يسعد لي مساكم حبيباتي :معلش رجعت بالمقادير المظبوطة لانه
النت يوم نزل الموضوع قطع عندي ولولا سندريلا البرنسيسة الله يسعدها
ماكان نزل الموضوع من اصله لذلك سامحوني عالتقصير :
شراب التوت
ياغوالي القاعدة بعمل اي مربى او عصير عدم استعمال مافيه اي نقطة ماء
او رطوبة والا بيفسد بعد فترة وبيروح تعبك عالفاضي لانه بعد التعب
بتقدري تحفظيه خارج البراد لانك كنت حذرة اثناء العمل وماسمحتي لاي
قطرة ماء بالتسلل لشغلك .
المقادير والطريقة :
قولي مثلا انه عندك 2 كيلو توت كيف بتكو ن المقادير ؟
ياغالية اول شي حطيتيه عالنار مع كوبين سكر قبل ما تطحنيه
وهالعملية مو ضرورية , يعني ممكن فورا تطحنيه بس انا بحب اغليه قبل
عالنار لانه الخلاط عندي مو قوي وبحب اخلي التوت طري جدا قبل لا اخلطه .
طبعا لخلط بدون اي ماء ,فقط العصير الناتج عن خلطه وبعدها بوضعه بالمصفاة
الناعمة وطبعا كل ما كانت ثقوب المصفاة " اتوقع اسمها عندكم المشخل ,مالي متاكدة " كل ماكانت الثقوب اصغر بيطلع اطيب واظرف .
بعد ماصفيتيه ونتج عندك سائل , لازم تقيسي الكمية بالاكواب يعني
بتشوفي هالسائل كم كوب وبعدها بتقرري كم كوب سكر يحتاج .
يعني مثلا طلع عندك 8 اكواب عصير بياخدوا 8 اكواب سكر عادي " مو ناعم "
طبعا لا ننسى الكوبين يلي وضعناهم اثناء الغلي اول مرة لذلك بتضعي
فقط 6 اكواب عالسائل الناتج وبتبداي بتغلي فيهم عالنار لمدة نصف ساعة
وياريت تضعي رشة صغيرة حمض ليمون .وبعد مابيغلي منيح بتشيلي الرغوة
يلي بتطلع وبعدها اذا حبيتي بتكملي طبخه عالنار ليصل للسماكة يلي
بتحبيها او بتطلعيه عالشمس ,مابتفرق لانه التوت بالطريقتين ناجح .
عصير الحصرم
حبيباتي هاد سهل كتير بس مشكلته انه بيخرب السيراميك \ الرخام
يعني قبل لا تشتغلوا , حطوا مشمع مشان ماينزل اي نقطة عالارض
ولا تنسوا الكفوف مشان ماتتحسس ايديكم
هون بعد ماطحناه بماكينة اللحمة مو بالخلاط ولا بعصارة الجزر
انتبهوا اذا طحنتوه بغير ماكينة اللحمة وعلى اكبر شفرة , راح ينهرس
البذر يلي داخل الحصرم ويصير الطعم لفان ومو طيب .
لما بتخلصوا من تصفيته بتقيسوا السائل كم كوب , اذا طلع مثلا 20 كوب
بتضعوا 20 كوب سكر وبتحركوا السكر كتير منيح لحتى يذوب عالاخر
وفورا عالفريزر .
اتذكرت نصيحة مهمة كتير :
اول مابتضعوا الحصرم بالمصفاة , ضعوا في داخل الوعاء كمية من السكر
لحتى مايبقى العصير وولا لحظة بدون سكر مشان مايغمق لونه ويصير مو
حلو .ولما بتخلصوا تصفيته وبتقيسوا الناتج لا تنسوا تحسبوا الكمية يلي حطيتوها
اول شي بالوعاء يلي تحت المصفاة .
طبعا في ستات كتير بيغلوه عالنار ومابعرف شو , انا وجدت الطعم مميز اكتر
وفريش اكتر بدون غلي وبهالطريقة بالذات .
عصير التمر هندي المركز
عزيزاتي هاد اسهل عصير باذن الله واطيبهم , انا وعيلتي مدمنين عليه برمضان هو والعرق سوس .
شوفوا مثلا اذا ساويتوا كمية كيلو تمر هندي ,بتقطعوه وبتحطوه في طنجرة
مع 10 اكواب ماء وبتتركوه ل 24 ساعة وكل كم ساعة بتحركوه
مشان يتجانس منيح مع الماء ويحل الحمض يلي فيه .بعد ماصفيتوه منيح
كمان الناتج بتحطوه لكل كوب عصير كوب سكر وبتحركوا منيح وكمان
عالفريزر بالعبوات , انا لااستغني عنه بالطبخ , طعمه مميز لذلك مابخلط كل
الكمية مع السكر , بحفظ بالفريزر كمية للطبخ .
