مشكله كبيره بيني وبين زوجي وبتحرب حياتي لو استمرت

بنات انا داخله على الله ثم عليكم..

ماني من النوع اللي يحب يكتب مشاكله لكن يوم شفت المشكله وين وصلت قلت لو مااخذ مشورتكم بتخرب حياتي ...
وبخربها بيدي..

قبل ابدا بمشكلتي بقولكم اني اعترف ان الغلط منيييي ومضيقه صدري نفسي ..
انا عنيده .. وبسرعه ازعل .. ودايم اشيل في خاطري ..

المشكله يابنات بيتي ونظافته ومسؤوليه البيت .. وبنتي ..
انا يابنات ماعندي حس مسؤوليه ابددد ...
يعني عجزت احاول اخلي البيت مرتب تلقينه يومين ثلاثه طوول بالكثير اسوبع نظيف وبعدين ينحاااااس ..
تعبت والله ماعندي مسؤوليه ..
غير كذا بنتي الصغيره ماني مهتمه في تغذيتها .. يعني مامسويه جدول غذائي لها عايشه على الحليب ووجبه وحده باليوم يعني صدق مهمله .. الحمدلله بنتي صحتها زينه لكني مااغذيها وانتم عارفين الطفل محتاج تغذيه ..
زوجي يهاوشني دايم يقولي انتي مهمله ليه ماتوكلينها !!!!

جدولنا متلخبط .. نقوم الظهر وننوم قبل الفجر .. عجزت اعدل نومنا مانفع ..

انا مااهملت بنتي بقصد بس احيانا اعطيها زبادي واحيانا جبن بس ماني مسويه لها جدول ..

والمشكله الثالثه اني نكديه .. احب النكد!!!
عمركم سمعتوا احد يقول عن نفسه كذا !!!
موب بيدي بس بسرعه ازعل واعصب واسوي مشكله من شي بسيط ..


وانا عارفه حياتي بتخرب لو بستمر على المنوال ..

انا داريه انكم بتقولون وش بقيتي الله يعظم اجر رجلك .. بس والله موب قصد مني لااااااا بس ماعندي مسؤوليه ..

تكفون ابيكم تساعدوني الين اصير حرمه سنعه ..

احس اني تزوجت وانا ماني حمل مسؤليه بس الحمدلله على كل حال ..

الحين دوركم توقفون معي لا تخلوني لحالي تكفووووون ..

شوفوا لا تقولون لي ..
قومي بدري .. حطي جدول لبنتك .. نظفي بيتك ..

ادري بكل هذا بس ابي احد يعواني يساعدني ياخذ بيدي ويوريني الصح من الغلط ينورني ...
انا بعيده عن اهلي ومالي الا الله ثم انتم..

وصدق زوجي طفح عنده الكيل وقام يصارخ ويهاوش مررررره .. وانا ساكته لاني عارفه اني مقصره .. وكم ماره فتح معي هالسالفه واقوله ان شاءالله واتعدل اول يومين وبعدين انتكس ملللللللللل مني وخلاص ماعاد يتحمل ..

ساعدوني اتعدل الله يخليكم ..