وينك يبدور تغلين علينا ترانا ادمنا سواليفك ....الله يسعدك يبدوره ياحلوه خذي راحتك بس لا تبطين :26: ....

من وين أبدا ياأخياتي...

وقد عدت أمس بس...

من لندن :)
.......


أمس رحنا لنده....

(النطق القروي للندن أي والله القراوة مايقولون لندن يقولون لنده )
:)

كان ابونا من يوم جينا لهنا وهو كل خميس وجمعة (قصد سبت واحد) يقول نبي نروح باتسر لنده نعسّل وننبسط وناخذ لنا فنتق...

طبعا لما جا رمضان وانشغل بدراسته قال خليه ايام العيد:)


يوم خلّص العيد قال خليه اذا دخل ذو القعدة يصيرون الناس كافّين :)


يوم خلص ذو القعدة قال خليه لعيد الضحية :)


طبعا الاسبوع الي راح قلت له شف..استح على وجهك لو انك مير ماوعدتني توديني كان اهون بس شف كم لك واعدني ؟؟موب عيب؟؟؟

بعدين هماك عطلت ؟؟

خلاص خل نروح يوم الاثنين وش ورانا يعني؟؟؟

خل نحجز فنتق :) ونقعد لنا يومين نسوي نفسنا بشهر العسل ونرجع

قال وش وش ؟؟

وش فنتقه وحنا عندنا شقتنا!!!!!!!!!!!!



قلت يابوي نبي نقعد بها ...نبي نصير معاريس...

قال لاااااااااااااااااا


الفلوس الي بندفعهن في ايجار فندق بلنده ...


ندفعهن اجار القطار اللي يرجعنا لشقيقتنا...

:)


صح ولا ماصح ؟؟؟


صح يارجيلي...صح ...


........................


قمت يوم الثلوث واصلي الفجر واصحي فيه بالطق والطقيق واصلح قهوتي قلت نتقهوى بالقطار

اول مرة تصير شخصيتي قوية ويقوم وهو يقول لي ايه سمي وابشري...

قام الرجال يحلّق ويمسس واكوي البنطلون وحركات

قلت ها خير وين رايحين حنا لنده ولا كان ولا فينيس؟؟

من تبي تقابل يوم انك محلق ومكددن الشوشة؟؟؟

قال ابد بس ذي لنده ....مب برايتن وخياسها..


انا تأثرت فيه قمت كويت عباتي وشالي وهو يمعطني بالقوة لايفوتنا القطار...

عاد انا ياحياتي طافرتن بالسفر..يقالك انا مسافرين يعني ...لاولوين؟؟؟للنده عطيت الله ...


وآخذ الكاميرة واشحنها والفزها بوسط الشنطة والهث ياحياتي حياة نفسي (رحمت نفسي والله )


واجلس جنب الدريشة وابدا اصور...

قال لي اهبطي واركدي يابنت ني ننزل لمحطة المدينة الاساسية بعدين نمسك قطار برايتن فكتوريا

ياحليلي حليلاه فتحت الكيس حق القهوة على طول (اصب حبيبي )

قال اركدي ارررررررركدي...

سبحان ربن خلقتس ....

تسيف صبرتي تسع شهور ببطن أمتس ماشقيتيه ولاطرتي بها من الطفاقة؟؟؟


عاد تخيلت نفسي ببطن امي (ماادري تقدرون تخيلون نفسكم؟؟انا مااحس اني كنت يوم من الايام ببطن امي احس اني طلعت زي ماانا الحين ..شعر منفوش ونظارة وخدود مشققة من البرد)

المهم تخيلت نفسي امي تطير بسببي وانا شاقلتها بكرشتها يابعد قليبي قليب اميمتي...

قطع زوجي علي هالخيال المضحك وهو يقول انزلي يالله ماتشوفين القطار وقف؟؟

وانزل واركض وراه والاه قد جا قطار لندن فكتوريا....والا البرد بدا ينزل وهم قايلين لنا بالاخبار انه جون وش حلوه...


ياتسذبكم ياحقون الاخبار :)

.........


يتبع

ركبنا القطار أخيرا....قلت لابونا هلحين وراك ماخترت كرسيين بطاولة عشان نصب ونفرفش

قال ياحليلك بيخلونها لك الطاولة؟؟؟

بيجون يتضبطون قدام خشتتس

الا نزلي الطاولة الي قدامك بالكرسي وصبي يالله ...


قمنا (نتقهّز) من القهوة...ونرتشف...وفاح عبق القهوة والزعفران في القطار لدرجة قام القطار يرقص عرضة ...