الباقي الناتج بضيف عليه الماء مرة تانية وبحط السكر يلي بيناسبني وبشربه
او بحفظه بالفريزر .
نقلت لكم رد من الهمم فيه بعض الخطوات :
مشان الكزبرة عزيزتي , غسيل وفرم وعالاكياس عالفريزر
مابيصير لونها اسود الا ااذا ذاب عنها الثلج خارج النار
يعني طلعيها فورا عالطبخة عالنار وقلبيها تقليبتين بتستوي مع الاكل
وهيك ما بتضطري ترميها لما بيكون عندك كمية كبيرة
البقدونس مايتفرز اما النعنع فممكن تغسليه وتنشريه على فوطة تحت المروحة
لينشف ويصير يابس وبتطحنيه وبتستعمليه باكلات كتير بدها نعنع يابس .
الموز هاد صديقي بالفريزر , بقشره وبحط كل موزة بالنايلون لوحدها وبطلعها
عالخلاط فورا وهي مجمدة " انتبهي اذا تركتيها ليذوب الثلج بتلاقيها لونها اسود
ومو ظريفة " بخلطها اما مع الحليب او مع الفريز يعني مع اي عصير بدي ياه
او اذا احببتي ساوي كيك الموز " لذيذ كتير "وهي رابطه للرائعة ام صلوحة
http://forum.hawaaworld.com/showthread.php?t=3222404
او ساوي كاسات الجيليه يلي بتستهلك فواكه كثيرة وخصوصا الموز او سلطة فاكهة .
البقدونس اذا لفيته بفوطة قماش رطبة شوي بيعيش عمر طويل كتير بالبراد
وعليك بالتبولة , بتستهلك كل البقدونس مهما كانت الكمية كبيرة .
عزيزتي مشان سؤالك الصبح عن القطارميز راح اشرح بسرعة لاني بدي فيق زوجي للصلاة :
البندورة مافي داعي تغلي عليها الماء , فقط حطيها بماء يغلي لدقيقة
وشيليها وراح تطق القشرة لانك راح تشيليها عالماء البارد فورا
ومن فرق الحرارة بتطق القشرة وبييصير سهل تقشيرها
ثم قطعيها ثم ضعيها مع الملح الصخري عالنار
راح تتركيها تغلي حوالي نصف ساعة على نار هادئة مشان تستوي
منيح وتصير صوص ثقيل ثم تعبئيها بالقطارميز وهي عم تغلي وساخنة
ثم غطيها بالغطاء المعدن واقلبيها فورا بصينية او طنجرة واغمري الغطاء
الغطا فقط بالماء " انتبهي اذا زدتي الماء لمستوى اعلى يمكن ينفجر القطرميز
من شدة الحرارة واتركي القطارميز مقلوبة في ماء يغلي لمدة عشر دقائق
سالتيني ليش مقلوبة ؟
مشان غاليتي يطلع كل الهواء لبرا ومايبقى في القطرميز مايساعد على نمو البيكتيريا يلي بتخرب البندورة وبتخليها تحمض او تعفن .
المهم انك لما يخلص العشر دقائق تنتبهي وانت بتشيلي القطرميز لانك راح
تشيليه وهو مقلوب وهو ساخن جدا
شيليه من الماء واتركيه مقلوب لتاني يوم لحتى يبرد تماما , عندها ممكن ترجعيه
لوضعه الطبيعي .
اذا كان احد اغطية القطارميز مو محكم راح تفسد عملية البسترة وماراح تنجح معك لذلك اختاري الاغطية الجيدة
على كل حال انا بخلي القطارميز امام عيوني حوالي 4 ايام وبنتبه اذا ظهر في
اي منها فقاقيع بعرف انه العملية مو ناجحة وبرجع بعيدها
وبعدها برفعهم عالسقيفة وخلاص بنساهم
يعني لو مر سنة وسنتين وعن تجرربة ما بيفسدوا بس بيتغير اللون وبيصير
اغمق بس الطعم ابدا ما بيخرب .
اما اذا بدك تضغطي الفواكه , يعني ماينفع تحطي الملح ,بتصنعي شيرة "قطر "
شيرة خفيف يعني لكل كوب سكر بتحطي كوب ماء ولا تنسي رشة حمض ليمون
بعد مابتصير الشيرة جاهزة بتحطي الفاكهة يلي من نوع جيد "قاسية نوعا ما "
بس لتغلي غلوة صغيرة كتير وفورا عالقطارميز وبتغطيهم وبتقلبيهم متل قطارميز
البندورة , على كل حال لو ماغمرتي الفاكهة بالقطر , ماراح تفسد الفاكهة
لذلك مو ضروري غمر الفاكهة بالشيرة .
