مراحل البحث عن عريس ..قصتي الواقعيه

تحياتي للجميع
وعدتكم اكتب لكم موضوع جديد وكل احداثه حقيقيه ماراح اقدر اكتبه دفعه وحده بنزل لكم
على حلقات
استفيدو من احداثه واضحكو وناقشو وعلقو
اتقبل اي تعليق منكم
انا انسانه واقعيه ومرحه وبسيطه ولا اشيل في نفسي شي على احد اللي يسئ لي اناقشه وافهمه منه وسامحه وانسى الموضوع
نبدء بسرد القصه
بسم الله الرحمن الرحيم
اول ماحسيت اني تاخرت عن الزواج ولعت عندي المبه الحمرا وصلت لمرحلة الخطر
قمت اهتم في عمري اكثر ..واتلزق في الحريم الكبار واذا حضرت الزواجات اقوم اترقص شوفوني واخطبوني 💃 ولا ادري وش يغنون هم باقي يطقون او وقفو اهم شي اكمل رقصتي مره احرك خصري ومره كتوفي ومره ادق ارقبه ومره احرك يديني
واذا نزلت من المنصه كأني مسويه انجاز اجلس على الطاوله انتظر الخطاب يتهافتون علي
سرا ليلي لا انخطبت وركبي ورمت من الرقص
في كل زواج اكرر نفس المحاولات
ولا من مجيب وفي العزايم اصير حرمه سنعه ونشيطه شوي اشيل الخروف فوق راسي وابطحه واذبحه ماغير ارتبش كاني وحده مشبوكه على خط 220
والعجز ماغير يطقطقون علي
هااا ما اعرسي نجيب لك الرجلالسنع وهااا الله فيه يوم زاد عندي الحماس واصير صاروخ ارض ارض جو جو.. انتظر ايام وشهور ماشفت من وعودهم شي لا انا اللي ارتحت وريحت رجليني وصحتي ولا انا اللي اعرست ماغير يقحنون من القهوه والشاهي متكين يطقطقون علي
اخر شي قلت اوفر طاقتي ومجهودي وانتظر نصيبي
مرت سنين خاطب يجي وخاطب يروح ماغير حقي منهم التعب والخساير والتفكير
اقترحت على صديقه اكلم خطابات وعطتني ارقام
طيب كيف اتفاهم معاهم وش اقول توني جديده على الوسط الخطابي
جاتني فكره اكلمهم على اني متزوجه و ام فلان وادور لاخواتي عرسان منها اخذ راحتي في الكلام ومنها اعرف مواصفات الرجل بدقه بدقه
كلمت اول خطابه وبدئت رحلة البحث عن عريس
كلمتها بثقه وانا ام فلان وبنت فلان
قلت اسمعي يا الاجوديه عندي اختي اقصد نفسي ابي ازوجها عندك رجال صاحي لها وابشري في اللي تطلبينه
اول سؤال منها هي بيضا ..هي طويله... هي نحيفه ..شعرها ناعم مهو من اللي يستشورون نبيه ناعم من الله ..كم عمرها ...هي دارسه هي موظفه ..هي بنت او مطلقه..وش ترجعون له ..يعني وش اصلكم
على كذا السودا ماتتزوج ولا السمينه ولا القصيره ولا اللي شعرها خشن ولا غير المتعلمه ولا المطلقه يااااالهوي عليكم الحمدلله ان الرزق بيد الله مهو في يد البشر
مافيه ولا خطابه سألتني هي راعيت دين وتخاف الله هي راضيه والديها
طبعا انا العروسه قمت امدح نفسي ابدا اختي واقصد نفسي ماشاء الله عليها تعالي شوفيها
الله ستر ماجاني فصام احيانا انسى واقول انا ابي كذا ثم اعدلها هذي شروط اختي 😁
اسألها وش موصفات الرجال ؟؟
