مشاكل تنتظر حلولًا منكن ..

سلام عليكم
شحالكم؟
عندي كذا مشكلة وابغي لهم حلول ..اتمنى تساعدوني
انا (٢١ سنة ) متزوجة من سنتين ونص وعندي ولد (سنة و ٥ شهور ) والفرق بيني و بين زوجي ثلاث سنوات فقط يعني مو فرق كبير
علاقتي مع زوجي شبه سيئة ما كأننا ازواج ما بينا سوالف او طلعات مع بعض يادوب شوية و من هالرومانسية
ماعرف اتدلع عليه و اكون انثوية اكثر معاه ولاعمري قلتله حبيبي ومن هالكلام واحس اني استحي كثير منه .. زواجنا تقليدي
واحس وضعنا زي الماي والزيت مافي توافق وفيه اختلاف ف وايد اشيا
ولما يجي وقت نسولف فيه الاقيه ينتقد ويقلل من الاشيا اللي ارمس فيها فصرت اسكت وممكن ارد عليه اذا هو تكلم من نفسه لكن اني اسولف معاه لا صرت افضل السكوت
لكن ودي ان نسولف مع بعض وانه يحب القعدة معاي ويطول
الشي الثاني مافيه تفاهم بينا .. صارت مشاكل كثيرة ولا تنحل بسبب هالشي وانا عجزت افهم له وان اخليه يتفهم و يقتنع بالشي اللي ابيه
مابغي ان حياتنا تستمر على هالحال مابغي احس اني مكبوتة او ان تنلغي شخصيتي ومايكون لي رأي في شي او كأني خدامة فقط تلبي الاوامر وما لها حق ف شي .. مع ان هو مع الشراكة فالزواج لكن الاحظ هو معاي غير كأنه يناقض كلامه
بس فالعلاقة يهمه ان اكون مرتاحة ما يهمشني ويكون اناني لكن فاشيا ثانية غالبًا يسحب ويسوي اللي فباله
لما اقترح ان نطلع يرفض فصرت انتظر ان من نفسه هو يطلعنا لكن الطلعات جدًا قليلة وغالب الوقت يا فشغله او مع اصحابه او برع يقضيله شغلة وصار يحب يسافر لحاله
وانا متخوفة من فكرة ان ممكن هالشي يجيب تبعات ماودي حتى افكر فيها صراحة لكن سمعت ان دول نفس مصر ومغرب وتايلاند لو راحوا لها الرياييل معناته شي سيء ( ما قصدي اسيء لهالدول لكن السوالف المنتشرة بخصوص سفرة الرياييل لها تخوفني .. يعني نيتهم مو زينة للسفرة )  وهو سافر لمصر كذا مرة .. انا صراحة صرت ما اثق بأي لحظة يكون فيها بعيد عن عيني انا مابغيه ينحاز للخراب او الخيانة والعياذ بالله لكن اوقات يبي يقهرني انه كأنه يكلم بنت قدامي او يحط فويس بنت عشان اشك
هو دوم يقول انه يبي اهتمام بس مو عارفة كيف اهتم فيه زي مايبغي
الله يهديه يارب بس ابغيه يتعلق فيني ويعشقني بس ماني عارفة كيف اجذبه لي هو شخصيته مايلة للجنوبي لكن حسيت ان بعد ما شاف اني ماتجاوبت معاه فالبداية ( انا طبيعتي بطيييئة جدًا ) صار معاي كأنه شمالي بس هو فعليًا هو جنوبي ويحب السوالف و الرومانسية لكن الى الان ما عرفت اتوالم معاه
الشي الثالث وهو النحف الزايد .. انا قبل الزواج كنت مليانة لكن نحفت فجأة ومهما اكلت احس جسمي ما يستفيد منه ولا يزيد وزني ولي ثلاث سنوات على ذا الحال وعندي اسهال مزمن كل ما اكلت رحت الحمام وانتو بكرامة وزوجي يلمح كثير انو مو عاجبه جسمي كله يقول عظام لكن حتى انا مو راضية عن هالنحف ودي اسمن
وعندي كرش الولادة وماعرف كيف اتخلص منه وانا بعد الولادة رجع جسمي زي قبل نحيييف بس فيه كرش
وكيف اتخلص من التصبغات اللي فجسمي عندي سواد فالركب والاكواع وعند جوزة القدم يفششل ومنحرجة منه