ناااااااااحمد ااااااااااااااالله جااااااااااااات على مااااااااااااااااااااانتماااااااااااانى....:)

طاطاطق طاطاطاق



يوم جلسنا قلت بصور بصور بصووووووووووووووور

قال ميخالف بس اصبري لين تجي المناظر اصبري لين نخلص قهوة...

قلت على كذا بناصل لنده وانا ماصورت قال خلاص صوري زي ماتبين ...


ويوم اشغل الكاميرا وتتحول الدنيا لأسسسسسسسسسسسود


بسم الله اثارينا دخلنا نفق وتنضغط اذاني بغت يتفقعن...قلت طاااااااااعون وش ذا؟؟

قال نفق نفق


المهم وتشتغل الكاميرا وكل ماجا منظر يهبل ماتطيع تصور..

وكلما دخلنا نفق اشتغلت...

آخر شي طلعت بثلاث مقاطع واللي قدامي ماغير تهرج بالتلفون ...سجلتها كاميرتي...


الموووووووووووهيييييييييييم


اخيرا وصلنا فكتوريا...

فكتووووووووووووريا يافكتوريا


هذي اللي يقولون اكبر محطتن بالعالم ؟

ذي اللي مسمينها على عجوز بريطانيا اللي خلدها التاريخ البريطاني الملكة فكتوريا اللي حتى سمو عصرها والاخلاق العائلية القيّمة اللي انتشرت فيه العصر الفكتوري...


كانت متدينة جدا هالعجوز وماعندها لعب ولايمه ارحميني ولاشغل حريم ...

تشوفين الحريم بعصرها كانوا مكسورات جناح الوحدة الا مات ابوها وهو مديون لاحد تزوجته بالغصب رضت ولاانرضت...

وياويل اللي تطالب بتعليم مراة ولاخرط فاضي ولاقيادة المرة للسيارة ...ماعندها لعب فكتوريا (عاد المشكلة ان السيارات مايمدي اخترعوها بعهدها ) الحريم مالهن الا الثبر والقبر ...

هذا شعار الملكة فكتوريا وعجز الزلفي....:)


عجز الزلفي فكتوريات اجل ...يالله الخيرة شفتوا اثار الاستعمار الانجليزي..

المهم ....



وننزل لفكتوريا ...ياااااااااااه وش ذالفرق يوم طلعت من المحطة لندن عن برايتن!!!!!!!!!


صراحة فرق مابين السما والارض...

فرق مابين الحلة والمحمدية ...

فرق مابين مدارس الرياض والمملكة ومدارس النسيم والنظيم...

يعني شي شي شي ....


اول مرة من يوم جيت بريطانيا اشوف شارع نظيف مافيه تفال واعقاب سجاير وبلاوي تسلاب...

والغريب فعلا انه ماكان فيه ناس معاهم تسلاب...ممكن تقولون لنا ليه ياسكان لنده؟؟؟


وندخل الشوارع ....


هاذي والله اللي يقولون عنها انغلترا صدق...

قال لي ابونا اركدي يامرة


تدرين اننا على بعد خطوات قليلة من قصر الملكة ؟؟؟شي طبيعي بيصير المنظر والمكان يفتح النفس



قلت انا قصر الملكااااااااااااااااااااااااااااااااااااه؟؟؟


والا والله باكنغهام بالاس قدامنا...


!!!!!!!!!!!!!!!!!!!!!!!!!


ياناس انا بحلم ولا بعلم؟؟؟

يارب تعز الحكومة...


يالله تديم عزهم ...


ونقوم نقطّي انا وابونا لين وصلنا باب قصر الملكة :)

ياحليل ام تشارلز حليلاه ....


قال ابونا تأخرنا ماشفنا تبديل الجنود الساعة حدش ....منظر فعلا يهبل القلب...


بعدين اخرتينا الله يهديتس على فطور ام تشارلز وشوي مايمدينا بعد على موعدنا مع بلير بالبرلمان

يالله تهديها بس...


المهم ....واقرب من الناس متجمهرين اللي يصور واللي يكبس واللي يغازل واللي يرقم (حشا بالفيصلية موب ببكانغهام :) )



عاد واستل كاميرتي من غمدها ....واقوم طاع طاع واصور ذولاك الجنود اللي عليهم جاكيت رمادي يرافسون بالارض


تقل مهبل ان اكان نفسي اشوف ذولاك اللي عليهم احمر وقبوع اسود اللي مايرمشون هذولا اللي صدق ودي اصور معهم


بس ذولاك مادريت الا واحدن منهم يحك كتفه الله يخزيه


هذا وانت من جنود الملكة اجل لو انك من المارينز الجلوف الجحوش كان وش سويت؟؟؟


واصور ابونا قدام القصر...وقدام التماثيل اللي قدام القصر...ومع الملكة الله لايخلينا منها...:)


