معقول كل هاد من العين ! شوفوا شو صار فينا !

السلام عليكم و رحمة الله وبركاته

يا صبايا انا عمري ما حاولت أتهم الناس بالحسد أو العين الحارة ولا بحب اللي كل ما قال أخ حكى انطرقت عين... و مع اني بصدق بان العين حق و مؤمنة بوجودها بس ما كنت احب اعترف انه في حوالي ناس بتصيب بالعين أو انه في ناس لهالدرجة قلبها مش صافي (هبلة و على نياتي) ..
المهم مشكلتنا بدأت من يوم الجمعة الماضي (مش مبارح)... يومها كنا عازمين ام زوجي و اخته و اخوانه الاثنين مع زوجاتهم واولادهم... و كانت عزيمة فعلا روعة وانبسطوا كتير الحمد لله. المشكلة انه وحدة من زوجات اخوانه (بتكون هي سلفتي الكبيرة) معروفة عند العيلة بأنه عينها حامية و انها بتحسد.. مع انها أكتر وحدة متدينة في العيلة كلها بس باين انه ما دخل التدين بالموضوع.... و انا دايما بدافع عنها و زوجي ما بيحب نزورهم ويزورونا بس كل مرة بقنعه من باب صلة الرحم و انه هاد بيت اخوه الخ.
و احنا قاعدين بعد الأكل انتبهت انها عم تتطلع على ابني (عمره سنة) طول الوقت و حتى لما حد بيحكي معها مو شايلة عينها عنه ... اسم الله ابني صحته منيحة يعني (مربرب) ما شاء الله عليه .. و هي مش تفكروا انها محرومة من الاولاد ما شاء الله عندها أربعة الله يحميهم رجال .. أصغر واحد فيهم توجيهي. المهم في نص القعدة كنت شايلة ابني و بعدين حطيته على الكنب و رحت اعمل شغلة، و ابني عارفته بينزل عن الكنب و السرير عادي ما وقع ولا مرة... شوي و لا أسمع صوت زي الانفجار يا حبيبي وقع من الكنب على البلاط و بكى كتير .. و طبعا انا لمت نفسي كيف أحطه و أتركه مع انه دايما هيك بس خلص حسيت الحق علي.
المشكلة بعد ما طلعوا .... أول شي صار عندي وجع فظيع بايدي التنتين من اول أصابعي لعند رقبتي ..و الله ما كنت قادرة أرفع ايدي و لا حتى اشيل التلفون فيها .. و صرت اجي عالشغل يا دوب أتصفح المنتدى و اكتب كم رد و ايدي يوجعوني ولا عرفت اشتغل ... و المشكلة مع هالراحة الوجع كان يزيد .. و تالت يوم صارو رجي كمان يوجعوني وبطلت قادرة اتحرك ... طبعا رحت على تلات أطباء ، اتنين منهم اختصاصيين أعصاب، و طلبوا مني رنين مغناطيسي للدماغ و تخطيط أعصاب .. بس لهلا ما عملتهم للأسباب اللي لسه جاي بالطريق.
بنفس الوقت اللي بدا فيه وجع ايدي .. يعني بنفس يوم الجمعة بعد ما روحوا، سخن ابني و صابه إسهال... و انا كنت ميتة من الخوف فكرت انه من الوقعة اللي وقعها .. و حكينا مع الدكتور قال الضربة ما بتخوف الا اذا استفرغ فقلنا كويس و اعطيناه خافض حرارة و مشي الحال ..
تاني يوم السخونة خفت و راحت شوي شوي و ما أخدته على دكتور.
يوم الأحد كنت انا اللي تعبانة و مش قادرة اعمل شي و كنت بستنى موافقة التأمين عشان تاني يوم أعمل الصور المطلوبة مني.
الاتنين لقينا زيد ابني سخن فجأة و بنفس الوقت كان يبكي بكا مش طبيعي و الله من يوم ما انولد ما بكي بهالطريقة، و بلش يطلع بجسمه حبوب حمرا و كبيرة .. طبعا اخدناه على دكتورو شك بانه التهاب فيروس و اعطاه دوا، بس تاني يوم الولد ما تحسن بالعكس الحساسية وصلت وجهه و راسه و اخدناه على دكتور تاني و تالت و اضطرينا نسحب له دم و كانت حالة الله يعينه .. و المسكلة انه مفاصله كانوا يوجعوه مش قادر يحبي حتى و لا بيحب حدا يلمسه و كل ما حد يمسكه يصير يبكي ...
هلا احنا يوم التلاتا و لسه ما خلصنا ... بنتي جنى كانت عم تلعب و فجأة وقعت على راسها ... طبعا غسلنالها بمية باردة وتلج لحد ما هديت و طبعا مكان الوقعة انتفخ و هي نامت و بعد شوي صحيت ما مالها شي و لا شكت من الوجع كانت طبيعية ... و انا مع مرض زيد و وقعة جنى طنشت وجع ايدي ...