الشي الرابع .. ودي يكون عندي فلوسي الخاصة بس صعب اتوظف حاليًا .. انا ما اسوق وماعندي رخصة قيادة وسيارة وماعندي احد ممكن يوصلني وولدي صغير 
وزوجي دوامه فمنطقة ثانية ويكون فالسكن الى نهاية الاسبوع
ابغي يكون عندي فلوس اكثر لان فخاطري اخذ كمالييات واشيا وايد وصعب اطلب من زوجي ان ياخذها واكلف عليه وهو عنده التزامات وديون
اما بخصوص البزنس شوي صعبة لأن عندنا لازم الف درهم عشان اطلع ترخيص للبزنس و لما فاتحت زوجي بهالشي رفض ولو قلت بسوي من وراه بيعرف وبتصير مشكلة
بس ماعرف ايش ممكن اسوي عشان احصل فلوس .. زوجي يعطيني مصروف مو بخلان علي الحمدلله
فخاطري اغير نظام اكلي واخليه 70% صحي واخذلي كتب و ملابس وميك اب و منتجات عناية وكله غالي
لحد يقترح ان اخذ من اهلي .. انا امي متوفية وابوي ما اتواصل معاه وبعيد عني من يوم كنت صغيرة واختي وحليلها بعدها مو مستقلة ماديًا وتدرس
ماعندي حد ممكن يساعدني بخصوص البزنس عشان اقدر اطلع الترخيص بما انه لازم ادفع له
الشي الخامس .. حياتي فوضوية بشكل فضيع مو عارفة ارتب وضعي و امشي ع روتين التزم عليه
وصايرة كسولة ودي أنجز ودي احقق اشيا كثيرة ودي اغير من نفسي للاحسن لكن محاولات فاشلة مو عارفة اساعد نفسي
ودي اكون انيقة ومتكشخة مع وجود طفل اهتم فيه لكن عندي مشكلة ممكن تكون شوي غريبة ان عندي غازات فلما اتوضأ وعقب احط الميك اب يمكن ساعة او ساعة ونص لازم امسحه عشان اتوضأ مرة ثانية واصلي بسبب الغازات
انا لما اشوف البنات متكشخات و يبقون بالميك اب فترة طويلة وما يضطرون للوضوء مرة ثانية اقعد اندب حظي ان ليش مو مثلهم ودي اكون نفسهم حتى يوم ابي اتزين واتكشخ لزوجي ماقدر اطول بالميك اب بسبب الغازات مع ان قبل الولادة ما كانت عندي هالمشكلة بس بعد ما ولدت صارت تجيني غازات كثير وتحرجني
الشي السادس .. كيف اخلي ولدي ياكل خضراوات كثير ؟
احاول معاه ياكل شي صحي ويرفض واكله خلال اليوم قليل وكله معتمد عالحليب
وغير ان يقعد يرمي الاغراض ويقرص ويضرب هل هذا الشي بيتغير لما يكبر ؟
وكيف اخليه يتعود على الكارسيت او كرسي اللي ينحط فالسيارة ؟
كيف ممكن اطلع معاه لأي مكان و ما اضطر اني ارجع بسبب الحوسة او صياحه وعناده .. كيف اتعامل معاه واسيطر عالوضع لأن مب حلوة ان عشان هالشي اخليه بس فالبيت بحجة ان الطلعة مع الاطفال مزعجة ومتعبة .. انا ابغيه يطلع ويجوف العالم والدنيا مو محكور فالبيت وفنفس الوقت اكون قادرة اسيطر عالوضع واستمتع معاه فالطلعة ونطول بدال ما تكون الطلعة قصيرة
اتمنى تساعدوني :)
- ———
ممكن تحسبون فيه تناقض لكن عشان التوضيح .. انا ساكنة مع اهل زوجي ماعندنا سكن مستقل حاليًا ف هم عادي عندهم ان استعمل من اشيائهم اللي فالمطبخ لكن لو قلت ابغي اغير نظام اكلي وازيد من الاكل الصحي بضطر اني اشتري كمية زيادة عشان احقق هالشي وطبعًا ها ممتلكاتهم هم صعب اني اخلصه عليهم لأن هم بعد بيستخدمونه فلازم اخذ لنفسي وطبعًا يبغاله فلوس