معاناة بنتي -ما ادور حل ، بس اقروا عشان تستفيدون-

أول شي آسفة على كلمة أقرأوا .. أكيد غلط كاتبتنها .. للأسف كل ما يطوف الزمن احس ان كتابتي العربية تتردا .. مع اني ما كنت جذيه

المهم

بنتي بتكمل سنتين في شهر خمسة .. بس مسكينه من الله خلقها و هي تعاني من الحساسية .. الحساسية من ملوثات الجو مثل الغبار و الادخنة و لقاح النباتات .. و تزيد عليها الحالة كل بداية فصل ربيع او خريف .. طبعا الاعراض: زكام ، عطس ، عيونها تدمع ، كحة

و لأنها بيبي ما تقدر اطلع المخاط او البلغم .. مع اني احاول قد ما اقدر بالشفاطة مالت الخشم .. بس ما ينفع .. لها السبب تلتهب اذنها .. هاذا هو محور الموضوع .. كل الاوساخ تنزل من الحلق و الخشم و عن طريق قناة استاكيوس تتجمع في الاذن و تسبب الالتهاب .. صرت خبيره في تفسير التهاب الاذن

اول التهاب اذن ياها و هي عمرها ثلاث شهور .. عطوها مضاد و ما نفع .. و جربوا غيره و غيره و غيره .. حتى الابر اليوميه .. ما شي فايده .. يلين ما قررولها عملية التيوبات .. تنحط في الاذن عشان اطلع الوسخ .. يعني ما تخليه يتجمع فيها .. على طول اطلعه .. العملية وايد بسيطة ، بس منظر بيبي عمره ست شهور على طاولة العمليات يقطع القلب

المهم الحمد لله بعد العملية ارتاحت بنتي .. بس الالتهابات ما وقفت ، بس طبعا اقل من اول بوااااااااااااااااااااااااااااااييد

التيوبات طاحت قبل كمن شهر .. مع انه المفروض اتم يلين ما تكمل سنتين .. بس طاحوا .. يمكن لكثرة الحركة و الركض و الطيحات .. بس اول ما طاحوا بدت الالتهابات ما تخلص .. الحين ها رابع شهر و هي كل شهر تلتهب اذنها و تستعمل مضاد عشر ايام ، يروح اسبوعين و يرجع

يوم الخميس عدنا موعد مع الدكتوره و بيشوفون اذا بيسوولها عملية ثانيه او لا .. الله يعيننا

المشكلة الثانيه الي ابا اقولكم اياها .. ان من كثر ما تستعمل المضادات يصيرلها رد فعل .. ها شي اكيد ، و الا حد يستعمل المضادات ها الكثر و ما يتأثر .. تكرمون منطقة الحفاظة عندها تحترق .. هيه و الله تحترق .. ما تلتهب الالتهاب العادي .. حرق .. يعني الجلد هناك يتزلق و يطلع دم .. و مسكينه تمووووووووووووووووووووت من الالم .. لا ماي و لا وايبس و لا كريم ينفع .. استعملت الكريم مال العام بعد ما صارلها نفس الشي ، بس مش نافع وياها .. كل الي مسوتنه الحين اني شايلة الحفاظة و مخلتنها يمكن تنشف الحروق بها الطريقة .. في حد قالي عن النشاء اقدر استعمللها اياه .. بس ما ابا اخبص اي شي وياها كفاية الي هي فيه .. ان شاء الله باجر بوديها المستشفى يشوفولنا حل بصراحة ما ينسكت على الي هي فيه

و مع ذلك كله ما شاء الله عليها نفسيتها من احسن ما يمكن .. دمها خفيف و تلعب و تضحك .. جنها تعودت على الم الاذن .. بس بصراحة رد الفعل الي قلتلكم عنه متعبنها وايد

خبرتكم قصتها عشان تستفيدون مش عشان شي ثاني .. و ان شاء الله عيالكم ما يشوفون شر و ما تمرون بالي امر فيه .. الحمدلله كل شي بأجره .. و الله يعافيها