مشكلتي اللي احرجتني مع زوجي

السلام عليكم ورحمة الله وبركاته
اسعد الله مسائكم يكل خير وكل عام وانتم بصحه ورمضان كريم ♥


بنات موضوعي جداً حساس واتمنى القى رد يفك حيرتي والله اني انسانه محافظه واخاف الله ولا ازكي نفسي ومااقدر افاتح احد بالموضوع هذا ابدا واللي تغلط علي وتعتدي يشهد ربي لاادعي من كل قلبي ان ربي يبتليها بالهم والغم اللي يكدر حياتها لان بعض الردود تنرفز
مشكلتي كلمت امي فيها قالت انتي تدورين المشاكل ووجع الراس وانتي تحرثين عن قرنك وكولي واسكتي اللي قدامك خوذيه وبس
طبعا هذا كلام امي اذا بديت اتشكى لها وسرت مااتكلم اسكت عن الموضوع بس داخلي شي مو مرتاح
ادخل بالموضوع بعد المقدمه هذي
انا متزوجه عمري 29 وزوجي 38 وزوجته32
هو و زوجته من قبيله وانا من قبيله ثانيه متزوجه لي 5 سنوات عندي ولد واحد
الحمدلله مرتاحه جدا مع زوجي وسعيده ويحبني واحبه واحترمه ويحترمني وبيننا كل خير وهو رجل طيب عادل يخاف الله مايحب الظلم ولا عنده حركات لف ودوران رجل اجتماعي يحب الناس وراعي واجب
ومابيني وبين زوجته مشاكل ولا علاقه ابدا بس اول ماتزوجت زعلت واخذت شهرين ورجعت بيتها وبدا نظام ليله لي وليله لها
طبعا هي موظفه وانا كنت طالبه وتخرجت الحمدلله وباقي ماتوظفت هو يقول مايبي الوظيفه وانا راضيه لانه موفر لي كل شي ومصروف وسوق وتمشيات ومطاعم واي شي ابيه مايقصر يعطيني بدون نقاش يعني الحمدلله حياتي معه زي الفل
مشكلتي الكبيره اللي اخاف الله منها ودايم افكر فيها اخاف انه شي خطا هو يطلع من دوامه الساعه تسعه الصباح لانه مدير و ع كيفه يطلع وينتهي دوامه 2 الظهر بس يوميا يطلع الساعه 9 او 11 بالكثير عندي يجيب فطوره ويجي عندي نجلس شوي وننام الى 2 الظهر بعدين يطلع اذا يوم جارتي واذا يومي كمل نومته الى العصر وعلى هالموال له خمس سنين سواء هي عندها دوام او معطله وانا حاسه انه شي غلط وقلت له ياابو فلان يمكن هي ماترضى انك تجي بيومها قال محد شكى لك لاتتدخلين انا اجي مكان ماابغى والحين هي معطله ويجي الظهر ونطلع نتغدى اغلب الاحيان وبيومها ويرجع بيته متغدي وانا قلبي مقبوض هو يقول اذا جيتك اعتبري اني زوجك لحالك قلت يوم الحرمه طيب قال هي راضيه وانا مااتوقع لانها كل شوي تدق عليه تقول اسوي غدا يقول لا بعدين تدق تقول بتااخر يقول مادري وطبعا ماتدري انه عندي تحسبه بالدوام
واذا كلمته زعل واذا تركته اخاف الحرمه تنظلم لو كانت حرمه مطنشه اقول عادي بس مهتمه بوجوده وتسال عنه وتدق عليه
وهذي الحرمه طيبه يشهد ربي دايم يروح ولدي ويجي معشيته ومعطته حلاو وعصير ومره ولدي سواها ع نفسه لقيتها مبدله له ببدله جديده لانه هو واخوه بنفس العمر
والحين مرسله لي طقم صحون شوربه مع صحون تقديم
ولا اقدر اتشكرها لان شرطها يوم ترجع مااكلمها ولاتكلمني
وعند اهل زوجي يوم لي ويوم لها نسلم عليهم وماتبي نتلاقى او اشوفها ابد
اول زواجي زعلت شهرين وكسرت الدنيا والحين رضت وانا صراحه اقدر شعورها بس مره احرجتني بطيبها ومحتاره مع زوجي مادري وش اسوي ان نصحته زعل واذا سكت احس اللي يسويه حرام شرعا وهو يقول ربي مايحاسبني ع ميلة القلب يحاسبني ع العدل فقط بينكم بس القلب ماني محاسب فيه