عاملين ايه
بسرعه كده امبارح عملت بيتزا بس بصراحه العجينه كانت جاهزه وطلعت جميله اوى وفى نفس الوقت جبت عيش بلدى وفتحته دائرتين وحطتيتهم فى صنيه وعليهم كل محتويات البيتزا الصلصه والبسطرمه والجبنه الرومى وشيدر وفلفل اخضر وطماطم مقطعه صغيره وبيضه مضروبه وزوت البيض شويه عشان مينشفش فى الفرن ولمده 10 دقايق فى الفرن كان رائع بجد وجديد وبيتزا فى السريع المريع على راى ميرو بس انا بقا نسيت احط زيت فى الصنيه من تحت فطبعا لزق شويه انتو ابقو خدو بالكم
ورده مفتحه
ربنا يصلح لكم الحال ومعنتيش تحكى لحماتك اى حاجه
اختارى حد قريب ليكى فضفضى معاه ويكون قريب ليكى وبس خلاص بصدق يا بنات لما اتكلم وافضفض حتى يمكن المشكله مش بتتحل اوى بس بشعر انى احسن
النهر لما منسوبه بيعلى محتاج مكان يصب فيه لو ملقاش ---- بيفيض
والمنيو بتاعك رائع بس بتجيبو سبانخ منين ولا مجمده
وبعدين مش هتقولى بقا انتى منين يا بلدياتى؟
ام البنات
بعتلك على الخاص
ام سوسو
يارب تكون قريبتك بخير وبصحه جيده
رشا
ربنا يشفى خالد شفاءا لا يغادر سقما
يابنات
فين المنهج الى هنمشى عليه كلنا؟
ولا يمكن تكونو كتبتو وانا مش واخده بالى
على العموم انا هكتب شويه وانتو كملو عليه
الاستيقاظ على الفجر+الاذكار
ننام+الاستيقاظ ( اقول الشهاده واحمد الله على نعمه واسميها وادعى شويه )لصلاه الضحى+صلاه الظهر+صفحتين قرءان
تشغيل سوره البقره
شغل البيت وانا بسمع القرءان+اى ماسك للشعر او البشره او سكرب
اصلى العصر+حفظ او مراجعه الى احنا حافظينه لمده ربع ساعه وانا لسه على السجاده ومقمتش
ولانه منهج متكامل فحبيت ان كلنا قبل مانفطر نشرب المشروب الى ام سوسو قالت عليه لتخسيس البطن(نعناع+شاى اخضر+جنزبيل+كمون+معلقه عسل)وممكن قبل الفطار بلع فص توم يكون مقطوع طرفه بالسكين شويه وعلى فكره مش بيعمل اى ريحه وبيدى مناعه
على فكره المحفظه قالت اننا لو توقفنا عن الحفظ لاى سبب يبقى منوقفش المراجعه عشان مننساش ونعتبرها فتره كويسه لمراجعه الحفظ لاننا عاهدنا الله على حفظ القرءان فلازم نحافظ على العهد بينا وبين الله
ياريت تتفاعلو عشان انا كمان عاوزه امشى على النظام دا معاكم
ولسه مفكرتش فى باقى اليوم
باقى البنات المختفين تعالو طمنونا عليكم
انجى
باينك زهقتى منى امبارح
فيميل
بتشوفى فين ابراهيم الفقى انا عاوزه برامجه ضرورى؟
الثقه بالنفس
انك تقنعى نفسك ببالمميزات الى فيكى وتردديها وتصدقيهاومتقوليش بعد كلمه انا حاجه سلبيه يعنى انا اشطر ست بيت فى العالم واجمل واحده واحسن زوجه
وكمان لما تعدى مع اى حد لاتزكرى عيوبك لاى حد حتى جوزك دارى عيوبك عن الناس وانتى بتتكلمى اظهرى المميزات الى عندك واهتمامك ببيتك واولادك وجوزك وانك مسيطره على البيت والولاد هتلاقى نفسك بعد شويه صدقتى وبقيتى كدا فعلا ان شاء الله
واى حد يبغت لك رساله سلبيه فورا تردى عليها برساله ايجابيه
جوزك الولد شقى جدا ---- تردى بالعكس دا ماشاء الله عليه شاطر وذكى وهيبقى حاجه كويسه لما يكبر
شكل لبسك وحش-------ايه انتى اول واحده تقول كدا بالعكس دا جميل جدا ولايق عليا قوى وبعدين دا عاجبنى وشيك
طبعا دى امثله وهبقى ارجع اكملك حكايه الدايرتين احنا اخدناها فى علم النفس بس شويه كدا عشان عاوزه تركيز
اللهم فك كرب المكروبين
واغفرلموتى المسلمين
متنسوش كل يوم ندعى لحد من الى بنحبهم دعاء مخصوص +ندعى لحد ميت عزيز علينا
سبحانك اللهم وبحمدك اشهد ان لا اله الا انت استغفرك واتوب اليك

ام يوسف بتفائل اوي اما ابشوف مشاركاتك والاسلوب الجميل اللي بتتكلمي عنه ومطبقاه دة ماشاءالله اكتر من ممتاز ربنا يثبتك عليه...واهم حاجة الواحد فعلا يكبر دماغه ويعدي حاجات كتير طالما انها هينة ومن ضغوطات الحياة ويوجد العذر للي قدامه
بس ممكن تبعتيلي لينك الكتاب بتاع عبد الوهاب مطاوع لاني كنت طلبته من عروس ومش عارفة طنشتني ليه....اوعي تطنشي انتي كمان انا اصلا بقراله من زمان وبحب كلامه جدا

