال الزمن بيرجع بيرجع بس الاخ لا تزوج عاش حياته والله مايطالع بوجهك الا من رحم ربي
لاتجلسين تقارنين حياتك بفلانه وعلانه ترى اكثر الحريم ماحطم نفسياتهم وبيوتهم الا حال فلانه احسن مني وش ميز هذيك عني لاتغرك المظاهر ترى البيوت اسراااااار ومحد يدري وش بين الحليلين الا رب العالمين هذيك اللي تجيك مكشخه ومفخخه مايخلى قلبها من هم اللي تشتكي خيانه واللي تشتكي اهمال وبرود مشاعر واللي تشتكي فقر والا تشتكي بخل واللي تشتكي سفريات زوجها واللي تشتكي من اهله وياكثر مشاكل البيوت وتبقى الذكيه اللي تداري على حياتها ومشاكلها وتبثها لربها بس وتشتغل على نفسها وتترك الناس بحالهم
تعودنا ان الاهل يوصونا على الزوج ماعاد الا يقولون اعبديه وانا كنت اقول لامي والله ماعاد الا تركعين عند رجول ابوي ولما تزوجت وشفت قسوة الحياه وجفاها وشين الزوج وجفاء الاهل عرفت ان اسلوبهم هو الصح للحرمه اللي مالها سند ولا ظهر وللحرمه اللي تبي تعيش وتربي عيال وتسكت وتصبر
مع الايام لقيت نفسي مثل امي اسمع من زوجي كلام وواااو كلام يجيب المرض كلام ماينقال ولا يتحاكى فيه كلام مثل السم وكنت ساكته وصابره لان اهلي ماراح يستقبلوني ولا يوقفون بصفي فعرفت ان اسلوبهم هو الصح لمثل حالتي ولكل من تبي تصبر عشان عيالها صح تضيع حياتي انا واتنكد انا بحياتي بس ما اضيع وفوق ضياعي ضياع عيالي بعض الشر اهون من بعض
ومن هذا تستفيدين شي مو كل نصيحه تسمعينها تجين تطبقنها على زوجك وعلى حياتك غلط واكبر غلط انتي من تعيشين مع زوجك فتره بتعرفين ايش يبغى وايش اللي يناسبه الا في حالة انه فاقد لعقله وقليل دين وايمان اذا عندك بنت اخت ديقه مقبله على زواج لاتصورون لها ان الزواج جنة الله في ارضه علموهم لايحسبون السعاده طبق من ذهب تجيهم جاهزه عشان ماينصدمون بعدين ويعيشون مصدومين لازم يتقبلون ويهياون نفسياتهم لاي شي وتتوقع اي شي وتكون مستعده لاي شي
ومازال غلط سيبان زمان يتكرر اشوف اللحين حريم ورجال باقي متخلفين يزوجون البنت مابعد كملت 17 سنه ليه تظلمينهم وتحطمين زهرة شبابها وهي مابعد اكتملت ولا نضجت ولاعرفت من الحياه شي امسوا بناتكم يكملون تعليمهم ويعرفون الطبخ والتنظيف والسنع وعملوهم ايش الحياه الزوجيه بكل صغيره وكبيره عشان ماترجع لك بعد كم يوم مطلقه او مطلقه بعيالها او تعيش عيشه سوداء والسبب الشفاحه على الزواج لاحقه البنت خليها تنبسط وتتهنا وتتعلم وتكبر ويصير خير لاتقولين اقطع بنصيبها ربي اعلم بنيتك وماراح يقطعها من النصيب
وثقوا تماما ان كثر الكلام وكثر المحاورات والنقاشات الزوجيه تجيب نتايج مؤقته وبعدين تلقين الزوج ماعاد يتقبل كلام ولانقاش لانه شبع وتنغنغ من كثر الكلام ويصير يحس انك كذابه بوعودك ونقاشات ويسميها مضيعة وقت وفراغ الرجال ربي خلقهم مايحبون كثر الكلام يبغى فعل وشي يشوفه وهذا عرفته لما قالت لي اختي ان زوجها دعته مره يناقشها وقام كسر الطاوله الزجاجيه اللي كانوا يجلسون عليها للتفاهم يقول ماعاد ابغى اشوفها خلاص كفي النقاش انتي عارفه ايش يبي وعارفه طبيعته وتلاحظين احيانا انك تكتبين لزوجك رساله عتاب طوووووووويله عريضه ويرد عليك بكلمه او مايرد اصلا وهذا طبعهم يبي فعل وتغيير يشوفه
الزوجه اللي تعود زوجها على ملاسنتها وردها لكل كلمه تستغرب بعد فتره بتطنيشه وبروده تجاه انفعالها وتهميشه لها انصحك ان تفاجئنه بصمت (الصمــــــــــــــــــــــت) وهذا الحل الوحيد اللي راح يرجعه لصوابه لانه عرف طبعك وانصدم من صمتك والحرمه البرباره يخاف زوجها من صمتها المطبق لانه بنظره \
هدوووووء ماقبل العاصفه فالزمي الصمت وراح تتغير امورك
موضوع كتبته على عجاله وهو نصايح مع مجموعه خواطر وذكريات من اخت محبه وابي الكل يستفيد من تجربتي المريره مع الزوج ومع اهل الزوج ولكني جنيت بالنهايه ثمرة كل فعل سويته ولاندمت لحظه على شي سويته
وكل من تبي نصيحه سؤال تطرحه وانا ان شاء الله عندي خبره والحياه صفعتني وصنعت مني شخصيه قاهره لكل الظروف والله يوفقنا واياكم ان اصبت من الله وان اخطات فمن نفسي والشيطان ..
اختكم//ام طيف..
اللهم صل وسلم على سيدنا محمد
اللهم لك الحمد كما ينبغي لجلال وجهك وعظيم سلطانك
لاحول ولاقوة الا بالله العلي العظيم
سبحان الله وبحمده سبحان الله العظيم