عاد تقوم تدلع كانها جايبه فارس القبيله
تعطيني وعد تتصل علي
اقوم انا اسنتر عند التلفون كل رنه يفز لها قلبي فز واتخيل نفس لابسه التشريعه بعد كم يوم اتصلت واطير مثل الرجل الوطواط على التلفون هلا وغلا بام فلان نعم معك ام فلان
ترد قولي لاختك تاخذ مطلق وابو عيال
اقول لها ماعندك شباب انقرضو يعني عاد تقوم تنافخ اختك كبيره مهي ام العشرين
كان الرزق بيدها وهي تقسمه
طيب المطلق ليش وش وضعه ..مدري ياختي اسالو عنه طيب انتي جايبته ولا تعرفين عنه شي سلمت الامر لله خليه يجي ويقابل ابونا وهذا رقمه
انتظر هذا الاتصال شوي اسنتر عند جوال ابوي
مر كم يوم ارجع اتصل عليها وين المطلق ما كلم قالت استخار يقول مافيه نصيب طيب هو جاء عشان يستخير تقول .. وش اسوي اجيبه غصب
طيب عندك غيره تقول عندي متزوج معه عياله طيب ليش يبي يتزوج ..تقول مدري عنه اسألو عنه
انتظر جيت الخاطب والفرحه ما توسعني
خلاص جاء نصيبي بس الخوف ليش يبي يعرس مره ثانيه اخاف يأدب زوجته الاولى ويطلق
بعد مانسأل عنه ونتعب ..و تجي النظره الشرعيه
الود ودي البس التشريعه واملك وخلاص
يشوفني الخاطب ..يطلع ولا يرجع فص ملح وذاب
انتظر وانتظر حتى لو يتصل يقول مافيه نصيب اهون من الانتظار
بعد مده ارجع اكلم الخطابه وش صار على الخاطب تقول مدري عنه او بطل او انتحر
وفي كل مره نفس الشى تعب انتظار سؤال
ثم يختفي الخاطب في ظروف غامضه
تركت هذي الخطابه ماعجبتني طريقتها
وطحت في خطابه تشتغل بتاع كله.. سجانه وخطابه وصبابه وطقاقه كلمتها بنفس الطريقه على اني متزوجه وام فلان وادور لاختي عن عريس
قالت بجيب لها واحد مطلق ماعنده عيال بس ناس على مستوى لازم استقبال زين وتتكشخ اختك زين وووووو يعني بطلع لهم بسروال خط البلده ولا ايش كان ودي صكيت التلفون في وجهها هي والرجل الخارق حقها
لو زي ماقالت ناس على مستوى ماراحو يدورون خطابه سجانه طقاقه صبابه جربانه .. يعرفون يخطبون من وين
جاء اليوم الموعود وجهزت كل شي في المطبخ
اسمع صوت لجرس وتفتح امي الباب
وتهلي وترحب فيهم ..واسمع صوت الخطابه يرعد ويبرق جايه معاهم وين نتفضل فيه جيناكم مع اهل الولد كانها جايبه معاها صاحب السمو
دخلو وجلسو ..شوي اسمع صوت الخطابه وين القهوه والشاهي والضيافه ما انتظرت امي ترد او تقوم
وتفز من مكانها تدبك على الارض طايره كانها دينصور مصدقه نفسها صاحبت البيت وتدور المطبخ وتنصاه
واقوم اصك باب المطبخ في وجهها اقوى شي
يوم وقفت في مكانها تفكر ورجعت مكانها متفشله .. وتقول لامي خلي بناتك يستعجلون بالقهوى الخطاب مهو مطولين رجت امي رجه
جات امي مسكينه تمشي بسرعه مربوشه
وشالت كل اللي جهزناه للرجال وللحريم مع بعض وحطته عندهم
بيالات وفناجل وقهوه وشاهي وحلا تبي الخطابه تسكت