وهي عاد تخلص المقابلة مع الملكة وشاتونا براه (ياللا ياللا)

ونطلع ونشوف اعمدة البرلمان من بعيد قال يالله لايفوتنا معود بلير عاد فوتنا الفطور لانفوت الغدا مع بلير (ياخف طينة رجلي صدق:) )

ونطير هناك والا والله البغ بن توها داقتن على الثنعش ...قلت وراها طرما ماتحكي الساعة ثنعش ولادقت وراها؟؟؟


قال لاياماما الحين ثنعش وعشر تبينها تطن كل دقيق يعني والا شلون؟؟؟

المهم وتجي وربع مادرينا الا قالت طاااااااااااااااااااااااااااااان


ياخي ياناس اموت في بغ بن


من يوم اني صغيرة وانا احلم اكون جنبها والا اطير لما زي بيتر بان


واااااااااو

وهلحين تحقق الحلم بس مادقت الله يخزيها ولاطرت لمها

واصورها وصور البرلمان وانقحشت كاميرتي صور ...

يوم ذا ....ويقوم رجلي عصاير بطنه تصوصو...قلت هه؟؟؟

طب وفطور بلير مادري غداه قال اقول لابوتس لابو بلير واللي يمزح معتس...

غوه لبرغر كنغ ولا بتزاهت (آآآآآآآآآآآه ذالمطعم طلع مع كل فتحات راسي)

قلت لاوالله جايبني لندن عشان ناكل ببرغر كنغ وبتزاهت


والله علي الطلاق ان تغديت هناك


قال طيب ميخالف خل نروح بيكادللي اجل وناكل هناك به مطاعم زينة

ويمسك يدي وينزلني على درج طويل طوييييييييييييييل

وش انت ياذالدرج


قال المترو عطي الله ...


المترو وماادراك مالمترو

والقصص اللي صارت هناك وال وال وال...



من يوم ان الناس لونهم ابيض واسود وهي المترو فيه ...


شوفي اشلون حفروا الارض حول مية متر بسم الله وكيف سووهالتخطيطات وهالبلاوي والقطار اللي دخل فيها ويطلع


وننزل المترو وبسم الله حسيت جد اني بوسط قبر....

يمممممممممممممممممممه هلحين لو جانا صاروخ ولا زلزال وين نبي نطلع منه يالله لاتميتنا ميتت حسر؟؟؟


ويجي ورررررررررررررررررررررررررر


ويتقاحصون الخلق ويتداحشون بوسطه تقولون عيشتهم وندخل وندور كرسي آخر شي وقفنا بكرامتنا لين نزل ...والحق يقال اني بغيت أمصط مع قهوتي وشنطتي اللي تدودل من كتفي وتصقع بوجه الانغليزية اللي قاعدتن على الكرسي بمنتهى البرود ...وماقالت شي :):)


انوااااااااااااااااااااااااع البروووووووووووود يعني ماصقعتها مرة ولامرتين ولا عشر

بعدد هزات المترو صقعتها وماقالت شي ياحياتي :)


والله انهم نكتة هالانغليز...

عاد يوم نزلنا ويقوم رجلي يجعبني لمخرج غير مخرج البكاديلي


يوم درينا ولا والله طلعنا على مايفير...حي الشيوخ !!!!!!!!!!!!!!!!!!!



آآآآآآآه يامايفير من يقربك؟؟

انا عاد لاتحسبوني قد رحت لنده من قبل؟؟


ترا كلها الله يخلي المونوبولي حفظتني اسماء شوارع لنده كلها...



يتبع...ياحبيباتي...

يحبي لسواليفك الي ما تنمل ...يليتك تحطين لنا صور عن لندن ...وأما سالفة المنوبولي ضحكتيني والله اثاريها اسماء شوارع حقيقيه ؟

اقولتسن عقب ماصحت وفشيت قليبي ويقول ابونا تعالي نفك ريقنا وش تبين انهجي علي...(طبعا هذا من فنون الرومانس عند أبونا الله لايخليني)..

تبين نتقهوى في ستار بقس قلت لاماباه ...

قال اجل تبين بكوستا كفي...قلت لامابي (على بالي دلع ياخنت حيلي :( )

قال اجل انطقي عمرتس ماكلتي (وهذي ترا من فنون الرومانس طبعا :) )...
قلت ماابي....شيء...وانا اناشق...


:42: :42: :42:
رهيبه ارومانسية
تراني قاعدة اضحك من قلب