لكى ننمى مشاركة الزوج لينا لازم نحدد أهدافك ومطالبك اولا :

يعنى انتى محتاجه يشاركك فى ايه بالضبط ؟؟

1- فى حياتك الدينيه وواجبه تجاه ربنا

2- هل فى احساسه بالمسؤليه التى على عاتقك ويشعر بك فقط

3- فى اعمال المنزل ومساعدته لكى فيها ؟؟

4- فى تربية الابناء..؟؟

5- فى مسؤليات البيت ومستلزماته الخارجيه ؟؟

6- اى سبب ممكن يكون غير كل هذه الاسباب ممكن تذكريها انتى ...


ثانيا : ليه عاوزاه يشاركك ؟؟

هل لتحسين حياتكم الاسريه والدينيه

ودعم الموده والرحمه بينكما معا

ام هروبا منك من المسؤليه كسلا واتكالا عليه

ام حنقا عليه لراحته وانه لا يتعب مثلك

اذن تحديد نيتك انتى عاوزاه يتغير ليه

مهم جدا

لان على هذا الاساس ربنا هايوفقك للتغيير ..

طب ايه المده اللى ممكن تحتاجيها للتغيير

سواء تغييره هو او تغييرك او تغييركم معا ..

يعنى مش هايكون من يوم ولا اسبوع ولا حتى شهر

هاتحتاجى للتدريج عشان تتغيروا مع بعض ..

يبقى لازم تعرفى المده اللى ممكن تحتاجيها واللى ممكن تحتاج سنوات

ولو تفتكرى الرسول صلى الله عليه وسلم ازاى جاهد فى دعوته

وانه صبر كثير لسنوات وسنوات عشان دعوته تنجح

ده يديكى دعم اكتر وحماس اكتر عشان تصبرى

وتستعينى بالله على التحسين للافضل ...

ثالث سؤال ممكن نسأله هو :

ازاى نوصل ( كيفية الوصول ) وايه الوسائل اللى ممكن نستخدمها عشان نوصل ؟

وده سؤال اجبت عليه قبل كده ..

واللى كان اجابته من باب التذكير

ان نيتك تكون ابتغاء مرضات الله

وتتقربى الى الله وتستعنى بالله كثيرا

الوسائل ممكن نحددها فى الآتى :

1- تجديد النيه لله

2- الدعاء لله

3- التعرف على شخصية الزوج

والطرق التى يمكنك الوصول بها الى قلبه

مفاتيحه يعنى

4- اسلوب ذكى للنصح

5- اختيار وقت مناسب

6- الاستعانه بالكتاب والسنه


وربنا ييسر لك الامر بإذن الله

رابع حاجه :

عاوزاه يعمل ايه

او عاوزاه يوصل لايه ؟؟؟

مثلا :

عاوزاه يكون متواجد بينكم ؟؟

ولا يكون ايجابى فى حياتكم ؟؟

يعنى الاولى اللى هى متواجد مجرده من الفعل ..

يعنى ممكن يترك اصحابه ويفضل جنبك وخلاص ...؟؟؟

وممكن انتى تراعى احتياجه لاصحابه

او ظروف عمله

وتمدحى حرصه على ذلك

مع محاولة استجلابه

وحثه ليكون ايجابى داخل البيت ...

يعنى رأيى انه مش لازم يساعد فى كل كبيره وصغيره

لكن لازم تحسى انه مشارك بالكلام والنصح والسؤال

وتشجيع الصح والتعامل بايجابيه فى مشكلات البيت ..

يعنى دور تربوى فعال ...

