*معاناتي مع بعدي عن أهلي شاركوني يامن تشتاقين إلى أهلك بمعاناتك*

السلام عليكم ورحمة الله وبركاته

كيفكم يابنااااااااات ان شاء الله تمام..
الموضوع باين من عنوانه
حبيت نتكلم عن معاناة أكيد فيه كثير يعانون منها ألا وهي بعد الأهل

حيث إن محدثتكم تعاني من هذي المشكلة من زواجها فهي معاناة طويلة ..الله يكون بعونا .

نجتمع هنا يا أخواتي ونحكي معاناتنا لبعض ونخفف عن بعض وأكثر شيء يأثر عليك من بعدك عن أهلك
وأكيد بما أن سلبيات البعد عن الأهل كثيرة فلا بد أن هناك إيجابيات أيضا ربما قد نغفل عنها فالله عزوجل لم يخلق شرا محضا "وعسى أن تكرهوا شيئا وهو خير لكم "

كتبت هذا الموضوع وحبيت أنفس عن نفسي لأني أحس بضيقة صدر تو أهلي مسافرين بعد ما قضيت معهم أربعة أيام من أحلى الأيام لكن السعادة لا تدوم ...
سبحان الله لما أكون عند أهلي أحس الفراغ يقل والمشاكل أكيد راح تقل ..أحس براحة نفسية ونفسيتي حلوة
تطلعين تدخلين تشوفين ناس ..
وزياراتي لأهلي تكون كل شهر ونصف أو شهرين أحيانا أجلس يومين بس لأني بنتي السنة هذي بادية تدرس وفي الإجازات أسبوع أو اثنين لا أكثر...
هنا لحالي ببيتي أربع وعشرين ساعة مع بنياتي مافيه جديد وشغل البيت يخلص عشان كذا أحب أطلع من البيت دايما بس زوجي مايحب الطلعات دايما بس ما يلام الصباح في الدوام والعصر في التحفيظ والمغرب عند أهله ويبي يجلس العشاء في البيت وأنا أصير طفشانه ودي أطلع وارفه عن نفسي
لو أهلي عندي كان أروح عندهم وقت خروجه (وهل تنفع شيئا ليت )
ومالي هنا إلا أهل زوجي وتعرفون مايصير كل شوي عندهم ,,,كل اسبوع أروح لهم وافرح بهاليوم لأن دايما يصير عندهم أقارب لنا وتشوفين ناس جديد وهم كذلك حبوبين
وكذلك عمتي وأمون عليها مرة بس للأسف بعيدة عن بيتي أشوفها كل اسبوعين ..
ومعاناة أيضا في العزايم وين أحط بناتي مالي أحد خصوصا إذا كانت رسمية صعبة آخذهم
أشوف حمواتي ما شاء الله مخصصين لهم يومين في الاسبوع لجمعتهم واهلهم والناس كلهم خميس وجمعة لا تسألين عنهم مع اهلهم الله يهنيهم ويفرج عنا
بس أكيد فيه ايجابيات ..
منها إني صرت معتمدة على نفسي في كل شيء من بداية زواجي ومتحملة المسؤلية على أكمل وجه ولله الحمد
ومتفرغة أكثر لبيتي وزوجي وبنوتاتي وأحل مشاكلي بنفسي ..والحمد لله على كل حال
لكن لا أعاني من الفراغ بقدر حاجتي لقرب أهلي والإستئناس بهم


شاركوني معاناتكم ونخفف عن بعض وهل ترين أن بعد أهلك مؤثر على علاقتك مع زوجك وحياتك في بيتك ؟؟
وأكيد نحن أحسن من اللي ساكنين خارج بلادهم ...
أنتظركن أخواااااااااااااااااتي .................