مشان البصل المفرز , أنا أؤكد لك انه طعم البصل بيتغير شوي لما بيتفرز هاد إذا ماذكرنا اديش بيخسر من فوائده عالتفريز
البصل والثوم يعتبروا من أهم المواد للجسم لأنها بتساعد على قتل المكروبات يلي بنتعرض لها و لما بنفرزها بنحرم أجسامنا من مادة مهمة .
على كل حال انا بفرز البصل الأخضر لأنه أساسي لكثير وجبات ومودايما بلاقيه بالسوق لذلك بضطر افرزه
فقط اغسله واقطعه وعالفريزر فورا ولما بطلعه للطبخ فورا وهو مجمد مشان مايتغير اللون الأخضر ويصير اسود ,
اي خضار لما بتسحبيها من الفريزر عالنار فورا , مابتسمحي لها انه لونها يتغير .
كل مازاد عندي فليفلة حمرا او خضرا او صفرا "اتوقع اسمها عندكم فلفل "
بقطعها بالشكل يلي بدي , جوليان للسلطات والمعكرونة
مربعات صغيرة لصوص البيتزا و صوص اللازانيا واشياء تانية كتير
الفليفلة بالذات من الفريزر عالطبخ ومابتفرق ابدا ابدا عن الفريش
طبعا بالفائدة اكيد في فرق بس بالطعم مافي فرق .
الجزر ياغالية اذا كان مبشور مابيحتاج ابدا تفوير " يعني سلق لفترة قصيرة "
لانه بيستوي اول مابتطلعيه من الفريزر عالنار اما المقطع جوليان او دوائر
او مربعات فاكيد لازم التفوير , بتسلقيه نص سلقة وهيك لما بتطلعيه
بستوي بعد تقليبتين عالنار .
السبانخ عزيزتي مابيحتاج انك تفوريها يعني غمر السبانخ بالماء راخ يخلي
كل المعادن المهمة الموجودة فيها تنحل بالماء وتخسري كل قيمتها الغذائية
لذلك انا بقلبها عالنار بدون اي شي على نار عالية وفورا بتنزل الماء منها
وبترجع بتمتص جزء من مائها لانه النار عالية وبعدها بحطها بالمصفاة
مشان اتاكد انه مافي ماء زائد ولما بتبرد عالاكياس وعالفريزر .
الباميا الخضرا طعمها روعة بالتفريز , بس بقمعها ,بشيل الرووس ,
وبغسلها وبعدين بفردها على فوطة ناشفة لمدة 24 ساعة او اقل
المهم انه تصغر حبة الباميا شوي صغيرة ,يعني بتنكمش فقط 10 بالمية
وفورا عالاكياس عالفريزر ,وماشاءالله الطعم ممتاز
ان شاءالله يارب كون اتذكرت اهم النقاط مع اني عارفة انه لسا في كتير
بس انا جاهزة لاجاوبك عن اي سؤال .
هنادي ج
•
ماشاء الله تبارك الله .
ابدعتي ياهنوده بجد ست بيت شاطره
وربنا ينصركم وترجع سوريا احسن من الاول
اللهم بلغنا رمضان وقدرنا على صيامه وقيامه
ابدعتي ياهنوده بجد ست بيت شاطره
وربنا ينصركم وترجع سوريا احسن من الاول
اللهم بلغنا رمضان وقدرنا على صيامه وقيامه
مأشاء الله تبارك الرحمن
الله يحميكي ياهنوده موضوعك مميز ومتكامل أعجبني المصلى
الله يعطيك العافيه يأقلبي
الله يحميكي ياهنوده موضوعك مميز ومتكامل أعجبني المصلى
الله يعطيك العافيه يأقلبي
الصفحة الأخيرة
بس هالكلام كبير كبير كتير علي
الله لا يحرمني من صحبتك ويجعلنا اخوانا على سرر متقابلين
الله يسعدك ود
نورتي الموضوع , عزيزتي التوت من الفريزر ما يصلح انك تساويه
شراب مركز لانه خلاص صار فيه رطوبة من التفريز
واول شرط لسلامة العمل انه مايكون فيه اي نقطة ماء لا بالصحن ولا باي شي بتستخدميه اثناء العمل والتوت يكون تماما مافيه رطوبة
واكيد عم نحكي عالتوت الشامي مو التوت الفاتح .
الله يسعدكم جميعا
عطرتم الموضوع بمروركم ياغوالي
يارب يسمع منك يامحتارة
الله يعجل بالفرج لانه ضاقت كتير عالعباد
اللهم نصرا مؤزرا عاجلا غير اجل
جزاكم الله كل خير عهالدعوات الحلوة
ولكم مثل مادعيتم ياغوالي
تؤبشيني وتسلميلي وتكبريلي وشو كمااااااااااااان ههههههههههه
يسعد لي ربي طلتك يابرياني
انا يلي اشتقتلك ياغالية
ربي يديم المحبة بينا ويجعلنا اخوانا على سرر متقابلين في جنات عليين