بسم الله الرحمن الرحيم
والسلام عليكم ورحمة الله وبركاته..

ارجع أكمل معاكم الموضوع وحاتكلم عن طريقة الاهتمام بالمظهر الخارجي..

في كتير من البنات ما يعرفو كيف يديرو المظهر الخارجي لنفسهم وبكدا يخلونا كل ما نطالع فيهم نستغفر :/
يعني ي حبيباتي والله احنا بنات والمفروض قد ما نقدر نحافظ على جمالنا مو نخربو!

طبعًا ي بنات من مكان للتاني تختلف طريقة المظهر الخارجي لنا

حنتكلم أو شي عن المظهر الخارجي في الأماكن الرسمية (الجامعة، العمل)

ايش ممكن تلبسي؟
طبعًا في أماكن ما يسمحو إلا بتنانير ، يعني ما تقدري تلبسي بنطلون ..
في الأماكن هادي زي مثلا بعض الجامعات وزي لو كنتي مُدرسة في مدرسة ،
اذا ما كنتي حابة التنانير وشايفاها مو حلوة عليكي تقدري تستبدليها بفستان كاجوال مع جاكيت يطلع
شكلك حلوو

وفي الأماكن اللي مسموح تلبسي فيها بطلون..
البنطلون عزيزاتي لازم ما يكون ضيق لأنو احنا في مكان رسمي ،،
الضيع عالنحيفات ما يأثر أما المليانات حبيباتي ما ينفع لأنو يلفت نظر ومو حلو جسمك يكون باين بالطريقة دي ، غير انو مو حلو هوا حرام في الدين ..

وبالنسبة للبلايز اللي تلبسيها

احلى شي القمصان اللي تجي شيفون أو قطنية خفيفة بكم طويل وفي بعضها بكم قصير تجي حلوة، وتلاقو البلايز دي في زارا وفي بيرشيكا وفي مانجو وفي ايكونيك


وبالنسبة للأحذية الله (يكرمكم)
الفلاتات انا اشوفها أكتر شي مناسب أو صندل واللي تحب تلبس كعب الكعب اللي يجيكي مرررة قصير هوا اكتر شي مناسب ، اما الكعب الطوييل هادا مو للأماكن الرسمية!



طبعا شعرك تقدري تفرديه ادا كان ناعم
أما البنات اللي يعملو ميريام فارس في الأماكن دي! حبيباتي الأماكن الرسمية أبدًا مو أماكن تسوي فيها شعرك كدا! وبصراحة انا ما يعجبني حتى في الأماكن الغير رسمية زي العزايم والزواجات
لأن اللوك دا يسموه لوك غجري والاحلى عالبنات اللوك الناعم الغجري دا للناس اللي مو كويسة




نجي دحين للمكياج
المكياج طبعا لازم تحطي شي مرررة خفيف
اساس ومرطب وبالنسبة للعيون الضل يكون جدًا طبيعي يعني الألوان الترابية (بني فاتح وبرتقالي فاتح)
وتختاري واحد من الاتنين يا تكحلي عينك ويا ترسميها الاتنين مع بعض في الاماكن الرسمية مو حلو



وبالنسبة للعطور..
اختاري عطر ريحتو خفيفة مثلا زي العطور اللي تجي بريحة الفانيلا ، هادي العطور جدًا مناسبة في الصباح وفي الأماكن الرسمية ..

ونجي دحين عند الاهتمام في العزايم والزواجات ..


يتبع..

بسم الله الرحمن الرحيم..

نجي دحين لآخر نقطة في موضوعنا ، وهيا الاهتمام وقت العزايم والزواجات..

نبدأ في العزايم..

طبعًا قبل العزيمة اللي حتروحيها بيوم اعملي أي خلطة لشعرك..
واللي حتسأل ليش؟
حاقولها عشان يكون الشعر هااجد وتحسي يكون فيه حياة وحيلفت نظر ..
وادا كان في يدك أو رجلك شعر ازيليهم .

وفي نفس يوم العزيمة سشوري شعرك (طبعا مح تتروشي لأنو كنتي متروشة قبلها بيوم)
وبعد ما تخلصي عطري جسمك بأي معطر جسم ..
وفي زهور الريف في معطرات للشعر اشتري منها وعطري شعرك

وبالنسبة لـ اللبس تقدري تلبسي فستان طويل أو فستان قصير بسيط (قصير الين الركبة مو الين الفخد)
مع كعب بسيط يعني ما يكون فيه لميع وكدا ..

والمكياج تحطي مكياج اكتر من البسيط (يعني ما يكون زي ما تروحي الزواج)

وبالنسبة للعطور.. اختاري عطر ريحتو مريحة وادا احد شمها ما يقدر يبعد عنك :p

وبالنسبة لشعرك ممكن تعمليه ديل حصان أو تفرديه



نجي للزواجات ..
بالنسبة للزواجات حتسوي كل اللي قلتو وقت العزيمة ..

لكن الاختلاف حيكون في المكياج ، والكياج تبعك حيكون معتمد على لون فستانك يعني ضروري تكون الالوان لايقة ع بعض..

وبالنسبة للفستان اختاري فستان يكون ناعم وادا كنتي من النوع اللي تحب الفساتين المنفوشة اختاري فستان يكون منفوش شوية مو كتير لأنو في الأخير انتي مو العروسة :/

وبالسبة لشعرك اعملي فيه تسريحة تكون مناسبة مع وجهك ، في ناس بمجرد ما تعجبهم التسريحة يسووها وهادا غلط ! في البداية انتي لازم تتخيليها ع شكلك أو تجربي تعملي شي مشابه لها وتشوفي لو حلو عليكي ولا لا

طبعا لو كان الفستان مفتوح من عند الصدر الأحلى إنك تكوني فاردة شعرك
ولو كان الفستان مقفل ويكون قريب من رقبتك الأحلى إنو يكون شعرك مرفوع ..

ولا تنسي تختاري اكسسوار مناسب لكِ وانا عن نفسي احب الاكسسوارات الناعمة البسيطة
ما احب اللي تجي كتير .. وفي النهاية الناس اذواق

وبكدا انتهيت من موضوعي ..
وشكرًا لكل اللي دعموني وكل اللي ردو ع موضوعي وعجبهم
والقاكم في مواضيعي الجاية :*

باااي :icon35:

الله يجزاك الجنة حفظت الموضوع من كثر ماهو جميل

شكرًا حبيباتي على الردود وشكرًا لكِ اختي خلود لأنك حفظتي الموضوع :*

جاري الحفظ
وموضع مميز الله يعطيك العافيه