ماشاء الله أختي معلمه ولامره آكلو من برا البيت ، تطبخ الغداء المغرب وتبرده وتدخله الثلاجة وإذا رجعت تسخنه بس تسوي سلطه الخضار والفواكه من وقتها واحيانا الرز إذا كان ابيض

أنا موظفة وما عندي شغالة تساعدني ؛وما ناكل من المطاعم مو من سنعي ؛ بس لأنا ساكنين بقرية وما فيه مطاعم ؛المهم لأني أنا وزوجي من اصحاب الوزن الثقيل وأطفالي ما يحبون الوجبات الدسمة أنا صرت أصلح سندويشات
بيض مسلوق وسلطة ؛تونه ؛ أو فول  أو فاصوليا
وإذا تبين تكشخين دجاج متبل للشاورما وإذا جيتي طلعيه من الفريزر وطوالي بصينية وعلى النار 
المهم إن أحيانا أصلح مضغوط والطريقة أصلح كشنة حمرا واعلبها وعالفريزر اصلح كمية يعني والدجاج اجيب مبرد وأول ما اجيبه اقطعه وانزع الجلد واغسله 
لما اجي من الدوام انزل عباتي واطلع علبة الكشنة وكيس الدجاج واحطهن مع بعض بقدر الضغط على النار طبعا ما اسكرة لا اخليه مفتوح واقلبهن عشر دقايق بعدين ازيد ما واقفل القدر عشر دقايق بعد ثم اكب الرز عليه وعشر دقايق يكون الغدا جاهز 
وعندك صينية الخضار تسلقي الخضار بالليل و وتسلقين دجاج وبعدين تنتفين اللحم وتصلحيه عصاج مع بصل وبهارات وتدخليهن بالتبريد 
وبكره تخلطينهن بصينية وتحطي عليهن علبة قشطة مخلوط معها ملعقة أو ملعقتين جبن وبيالة مرقة من ماء السلق حق الدجاج تطلع طعم لذيذ وعلى الفرن خمس دقايق بس شغلي عيون الفرن الثنتين يعني من فوق وتحت
وتقدرين نفس الي فوق بس تضيفي له مكرونة بس اسلقي المكرونة لما تجين من الدوام حتى يكون طعمها طازج 
وبعد لو تسوين لك جدول يكون حلو عشان ما تقعدين
تفكرين وش اصلح
و فكرة حلوة تختصرين الوقت وتصلحين الأعداد المسبق للغدا مع العشا يعني المغرب تصلحين عشاك وتجهزين لغدا بكرة 
والله يعينك بس والله راحة نفسية الله يديم عليك نعمه وعلى جميع المسلمات

عندي حل لكي
حددي يومين في الاسبوع تتغدو برا
و 3 ايام في البيت


من الليل قطعي خضار بصل ثوم طماطم فلفل رومي فلفل حار ليمون شرايح
و جهزي صلصو ( معجون طماطم و خردل و صويا ) مخلوطه

حطي في الصينيه قصدير و فيليه سمك مجمد و الخضار و الصلصه و رشي ملح و بهارات و غطي القصدير و حطيها في الثلاجه و قبل تخرجي دوامك طلعيها برا او ما ترجعي قبل تفصخي عبايتك دخليها الفرن و نص ساعه و هيا جاهزه


ساندوتشات كودو فلفل رومي و بصل و دجاج الوطنيه مفروم تكون جاهزه و مقطعه بس تحطيها ع النار مع شوي مويه 20 دقيقه و هيا مستويه



كباب الكبير الدجاج ف الفرن ربع او ثلث ساعه و هوا مستوي مع خبز و سلطه او رز ابيض



السلطه قطعيها من الليل و ف الثلاجه و غطيها كويس
و ملحيها قبل التقديم

لا اله الا الله
محمد رسول الله

فيه طريقة انك تغسلي الرز وتحطيه في صفايه هذا في وقت الفجر اما دجاج يسلق من الليل مايضر وتدخلية بالثلاجة
عندك طريقة حلوة انا معتمدتها للخضار وتنفع في الثلاجة
2بصل شرايح2 كوسا شرايح 2 بطاطس مربعات2 جزر شرايح ( قليل من الزهرة ) حسب الرغبة بهار ملح فلفل احمر شرايح ثوم 2م صلصلة
يحمس البصل ثم يضاف الجزر ويحرك ثم الكوسا ثم اخر شي البطاطس والثوم وفلفل
تسلق الزهرة ثم تضاف واخر شي الصلصة وتحرك حتي يستوي الخضار وتتركينها لما تبرد ثم تغطيها ببلاستيك زين حتي ماتكسب طعم من الثلاجة
وعليكم بالعافية