رحنا بنفس اليوم عند حماتي الله يطول بعمرها و يعطيها الصحة... وكانت مصرة انه اللي عم بيصير لنا عين ... و انا لسه مو مصدقة، وقالت لي تعالي احوط عليك انت و ابنك (يعني تقرا علينا و ترقينا) .. سبحان الله كانت بنتي نايمة و ما قرات لها بس انا و زيد.. و الله تاني يوم كانه الوجع اللي بايدي و رجلي كان كذب ... و حتى زيد ما شاء الله بدت السخونة تخف بعد ما كانت تتعدى الأربعين و الحبوب عم تطفي. بس انا قلت انه هاد بسبب العلاج يعني لسة رافضة انها عين ..
المشكلة الأكبر انه يوم الأربعاء جنى بدت تستفرغ و بعدها نامت خمس ساعات متواصلة مع انها ما بتكتر نوم بالعادة، و لا رضيت تصحى ، وما رحت اصحيها لقيتها سخنة بغلي، اخدناها على أقرب دكتور و حكالنا السخونة مو من الوقعة بس الاستفراغ أكيد اله علاقة عشان هيك خدوها على المستشفى، و طبعا طرنا فيها عالمستشفى و عملنالها صورة طبقية للدماغ و طلع في كسر بسيييييط (شعر يعني) بالجمجمة مكان ما وقعت :( و السخونة بعد التحاليل طلع سببها التهاب حاد في المسالك البولية!
نامت الليلة هاي بالمستشفى و طلعت يوم الخميس ما شاء الله عليها الحمد لله .. و تطمنا انه ما في كمان مضاعفات للضربة.
طبعا بعد ما طلعت من المستشفى بدوا الناس ييجوا يزورو و يتحمدوا بالسلامة لجنى وزيد، و زوجي حامل هم زيارة سلفتي ما غيرها، و الأمور مشيت تمام لحد مبارح (الجمعة) وقت ما اجت هي و زوجها. طبعا من أول ما اجوا وزوجي مستنفر و ماسك جنى زي اللي بده يخبيها، و انا حاولت ادخل زيد جوا و ما يشوفوه ، بس عشان زوجي قال لي ، و طبعا قرأت عليهم و على حالي و على البيت (ما خليت اشي) ... و بعد شوي نزل زوجي و زوجها على صلاة المغرب فأنا شلت حجابي ، و والله اول مرة بحس بهالشعور ، كنت أحكي معها و هي ما عم تتطلع على وجهي كانت تتطلع على رقبتي و المنطقة اللي تحت الرقبة بشوي يعني يا دووووب مبين نتفة مني ، و كانت نظرتها مبالغ فيها يعني مش نظرة و خلص لا و الله ربنا بيشهد انها ما كانت طبيعية كانت تتطلع و حكي بموضوع تاني و ارد عليها و لسه نظرها مثبت على رقبتي ..
بعد شوي زوجها دق عليها و راحت و قلت الحمد لله اللي روحت و ما صار شي :(

ما في دقائق و الله وبدا حلقي يوجعني وجع مو طبيعي .. و لهلا عم يوجعني مو قادرة أبلع بسهولة ... و الأمر من هيك انها بعد ما طلعت بربع ساعة بدا زيد يستفرغ بقوة من غير سبب و الله ما كان ماله شي !! و لما رجع زوجي و عرف عصب و قال لي صدقتي هلا انها عينها حامية و لا لسه :( طيب انا بدي أمنعها تيجي عالبيت؟ ولا بدي أحبس الاولاد و أحبس حالي؟؟

معلش طولت عليكم و ما بعرف اصلا شو الفايدة من الموضوع .. يا ريت للي تمر بس تدعي ربنا يكف عنا شر عينها اذا كانت فعلا هي السبب (لسه مو مصدقة) و الله يهديها و يسامحها اذا كانت هي و قاصدة هالشي ...
و سلامتكم من كل شر و من شر حاسد اذا حسد :26: