في أمل أتعلم!! :

بسم الله الرحمن الرحيم خواتي أنا قريت كل تعليقاتكن حرف حرف ونقطة نقطة وكثير من كلامكن صحيح وأنا ماقصدي إني أتكبر على بداوتي بل على العكس أنا أتشرف في بداوتي وأدري أن الأصل الأخلاق الطيبة وإن شاء الله إني من أهل الأخلاتق الطيبة بس والله البعض مافهم أنا وش أبي بالضبط يمكن ماعرفت أعبر عن اللي في بالي بس في حاجات إذا عرفتها أستغرب أنا وين من كل هالسنين ؟؟؟ طيب راح أحدد طلبي أنا أبي أتعلم أصول التعامل مع الناس يعني لو كنت بالرياض وكلمتني وحدة تعزمني ودي أعرف متى الوقت المناسب للزيارة وش راح اخذ معي وكيف أتصرف لأن الاحظ انهن ماياخذن عيالهن معهن للزيارات وهل يصلح أعزمها على طول يعني وأنا عندها أقول لازم تجين في بيتي وإلا بعد كم يوم؟؟ ومتى أعزم الحريم على العشاء وإلا لازم عزيمة العشاء تكون من الرجال يعني لازم زوجي يعزم زوجها وبعد ودي أعرف عن الهدايا لأن يوم جيتهم عروس عبوني من الهدايا وأنا ودي أردها لهن بس مستحية بدون مناسبة مرة زرت أهل زوجي بعد نفاسي قامت عمته أهدت لي كيس في 20 جنيه ذهب ويوم بنتها ولدت كنت أبي أشتري لها جنيهات ذهب كنت أعتقد ان هذي الموضة وعيا زوجي يقول يعني كأنك ردتي لها هديتها وشريت لها طقم عطر وبودر ولوشن بس كان غالي مرة وبالنسبة للملابس أنا مشكلتي كل اللي أشوفه بالسوق يعجبني ويدخل مزاجي ولا أحس في شي حلو وشي بايخ والخوات اللي قالن لي شوفي المسلسلات حنا ماعندنا تلفزيون لأن أبوي ملتزم والحمد لله ماني متعلقة بالتلفزيون و انا فعلا عندي قوة ملاحظة و أحاول أركز على كل حاجة أشوفها وأقدر أسأل خوات زوجي بس أخاف تغير نظرتهم عني بعدين أحس علاقاتهم الاجتماعية معقدة شوي مو مثلنا على البساط احمدي أنا أقدر أفتح النت بس ما ألقى اللي يناسب مجتمعنا يعني هنا بالمنتدى في بنات من الرياض أكيد لو حددت لهن طلبي راح يعلمني ياليت لو تكتبون لي بالتفصيل عن أصول الزيارات والمناسبات من لبس وتقديم والحضور والهدايا اللي نجيبها معنا بس خافن الله فيني ترى راح أحفظه عندي واطبقه بالحررررررررررف ولاتنسون التفاصيل عشان أستوعب زين أنتظركـــــن

بسم الله الرحمن الرحيم خواتي أنا قريت كل تعليقاتكن حرف حرف ونقطة نقطة وكثير من كلامكن صحيح...