كوبونات الراقية تسجيل الدخول

☆☆حرم الضابط☆☆

مغامرتي القووويه مع شعر بنتي ,,

الأمومة والطفل •

السلام عليكم ورحمة الله وبركاته ..


كيفكم ياآمهـــات .. ؟ وكيف أطفالكم ..؟ إن شاء الله بخير .. !!



السالفه ومافيها ..


بنتي عمرها الحين سنه و4 شهور .. شعرها يقهر طويل (تحت رقبتها ) وكثيير وناعم بس ملفلف ومن الفلفولات كش شعرها ...... وانا اسبحها اشوف شعرها يوصل لبداية ظهرها ,,

يفضح اللي يشوفها يقول امها ماتمشطها.. وانا والله بمشطي 24 ساعه اركض وراها وامشطها .,., بس مافيه فايده ,


ماخليت كريمات ولا زيوت ولا شي ماحطيته على شعرها ونفع .. يومين بس ويرجع مثل اول واقوى


بقولكم كيف كان شعرها قبل ..

من جات لين عمرها تقريباً 3 شهور كان لها شعر وماحلقتها ابداًً وبعد الثلاث شهور ابتدا شعرها يطيح ,, وديناها حلاق اطفال وقلناله يقص الآطراف بس ..

ومافيه فايده باقي شعرها يتساقط .. خفت يكون فيها شي ,, وديناها لدكتور وقالنا طبيعي يطيح الشعر لانه شعر البطن . مافهمت وش قصده بس طااح شعرها كله وبقا شي خفييف فووق وصارت قرعا الاشعرتين:hahaha:هههههه


المهم وأطيح فيها المسكينه تدهن مره بزيت السمسم ومره بزيت زيتون تخيلوا يومياً ليين كملت 10 شهور ويبدا يطلع لها شعر يجنن نااعم وكثيير وسايح ,, وانا انبسط وياافرحه ماتمت ,,


بعد ماكملت السنه سافرت لامريكا وكان شعرها سايح .. آول اسبوع بس الا انوااع الفلافل ,,

مااادري هو من الجو ..؟ او من مويتهم ..؟؟

وزوجي كل مره نشوف فيها صالون يقول يالله خلينا نحلقها وانا رافضه اقول لا تكبر ويطيح شعرها وللآسف كل ماكبرت كل ماكبرت الفلافل معاها .. \

بعد شهر من المحاولات قصينا اطراف شعرها ,, وقصهم للآطفال مثل وجيههم باايخ ومو متساوي والشعر هو هو ماتغير ..


وضااق صدري منه مررره وابتديت احنيها وازيت لها شعرها .. بعد ماحنيتها ابتدا شعرها يثقل ,, بس مااستمريت بالحنا لانو وحده خوفتني منه تقول مو زين للصغار ,,




واستمريت ع الزيت ولا نفع ,

اهتم بشعرها او ماا آهتم كله وااحد ,,


وامس تمسك معااي الا ابغا اقص شعرها ,,


لان عمة بنتي كان شعرها وهي صغيرة مثل بنتي بالضبط ومن كثر ماتقصها امها الحين شعرها ماشاء الله تبارك الرحمن يجنن ساايح مره ,,



والمهم وادخلها معاي الحمام واعبيلها مسبحها مويه واحط فيه العابها عشان اقص على راحتي ,,

وادخل معاها في مسبحها واحطها بحظني وهي تلعب وامسك شعرها واحش فيه هههههههه قصدي واقصصه لييين طيحت كل الفلافل ,, واحدد شعرها واحدد قصتها والله والله ابوها شافها انهبببل يقول ايه وجهها الحين طلع

وتغير شكلها 360درجه ,, وماعاد فيه لفلفات مثل اول ..

إن شاء الله كل ماشفت هالفلافل بقصها لييين يهجد شعرها ..

---------------------------------------


 ملاحظات :

*قبل لا اقصها كنت شايفه مقاطع ع اليوتوب لقص شعر الأطفال والحمد لله استفدت منها كثير ,,
لاتقولين مااعرف بتعرفين ان شاء الله بس انتي ركزي .,

**حاولت الهي بنتي بالالعاب والمسبح عشان اقصها على راحتي من غير صياح ,,


***بعد ماقصيت شعرها روشتها زين لان الشعر بيكون لاصق بجسمها ,,


****فالليل حطيت على شعرها زيت زيتون.. ونومتها ويوم قامت الصباح سبحتها وشعرها مرره مرره فيه تغير مو مثل اول ..



وبث ..

إن شاء الله تستفيدون من قصتي واللي عندها معاناه مثلي تتخذ القرار ولاتحتار..

واللي لقت لها حل غير القص .. تورنا :D
61
107K

يلزم عليك تسجيل الدخول أولًا لكتابة تعليق.

تسجيل دخول

јόόя๏̯͡๏Ў
јόόя๏̯͡๏Ў •
فعلا احلى شيء الي سويتي
وهذا الحل
الله يخليك لهاا
Elaaaaf
Elaaaaf •
ياحليلك ياتوته انت ومغامراتك مع بنتك هههه
ان شاء الله ماتشوفينه شهر الا هو يتهبهب من النعوووومة
تــــوته
تــــوته •
هههههههه

يااحليلهاا بنتك في كل قسم موضوع

انا بعد ولدي ناعم بس مفلفل وماالقيت له حل الا القص

ولاحظته مع كثر القص يكثر مااشاء الله

وع فكره اكبر من بنتك بشهر ..<< تلمح خخخ
مصرقعة هانم
مصرقعة هانم •
ينفع للي عمرها 6 شهور << بادي يفلفل ويلحق اخوانها :06:مع ان شعري ناعم ماشاء الله
لكن فعلا لاحظت ان الشعر المفلفل والناعم احسن شي له القص في الصغر
واذا كبرت تغير
<< بتروح تدور باليوتيوب طريقة قص الاطفال:35:
جزاااك الله خير ياقمرررر
كريسلي
كريسلي •
((
))
(( <<<< ارقص على كل بنات امريكا عجبتني مرررره هههههه

الله يحفظ لك بنتك يارب ومشكوره على تجربتك ياتوته