ريهام....انا زعلانة جدا علي الاتفاق اللي بتقولي عليه دة ليه يابنتي كل دة ايه الجريمة اللي حصلت وصلت الموضوع لكدة اكيد كلها حاجات عادية بتحصل في كل البيوت بصي انا هولك حاجة واحدة خليكي ازكي من حماتك دي وادخلي انتي لجوزك من مدخل الانثي والزوجة وانتصري عليها بجد خلي الموضوع منافسة مع نفسك وانتصري علي الشيطان وعلي اي حد بيحاول يفسد حياتكوا هي عاشت حياتها خلاص عيشي حياتك انتي كمان مع جوزك معلشي اركني الكرامة علي جنب وحاااااااااااااولي مرة واتنين وتلاتة وان شاءالله انا متاكدة انكوا هتقربوا من بعض تاني وافرسيها بقربك من جوزك

ام يوسف
صدقيني حاولت بس هي الظاهر عاوزه تخربها و تقعد علي تلها

حبيبه اوسو
انتي من بورسعيد طب قوليلي انتي منين و كويس ان البيتزا عجبتك انا معنتش بعمل عجينه و لا حاجه بجيب العيش و زي ما قولتلك و كويس انها عجبتك و اعتمدتيها

كهرمانه
صدقين حاولت بس الكبر بتاع جوزي هيودينا ف داهيه ربنا يهديه

ورده مفتحه
هما بيضغطو عليكى
وافقى وقولى الى انت عاوزه
واصبرى وشغلى قراءن كل يوم ضرورى سوره البقره ومتعبطيش ادامه ولا تترجيه وتحايلى عليه اصبرى شويه
وادعى كل يوم بتذلل لربنا وعاهدى ربنا على قيام اليل والصدقه بنيه رجوع زوجك اليكى
ولما يجى ينام فى الحجره التانيه استنى شويه لما ينعس والبسى واتبرفنى واعملى اى حجه لدخول اودته ونامى جمبه بدون اى كلام لو حصل مشاده بينكم بهدوء انسحبى وابقى كررى المحاوله بعد كام يوم كدا
وياستى مش مهم الغدا دلوقتى ابقى اعملى حاجات حلوه كل يوم واديله فى البيت وحطى فى اوضته عصير مع كيك مثلا على صنيه شيك وورد مجفف وتل مثلا جربى كل حاجه كل ماتتخيليه اعمليه دا جوزك ولازم تحافظى عليه باى طريقه وماتسمحيش لحد يفرق بينكم
ومتقوليش كرامه اعملى كله بدون ما تكلمى ولو مستجابش يبقى نكثف الدعاء ونتضرع لربنا اكتر وشغلى سوره البقره بالنهار فى الاوضه الى بينام فيها
وحاولى تكونى متجدده فى شخصيتك اكتر وريحى دماغك منه
وتخيلى لو مسافر مثلا كنتى هتحبى تعملى ايه فى حياتك؟

السنة عند القيام من المجلس




أن تقول كفارة المجلس وهو ( سبحانك اللهم وبحمدك أشهد أن لا إله إلا أنت ، استغفرك وأتوب إليك ) رواه أصحاب السنن.
· وكم من المجالس التي يجلسها المسلم في يومه وليلته إنها مجالس كثيرة وإليك بيان ذلك بالتفصيل :
1- عندما تتناول الوجبات الثلاثة … فلا شك أنك سوف تتحدث في الغالب مع من يجالسك …
2- عندما ترى شخصاً من أصحابك أو جيرانك وتتحدث معه ولو كنت واقفاً .. .
3- في جلوسك لمن معك من الزملاء والأصحاب وأنت في دائرة العمل أو على مقاعد الدراسة ..
4- في جلوسك مع زوجتك وأولادك وأنت تتحدث إليهم وهم يتحدثون إليك .
5- في طريقك وأنت في السيارة لمن كان معك في الطريق من زوجة أو صديق …
6- في حضورك لمحاضرة أو درس …
· فانظر يا رعاك الله كم مرة قلت هذا الذكر في يومك وليلتك فتكون دائم الصلة بالله ، فكم مرة أثنيت على ربك ونزهته عما لا يليق به وعظمته عندما تقول (سبحانك اللهم وبحمدك ) .
· وكم مرة جدَدت التوبة والاستغفار مع ربك في يومك وليلتك ، مما حصل منك في تلك المجالس عندما تقول ( أستغفرك وأتوب إليك ) .
· وكم مرة أقررت لله تعالى بالوحدانية ، الوحدانية في الربوبية ، والوحدانية في الألوهية ، والوحدانية في أسمائه وصفاته عندما تقول ( أشهد أن لا إله إلا أنت ) .
· فتكون طيلة يومك وليلتك بين توحيد الله وتنزيهه وبين الإستغفار والتوبة إليه مما حصل منك .
ثمرة تطبيق هذه السنة :
تكفير الذنوب والخطايا التي حدثت في تلك المجالس .