جيت ادور مالقيت شي.. قالت اختي امي شالته
المفروض ما اطلع يشوفين الان
يجلسون شوي ويتقهوون وبعدين اطلع لهم العجله مهي زينه لازم الواحد يسوي ثقل
حتى لو كنت طايره ابي العرس
اضطريت ادخل عليهم ووجه محمر وحرارتي مرتفعه ومقهوره من الخطابه.. ولازم ابتسم واجامل
ومتفشله من اللي صار
وكيف ادخل واخذ الفناجيل من عندهم وش اقول بس ..وش بيفهمون هم
كنت مضطره اخذها الرجال ينتظرون
والخاطب جالس معاهم دخلت وسلمت وشلت البيالات والفناجيل وطلعت وهم يطالعون بعض ويبتسمون
قلت في نفس هي خاربه خاربه لو لي نصيب مع ولدهم باخذه غصب عنهم
انتهت الزياره وطلعو ولا عاد شفتهم هذا وجه الضيف
اتصلت علي الخطابه بعد كم يوم
تقول مافيه نصيب قلت في نفسي اللي يشوف وجهك يشوف النصيب .. غسلت يدي منهم قبل تقول وجلست تقول ابشري يا ام فلان عند واحد لاختك مزيون ومحترم ووووو
وانا قفلت نفسي منها وعفت الخطاب من طرفها
وجلست تمدح وتمدح قلت خليه يجي نشوف النهايه معك ومع خطابك
قالت بجي معه هو مطلق ولا عنده احد يجي معه
قلت ياصبر الارض عليك بس
المهم جاء عريس الغفله طليت اشوفه لقيته رافع طرف ثوبه ويمشي كانه خبل مثلها 🤪
الخبله ماتجيب الا خبل مثلها
شافه ابوي قال وش هذا الرجال رافع ثوبه ويمشي متكبر مهو صاحي هذا
يوم جلست مع الخطابه قامت تطالعني وقالت يارب يوافق ياخذك انا احاول فيه يعرس
قلت ليش انتي تقربين له ..قالت لا ..بس هو يوصلني مشاويري ويقضي حاجاتي وناشب لي نشبه يقول ما ابي الا انتي اتزوجها وانا ما ابيه خلاص جربت كم زواج وهو يحلف ما اتزوج الا انتي وتضحك مبسوطه وامي طالعتها من فوق لتحت وقالت وليش جبتيه لنا كان اعرستي عليه انتي
قالت ابي ازوجه وافتك بس متعلق فيني.. يوم حامت كبدي كان ودي كفختها بدله القهوه ودربيتها مع الدرج هي وللي جابته
جايبه لي صديقها مدري وش جنسه هو ادمي او جني تخطبني له وتتبجح بوجه طليق
هو يبيني ويحبني ويقول ما اتزوج الا انتي
هذي مريضه نفسي وعقلي
ماصدقت على الله تنقلع من بيتنا
بعد كم يوم تتصل جايبه خاطب.. قلت لها انا واختي وامي ما نبي من طرفك احد ولا عاد تتصلين ابدا ابد وصكيت التلفون
بعد مدة طحت في رقم خطابه
محترمه وراعيت دين
وكلمتها بنفس الطريقه وجابت كم خاطب ولا حصل نصيب
وعندها رجال يبون الزواج لكن ما تنطبق علي شروطهم او العكس
خطر في بالي فكره قلت ليش ما اقلب واشتغل خطابه ولااشرط عليهم فلوس اللي يعطوني
اهم شي ازوج البنات واسترهم
دام ماحصل لي نصيب ازوج غيري
واشتغلت خطابه بتعاون مع هذي الخطابه
وصرت ابحث عن رجال يرغبون في الزواج عن طريق صديقاتي او صديقاتهم او اقاربهم ..اخوانهم او اخوالهم اعمامهم وهكذا
بدأت مرحلة عمل الخطابه ....يتبع