معاناتي في ســــ .. !! ؟ !!/قديم

السلام عليكم ورحمة الله وبركاته
معانتي في سن العشرين
أنا ماأحب أشكي لأحد بس من زود الضيقة وشفت هالموقع الأكثر من رائع سجلت فيه
وحبيت أفضفض اللي بداخلي وأشوف بنات حواء رايهم فيني ..
هل أنا صح ولا أتوهم ..ماأدري تفكيري صح ..

المهم بأبداء بجزء بسيط جداً بمعانتي مع دخولي العشرين اءه
انا من مواليد 1406 هـ سمراء مو سوداء لا سمورة يعني قريب للحنطية
من دخلت العشرين الكل يقولي تراه سن زواج هاه ترا بالهوقت البنات ينخطبون ويعرسن ووووووو وياليل
ماطولك وأنتي لحد الحين ماانخطبتي ولا أحد جاك يوه

دخلت 21 قامت المعاير تزيد حبة أختي الوسطية
تقولي يالله أنا لما كنت مثل عمرك تزوجت قلت لها الحمدلله على كل الحال وأنا توني صغيرة
(ماحبيت أجرحها وأقولها بس أنتي ماعنك غير ولد واحد وللي عرسو معك عندهم 5 وللي عنده 6)
وكل ماقعدت تعيد سالفتها أنها عرست في سن21

دخلت 22س أءه من هاذا العمر مرة أخوي الكبير عندها أخو
مثل عمري يدرس في امريكا ..يدرس على حساب أبوه وقال لأهلة زوجوني ولا مارآح اكمل زوجوه ..
والله يهديها مرة أخوي كل شوي تعايرني أخوي صغير وتزوج ماشاء الله علية(هو أبيض و زوجته بيضاء )
وهاتك مدح (كان ودي أرد عليها أنه أبوه اللي يصرف عليهم وأخوانه الكبار منقهرين منه ويدعون علية
وحتى انتي منقهره ان البنت تصرف وتلعب على حساب أبوك وطبعاً مااقدر ارد عليها)وأختي الله يهديها
تعيدلي موالها مع فرق بسيط وهو أنا مثل عمرك صارلي سنة من تزوجت وبعد الموالات اللي كانت تجيني
ربي فرجها علي وجاني واحد من عيال عم أبوي وكلمو أختي الكبيرة وجاتني وقالت لي أنهم مايبون أحد
يدري حتى أمي(أنقهرت انا بنت أمي الكبيرة كان ودي أختي تكلم أمي وتفرحها) يبون الموافقة المبدئية
وقامت تقولي أختي تراه ملتزم وحار(عصبي)أنا هنا ماعرفت ارد وقلت لزم امي عندها خبر وأنا ماأعرف وسكت
وأول ماخلصت أختي على طول علمت أختي الصغيرة(أصغر مني بسنة)وقعدنا نفكر ونحلم
واول شي أشتريته كريم مفتح البشرة (نقطة ضعفي ):hahaha:خفت يجون على غفلة .
والله فرحت وحمدت الله انه جاني النصيب بس خفت أبوي مايوافق المهم الناس ماتكلمو بعدها
أنا هنا قعدت أحاتي ياااربي وش فيهم سبحان الله جاء الأسبوع الثالث من السالفة إلا أسمع أخواني
يقولون بنروح نصلي عليه .. الولد توفى بحاااادث.. الله يرحمه

أنا انصدمت قلت خيرة طول اليوم وأنا أقول خيرة بس لما جاء الليل قعت أبكي بكاء ما قد بكيته ربي آجرني في
مصيبتي وأخلف لي خير منها وقعدت أسبوع اتعذب الكل يمدحه الله يرحمة أبوي أخواني الناس الكل وانا اتعذب من المدح ودي أقولهم ترى هالرجال كان بيصير زوجي تراه خطبني بس ....

