لوليتا حبيبتى انا عاوزة اقوللك انى عملت الشاتوه اكتر من100مرة وبقيت مشهورة بيه فى العيلة وبيطلبوه منى وباعمل منه كل حاجة كيك وكب كيك وجاتوه وتورتة وكلهم احلى من بعض واحيانا اشيل الكاكاو واحط مكانه جيلى فراولة او مانجا وبيبقى تحفة
وباعمل نفس مقاديرك مع اختلاف بسيط الدقيق كوب وربع والبيض 3 مش2
انتى بتقولى الصوص طعمه زيت يعنى طعمه وحش والا ايه
وبتقولى مسخوطة وناشفة انتى حطيتى الدقيق والبودر فى الخلاط
المفروض انك تضربى البيض مع الصوص فى الخلاط وتشيلى الغطاء الصغير علشان الهوا يدخل وتنزلى بيه على الدقيق والبودر وتقلبى بخفة
على فكرة كان فيه حد عمل منها سويسرول وان شاء الله اجربها قريب

الحاجات اللى وعدتكم بيها يابنات والحمد لله بطلت اشتريها خالص

الحليب المحلى بطريقتين اما الحليب السائل او البودرة
لو سائل يبقى كيلو حليب وعليه كوبايتين سكر ونحطهم على النار ونقلب لحد مايدوب السكر واول مايغلى نهدى النار خالص ونسيبه لحد مايتقل ويقل النص تقريبا بس نديله تقليبة كل دقيقتين وبعدين نطفى عليه ونحط فانيليا

الطريقة التانية اسهل بكتير
1 كوب سكر ناعم (مش بودرة)

1 كوب حليب بودرة

نصف كوب ماء ساخن

1 ملعقة كبيرة زبدة (بدرجة حرارة الغرفة)

فانيليا
نحط كله فى الخلاط ونخلط كويس وبس

النوتيللا
كيس كابتشينو بطعم البندق ندوبه فى اقل من ربع كوب ماء دافى يعنى حوالى 3 معالق
فى بولة نحط معلقتين زبدة لينة نصف كوب حليب بودرة ونصف كوب سكر بودرة وتلت كوب كاكاو خام وفانيليا
وننزل عليهم بالكابتشينو ونقلب ممكن بالشوكة او بالمضرب السلك
والافضل ننخل الكاكاو والسكر عشان الخليط مايكلكعش ولو احتاج مياه تزودى معلقة معلقة لحد ماتوصلى للقوام اللى انتى عاوزاه
انا باعملها تقيلة علشان الساندوتشات ولما احب ازين بيها كيك او دونات او اى حاجة باخد الكمية اللى عاوزاها واخففها

ا

اكمل بكرة ان شاء الله علشان الفجر هيأذن
تصبحوا على الف خير

السلام عليكم

امانى لف شكر يا حبيبتى على شرحك الوافى

حنان نورتى الملف وما تغيبيش تانى لو سمحتى لانك وحشتينا اوى ولو حتى مش عامله جديد كفايه طلتك الحلوة فى الملف

ام زوما ماشاء الله عليكى تسلم ايديكى والملف نور بوجودك ومستنين باقى الحاجات ان شاء الله

الكابتشينو ماركه ايه لو سمحتى