تيجو نعرض كام مشكله ونشوف ازاى ممكن نتعامل معاها ...!!!؟؟؟

المشكله الاولى : زوجى ليس فى بيتى ::

اذا كان الزوج من الازواج الذين يكرهون البيت

فحاولى جذبه وتحبيبه للبيت

طب ازاى ..؟؟

1- ابعدى عن الشكوى والتشكى الدائم من كل امر

2- حاولى تفتحى مواضيع تخصه وبيحب يتكلم فيها

زى مثلا اخبار اهله .. كلمهم امته .. اخبار شغله _ ان كان بيحبك تتكلمى معاه فى الشغل -

قولى نكته مثلا خليكى بشوشه دايما

3- هيأى جو هادى للبيت وحثى اولادك على احترام الاب وعدم الشكوى الدائمه له

4- كونى على استعداد جيد للقاءه وغيرى من نفسك

على قدر استطاعتك .. واعتقد ان ما فيش واحده دلوقتى ما بتهتمش بنفسها ...

لكن قليل اللى بتحاول تغير من ستايلها ....

5- حاولى تمدحى الحاجات اللى بيحبها حتى وان كنت مش بتحبيها

زى حبه لاصحابه مثلا وكم هو وفى لهم ...

6- حاولى تلزميه بيوم واحد فى الاسبوع او حتى بضع ساعات

يقضيها معكم ...

فى البدايه هايكون غريب عليه كل ده ..

هايسألك ليه .. ايه اللى حصل

قوليله انك عرفتى ان لازم الواحد يحسن حياته

ويتقى الله فى زوجه ..

وقوليله انك نفسك تخرجى معاه او يقضى وقت معاكم

فى البيت ولو نص يوم مثلا ...

اذا استجاب لطلبك .. دورك فى اليوم ده ايه ؟؟؟

لازم تمدحى فيه قبوله انه جلس معاكم

وتخلى جو البيت مفرح وسعيد

وبلغى اولادك انهم يخبروه انهم مبسوطين بوجوده

وحثيهم على عدم ازعاجه بالمشكلات ...

وحواراتك زى ما قلت خليها حوارات محبوبه له

مش حوارات حزينه وتافهه ..

ومرة فى مرة هايحب البيت

وجو البيت ويكون معاكم

ولو قدرتى انتى وهو الالتزام بفروض ربنا مع بعض

هايعرف يعنى ايه تقوى الله

وهايسهل عليكى تغيير امر تانى

بالتعليم والقرآه ومتابعة البرامج المفيده ..

ملحوظه :
فى البدايه - لانه صعب يتغير بسهوله - حاولى تنمى فى نفسه تقوى الله

وتحسنوا ساعات وجودكم مع بعض نحو الله ..

واذا هو عاوز شىء لا فائده منه امشى معاه- زى المشى فى الشوارع مثلا .. بس بدون وعظ دائم

بان هذا تضييع للوقت ..و..,..و..و....

لازم عملية التدريج ...

وافتكرى رسولنا لما نزلت الرساله

ما حطم الاوثان الا بعد فتح مكه

يعنى بعد اكثر من 15 سنه او اكثر من بداية الرساله ...

وهكذا ....

فيه سؤال ..

لو حاول يقول عل بديل للهروب من البيت

زى خدى فلوس واعفينى من مشاركتكم

او اذهبى لصديقتك فلانه

او اذهبوا للتنزه ..الخ من هذه البدائل

ارفضى بلطف وقولى له انت عندى اغلى من كل هذا ..

وبعدين ده اليوم الوحيد اللى اتفقنا عليه ..

نبهيه دائما الى سعادتكم بوجوده هو اكثر من اى بديل آخر ..

واصبرى واصبرى واصبرى .. لانه قد يتركك ويذهب دون فعل

ما تريديه ... لكن عليك بالدعاء ...

وفى نفس الوقت مش لازم تحبسى نفسك الاسبوع كله

عِند فيه مثلا ...

لكن قصدى اليوم اللى حددتوه مع بعض لا تتنازلين

عن مكوثه ... واستجلبى عطفه بكل السبل ....

وتعلمى بعض المهارات الزوجيه لاسعاده .. والكتب فى هذا المجال كثيره جدا