المهم ..
دخلت 23.. الموالات بدت تشتغل .. عسى ماقلت ماأعرف
ولا ماأدري قالو لي المثلك فتحين بيوت وعندهم 3 و4 أطفال .
وفي يوم كنا معزومين في عرس وسبحاان الله أهل الولد المتوفي كانو موجودين وانا خفت . أ
نا والله ماكان ودي أروح أعرف أنهم بيكونو موجودين بس أبوي رفض قال بتروحين غصب !؟ وياليتني مارحت الأم سلمت علي بلأحضان أما البنات قامو فيني خز والله تقولون أنا اللي ذابحه أخوهم .. ربي اللي خذاه مش أنا وكرهت نفسي . وزاد الطين بلة خواتي كل شوي يقولون لي شوفي هاذي أصغر منك عندها ولد وحامل ولا هاذي متملكة وهـ....و,,,.
وبعد فترة أنخطبت من اهل زوج بنت خالتي .. الولد مثل عمري (الخطبة كانت سوالف حريم فقط ماصارشئ رسمي)وأبوي ماوافق وكمان انا مع أنه محد استشارني . وقامت بنت خالتي تهزء أنتو مين علشان ماتوفقو علية على ايش شايفين عمركم وأنتي تراك منتي صغيرة ترك كبيرة وترك بتعنسين اذا هاذا مبدئكم (أسباب الرفض الولد مش نفس قبيلتي (الولد ماهو قبيلي(خضيري )هذا مبدأعايلتنا الله يهديهم ويسامحهم البنت ماتاخذ غير من القبيلة أنا وش ذنبي
وبعدين الولد في أول ثانوي يعني يدرس باقي علية مشوار طويل
وكل شوي تجرح فيني (كان ودي أقولها بس أنتي لما كنتي مثل عمري ماتزوجتي فليه تعايريني بس خفت اجرحها وتزعل مني )
وحدة من خالاتي كل ماشفتني أضحك تنكد علي ..تقولي (أقعد كذا كل من جاء أحد يخطبك رديهم لما تصيري عانس ولا راح تتزوجين وإن تزوجتي هاذا اذا راح تتزووجين على حرمة 2 اوشايب )
(كان ودي أرد عليها (لحظة ياخالة من جاني وقلت لا كلها رجال واحد.. الله يكثرهم واحد وتقولين كل من جاك ولا مخطبو رسمي كلام فقط )فقلت بخاطري خالتي تحبني وماقالت هـالكلام إلا وتبغالي الخير

..حرمة أخوي الثاني زوجو 2من أخوانهم الله يبارك لهم وقامت تشتغل علي أخواني طلبوا بنات صغار 19 و20مايبون
كبار وبيض ماشاء الله عليهم ووووو (كان ودي أرد عليها بس أنتي لما تزوجك أخوي كنتي أكبر مني بواجد وكمان
عندك أخوات أكبر مني ماتزوجو و زي كل مرة أخاف أجرحها واسبب مشاكل)
ومع مرور الأيام تزيد المواويل

