مغامرات عشوقه المطفوقه

سلامي للغوالي كلهم من أولهم لتاليهم وحاضرهم لغا يبهم..


أقول منذو مبطي على ما أعتقد إني ما نزلت موضوع ولي تقريباً شهر أو أكثر وأنا ادز نفسي دز على كتابة الردود من الكسل إلى فيني أحس إن ما عاد عندي ما عند جدتي ابد من الصرقعة كل ما دخلت المنتدى أروح طياران على موضوع جديد واطلع منه مثل دخلتي عليه >>> إلا أحس انه يقول لي افلقينا ما عاد عندك إلا الخراط ياداجة ...

بس إني بعصر مخيخي الأكبر لعل وعسى>>> سلمينا على مخيخك الأكبر كثير السلام..


راح أقولكم سالفة حصلت معي الأسبوع الفايت ..
فأنا الله يسلمكم ويحفظكم كنت مع الوالدة في المستشفى في مراجعه لها وأنا كالعادة مرافقة الوالدة ومديرة أعمالها والقائمة بشؤونها الخاصة>> كخخخ امحق مرافقه إلا الله يرحم أمك ويخلف عليها خليفة الصالحين بس..
المهم في ذاك اليوم كان لازم نقعد بالمستشفى (3ساعات) لزوم إجراءات التحليل إلى يفقع المرارة بس لازم اصبر كله عشان خاطر وميميتي يهون..
المهم أمي الله يحفظها خذت التحليل الأول وخذت لها غفوة ساعتين لين يجي وقت التحليل الثاني إلى بعد الفطور وقالت لي يا أما أنك تخمدين معنا لين يجي وقت التحليل ولا تأكلين تبن وتجلسين مثل خلق الله ولا تزعجينا بعد (تأمرين أمر بالغالية) النوم معصية أنام واصلاً ما أعرف اخمد إلا بسريري والأكيد أني بختار الحل الثاني واكل تبن وانتم بكرامه واهجد ..
جلست والشكوى لله ..
والساعة ذاك اليوم كأن احد أمرها ومسلطها علي إنها ما تتحرك إلا بطء والله إنها تمر بثقل غريب ذاك اليوم المهم جلست ومرت نصف ساعة إلا وبداء وقت مغامرتي مع العجز ذاك اليوم فعلاً كنت في خدمة كبار السن (عشوقة المطفوقه في خدمة كبار السن مجاناً)..:19:

العجوز الأولى..
ما تناظر زين نظرها على قدها الله يشفيها ولا معها احد من بناتها ابد جابتها السستر وحطتها جمبي وقالت لها اجلسي هنا وخذي تخطيط القلب ثم ارجعي لنفس المكان لا تطلعين ابد عشان تدخلين على الدكتورة قالت العجوز طيب نادوا عليها ودخلت على التخطيط وأنا رحت أجيب لي موية ورجعت مكاني إلا العجوز تقول أني خلصت من موعدي وأبي احد يطلعني برا لشارع عشان ولدي يقول انتظري برا أول ما تخلصين المهم أنا دقيت صدري وقلت أنا لها وأخذ العجوز وافر فربها من ممر إلى ممر لين طلعنا لشارع وجلست على احد الكراسي وقلت لها تبغين شيء ثاني قبل ما أدخل قالت لا الله يعطيك العافية (المهم إنها دعت لي لين كبر راسي ) خلاص أنا وصلتها وقبل ما رحت قلت ورا ما تروحين تشترين لها مويه وفطور عشان تدعي لك بعد>>> ماتنعطين وجه كخخخ رحت وشريت لها فطور وجلست معها شوي بشارع >>>ما تقولي كذا كان هدفك الجلسة والتمدد بشارع مب خدمة لها العجيز كخخخ المهم انا دردشنا مع بعض وعرفت إنها جايه من القصيم عشان ها لموعد وقالت لي اسمها وسوالفها الحلوة وبعد ما قلبت كبدي الشمس قلت بروح ادخل بس عند المكيف جلست نصف ساعة وأنا مدري وش صار لذيك العجوز إلى بشارع المهم بعد ما مرت ساعة كاملة إلا لدكتورة تنادي على اسم العجوز إلى طلعتها أنا بشارع خخخخ وهقه قويه واقوى من كذا ان ها لعجوز عندها تنويم كخخخخخ وأنا لي ساعة مخليتها بشارع مدري وش صار عليها قالت وحدة من الحريم ان فيه بنت قبل ساعة مطلعتها بشارع لأنها تقول ان موعدها انتهى وانا جامدة لا لي حركه ولا صوت كأني ما سويت ها لجريمة وفي الأخير أنبني ضميري بعد ما شفت الدكتورة والدنيا قايمة بالمستشفى يدورون عليها وانا بكل برود رحت لدكتوره وقلت لها انا إلى طلعتها كخخخ ماأوصف لكم شكل الدكتوره يوم درت اني انا إلى مطلعتها كان ودها تذبحني تشنقني مدري شكلها بالفعل يخوف>>> يا برودك ..:19:
المهم انها قالت روحي شوفيها طلعيها لنا مثل ما أخفيتها قلت وين جيبها لكم اكيد ولدها خذها والحين هم على خط القصيم كخخخخ لأنها لها ساعة وهي بشارع مب معقول انها جالسة ساعة بشارع قالت مايهم روحي شوفي وانا شكلي يرحم كأني مجرمه ولا خطافه الحريم يناظرون لي نظرات حقد المهم طلعت بشارع إلا مكانها فاضي اقسم لكم قلبي كان يرقع من الخوف وش اقول لدكتورة ولا الحريم يمه منهم ومن لقافتهم>>> إلا من لقافتك انتي كخخخخ..
المهم اني وقفت بشارع شوي ناظرت يمين شمال وشوي واشوف ذيك العجوز مع ولدها قدها بتركب السيارة وانا طيران لها واقول لها وراك تقولين انك خلصتي موعدك وانتي مابعد دخلتي اصلاً لدكتوره؟ قالت انا خلصت موعدي لزالت تنصب هي وجهها قلت ماعليش هيا معي نشوف وش تقول الدكتوره لك واخذها وادخلها إلا الحريم كأني لاقية كنز كلهم جاااااااااات الحمدلله جاااات جات لقتها الحمدلله >>>وانا مبققه عيوني واناظر بها العجوز وش فيها مختلف مثل باقي العجز لاهي مذهبه ولا كلها الماس عشان يستبشرون برجعتها >> والله حريم يحبون القافه بس كخخخ المهم دخلتها على الدكتورة وانا الحريم ماقصرتي والله زين انك لقيتها وين لقيتيها فيه >> ولا نجمة مشهورة كلن عرفني بس والله موقف ولا احلى ذكرني بحلقة طاش ماطاش ..
واخيراً ودعنا العجوز وهي راكبة العربانه ماخذينها لقسم التنويم والله يقومها بسلامه كان بفوت عليها موعدها بطفاقتي كخخخخ..

الموقف الثاني بعدين اقوله لكم عجوز ثانيه لكن مصرقعة بقوه>>> بعدين في قاموسي يعني في النخل كخخخ يالله اني كتبت هالصفحه من الكسل وفي الأخير اقول تم بحمدالله انزل موضوع >>> وجوده من عدمه هههه بس العب على نفسي.


بايات يالغوالي
مع مواقف عشوقه المطفوقه.
:19: :27: