رفع

ياعمري والله حاسة فيك فعلا الغدا وجبة مهمة وصعب جدا تلغينها أو تعيشون عالمطاعم لان فيه فرق كبير بين أكل المطاعم والبيت

راح اعطيك كذا وصفة أنتي جربي أفكاري لمدة أسبوع شوفي اذا عجبك الوضع استمري

من رايي الصواني ممكن تنأكل بايتة لكن الكبسات صعبة أحس بيبان فيها إنها مو طازجة

اليوم الأول سوي مكرونة باشاميل بالليل كاملة ودخليها الفرن
اذا رجعتي تدخلينها الفرن تتسخن وتتحمر لين تغيرون ملابسكم تكون جاهزة

اليوم الثاني جهزي من الليل صينية الرز بالدجاج للأخت طيور هنا بالمنتدى جدا جدا لذيذة
ونفس الشي دخليها الفرن هي ما يبيلها تحمير بس تتسخن وتتسبك المكونات مع بعض

اليوم الثالث سوي صينية الخضار البيضاء برضو من المنتدى أخذتها مرة روعة بس أنتي ضيفي لها مكعبات صدور دجاج محموسة مع بصل وفلفل اسود وكمون وحطيها طبقة في الصينية
ومن بكرة حمريها بالفرن وبسرعه جهزي الرز الأبيض
ونصيحة خذي رز العيسائي كرنل ما يحتاج تنقيع ويستوي بسرعه ست دقايق غليان او سبع ويستوي وتصفينه وتخلينه على نار هادية خمس دقايق فيما تتحمر صينيتك

اليوم الرابع
بالليل قصصي بصل وطماطم وثوم وخليهم بالثلاجة واذا رجعتي احمسيهم بسرعه مع علبة تونة واقلي بطاطس واسلقي رز وسوي مشخول تونة
تقريبا بياخذ منك ثلث ساعة
وممكن نفس الشي مع مكرونة بالتونة بس المكرونة ضيفي لها كزبرة
يمي لذيذة

اليوم الخامس
سوي كباب لحم او دجاج له طرق كثيرة البنت وسويه اصابع
ومن بكرة دخليه الفرن يتحمر ويستوي وسوي معاه رز ابيض وممكن سلطة خيار بلبن عالسريع


عاد لما يجي الويك إند تفنني بالكبسات والبرياني والايدامات والسلطات والاكل البحري

وربي ييسر أمرك

دعواتك :)

مُمكن تسوين صياني في الليل - إيدامات ..
وممكن أيضا دامك ماتبين مطاعم تواجرين حرمه طبخها وسعرها حلو وتصير توصل الأكل لدوامك في حافظه
وتاخذينه معك للبيت

دعواتك سهل الله أمرك

الخضار ما تخرب سويها من الليل

وايضا السمك سوي صينيه من الليل بالليمون والخضار وحطيه في الثلاجه

واللحمه سويها بالليل مع مرقتها وانقي الرز قبل تطلعي من البيت

واذا جيتي مباشره طلعي القدر الكاتم وعليك عبايتك وحطي اللحم ومرقته على النار وروحي غيري وارجعي تكون غلت بسرعه سوي الرز في الكاتم ولا تكثري مرقه لان الكاتم ما يحتاج مويه كثير غير ان الرز منقوع من الصباح ما يحتاج مويه كثير

يعني بس غطي الرز بالمرقه وخلي معها اللحمه تطعم فيه

وشبكي النار عليه

وابدي سوي السلطه وسخني الخضار والعصير والفواكه وجهزي السفره بس تسمعي الصفاره احسبي 5 دقايق وقصري النار

واذا صينيه ما تحتاج الا بس تحطيها على النار الين تسخن وتجهزي الخبز والصحون والسلطه والفواكه

ثم بعد 5 دقايق ثانيه اسكبيه بالعافيه يكون جاهز

انا اطبخ كل شي من الليل واخليه يبرد وادخله الثلاجة بس أرجع أسخن الأكل والحممدلله الطعم مايتغير انا بعد زوجي حار ونفعت معاي هالطريقة