ودخلت24 أءه ثم اءه أول صدمه من أختي الكبيرة قالت أنا بزوج وليدي بصراحة كبر ومثل هالعمر الولد لازم يتزوج لاكن البنت مثل هالعمر لا كبيرة (طيب نسيتي اني انخطبت لكن
الله ماكتيب لي النصيب )ولدها أكبر مني بأسبوع فقط وكل ماتقعد تردد موالها.(على فكرة أخواتي الكبيرة والوسطية من أبوي فقط
والصدمة الثانية من أخوي الكبير قال يبي يتزوج وقال لأمي لازم تروح معك (ألم وحزن) أنا رفضت وقلت استحي تدرون وش رد علي أخوي ولد أمي وأبوي قال والله منـتي صغيرة وش فيهااذا رحتي أنتي كبيرة خلاص .. والله قعدت ابكي صحيح كبيرة بس مش معناته اروح اخطب انا بنت فاهمين معنا بنت يعني عيب اروح اخطب (طبعا اخوي قرار يخطب من قبيلة ثانية مايبغي من جماعتنا ابوي ماوافق بس بعدين قالو له تفضل ياأبننا العزيز أختر من أي قبيلة من مملكتنا الحبيبة خخخ
والبنت فلا تقعد تنتضر من ابن العم او احد من ابناء الجماعة وإذا لم يأتو فخليها خليها تعنس خوش والله ههه (انجنيت)
وطبعاً رحت وأنا خلاص ميته من الحياء ناس ما اعرفهم ..
والله طول الوقت وأنا اطالع الأرض والله اني حفظت السجادة حقتهم .. كل ما أبغى اطالع في الناس أستحي حتى البنت اللي خطبناها ماشفتها يمكن هي شافتني أكثر من اني شفتها
ولا خواتها لو تسألونهم كم مره ارمشت عيني قالو لكم ؟؟
ولما جيت البيت يسئلني أخوي هاه كيف البنت ماقدرت أرد عليه استحيت .. وغير كذا وش أقول ما قدرت أشوفها
والله ثم والله اني قعدت أبكي طول الليل على الموقف اللي انحطيت فيه..هو عادي أدري بس انا ماتعودت على هاذي المواقف..(وأهونها على نفسي وأقول أخوي يطلب مني شي وأرده لا لا هو ماطلب مني أروح مع أمي إلا أنه يهمه نظرتي )

أكمل لكم معاني مع دخولي24
قدر الله وحريم أخواني ولدو وصار عندنا 2بيبي جديد غير اللي قبل أنا اخاف أشيلهم لأنهم صغار مرررره وياولي لو قلت هالكلمة أخاف
انتي لو متزوجه كان عندك و..و..و.. المواويل التي قد اشرت عليها من قبل
وأنتم عاد عارفين حريم الأخوان .......

اءه واللي يقهر اكثر كنا رايحين عرس مع عمتي (وعمتي هاذي عندها ولدين تبغى تعرسهم وياعمري عليها هي وبناتها قاعدين خز في بنات خلق الله يدورون )
حنا في طاولة وهم في طاولة جبنا عاد انا وأختي الصغيرة نضحك عليهم وأقول لأختي لقد وجد الهدف المطلوب وسبحان الله طلع كلامي صح ونضحك وأختي الصغيرة تقول لالا هاذي بيختارون المهم وتجينا أختي الوسطية
وتقول لنا شوفو عمتي تدور حق عيالها أكيد تدور لهم البيض والزينين والحلوين طالعو هاذي البنت عمتي
تبغاها بس طلعت متزوجه وقعدت انا وأختي الصغيرة نضحك لأن نفسها الهدف المطلوب وقالت اختي الصغيرة
حاول مرة أخرى حاول مرة اخرى وكل شوي خواتي يعلمونا عمتي ايش اختارت .. الله يوفقهم انا بل العكس
والله موزعلانة بس والله انجرحت من الناس انا واختي قاعدات وعمتي تخطب والكل يشوفها الله يهديها لو انها راحت قعدت بعيد افضل لنا ولها والله الكل يشوفنا أنا وأختي بنضرة ....
وياعمري على أمي زعلت وارتفع ضغطها والله الدمعة في عيونها وماطولنا في العرس طلعنا بدري ..
حسبي الله ونعم الوكيل والله اني عندي مواقف تقهر وتبكي لكن مااحب اذكرها لأنها من جد توجع ..

أول كنت انجرح بل حالي واختي الصغيرة تهونها علي .. الحين أنا وأختي ونهونها على بعض لاوصرنا
ننجرح في كل خميس (جمعة الأهل وحريم الأخوان)

أما جمعت خلاتي /بنات خالتي وبنات خالي اذا تجمعنا لازم يفتحون موضيع خااااصة للمتزوجااات متعمدين
ليه هالأحراج
وبنت خالتي الله يسامحها كل ماشافت أمي تسوي حركات سخيفه تقهر امي وتخليها تبكي في نفسها
من غير محد يشوفها ..يعني تلعب عيالها قدام امي وتقولهم نادوها جدة أوماما فلانة ومن هركات وأمي
المسكينة اذا شافتها تقول الله يرزق بنياتي ان شاء الله وينادوني جدة و..و..وهي ترد عليه آمين
ان شاء الله وترفع يدها يااارب تقولها بطريقة ...

ولا كل وحدة مخلينا خدامات لعيالهم ..فلانه الله يعافيك عبدودي توسخت يداينه روحي غسليها له
فلانة الله يعافيك فلان يبي يشرب حليب أمسكي الرضاعة له انتوا ماعندكم عيال والله تعب هاالبزران

خير ان شاء الله ولاوحدة تقول الحمدلله مادخلت العشرين الا وانا متزوجه تقهر الثانية والثانية تقهرها
وتقول صحيح ماتزوجت الاعقب بس الحمد لله عندي عيال 3ورابع في الطريق..
وفي الأخير يرجعون لي أنا وأختي

ليه كل هاذا التجريح من الأخت من حرمت الأخ من بنت الخالة والخالة ليه

النصيب اذا الله كاتبة بيجي ماادري هل أنا صح ولاغلط ..مادري في أحد مثلي ولا أنا مثالية بزيادة ..
ولا انا وأختي نعاني بلحالنا

وأمي المسكينة دائماً يقولو لها بناتك محد جاهم مساكين ولا أحد طيب
أدعيلهم ترى دعوت الوالدين مستجابة .. واذا جاء احد عطوه تراهم كبار ..وياعمري عليها
بسرعة دمعتها تنزل من هالكلام السم اللي يجيها.. ليه هالتجريح

لدرجة صرنا أنا وأختي نهون عليها ونقولها ان شاء الله تفرحين فينا وبنسمي بناتنا عليك وياحبيلها أميمتي تفرح وتمسح دموعها .. حسبي الله ونعم الوكيل

ولله صرنا نتحاشى نقعد مع أبوي وأخواني الكبار خواتي الله يهديهم ماعندهم إلا فلانة بنت فلان ياحليلها صغيرونة وعندها بزرين ولا فلانة متملكة وهي صغيرة و..و.

والصديقات .. قسمين متزوجات و عازبات(آنسااات)
المتزوجات كل ما يكلموني لازم يسألوني هاه انخطبتي يابنت تزوجي بسرعة شوفينا صغار وعندنا بزران / بصراحة انتم معقدين ماتبون إلا بس من جماعتكم / تراك بتعنسين كيفك.. طيب أنا مكلمتك اسمع اخبارك ونسولف ليه لازم كل من كلم بعض نعيد الموال

العازبات(الآنسات)يجبون الهم والغم (ياااربي متى نعرس شوفي فلانه متزوجة ومعيلة ولا فلانه متملكة وو
ياربي وحنا وش علينا منهم الله يوفقهم ليه الموال وراي وراي
فقررت اني ما اكلم صديقاتي ..

ماادري هل أنا حساسة بزيادة ولا متفائلة بزيادة
قل لن يصبنا إلا ماكتب الله لنا.

أنا مؤمنه أن ربي راح يرزقني باللي أتمناه وماراح يخيب ضني به بس مع تجريحهم لي .....
مااعرف بصراحة ليش صار أهتمام الآخراين الزواج والتجريح ..
ماادري هل أنا مااعرف ارد عليهم ولا ردي راح يكون قاسي
والله أعرف ارد لكن أخاف أجرحهم و الأهم أخاف ربي يعاقبني اذا جرحتهم ما أدري

سبحانك اللهم وبحمدك اشهد ان لا اله الا انت استغفرك واتوب اليك
صبراً جميل والله المستعان

بنات حواء أكيد فيه منكم الأخت / وزوجة أخ /خالة/ بنت خالة /عمه ....
تجرحون قربيتكم
أسئلكم بالله تجرحونهم ..
واذا تجرحونهم لية وش السبب ..
أدري كلالالالالالامي كثير وهذرتي زايدة وكلامي مش مفهوم ..السموحة منكم بس والله منقهره أتمنى انكم تتفاعلوا معاي