فطومة شوفى طريقة سندريلا فى صفحتين فاتو هى جربتها وبتشكر فيها قوى

اريد طريقة الكوارع المصرية مثل الي نشوفها في التلفزيون تكون مرقة

الكوارع
أهم حاجه نضافتها وغسيلها .. وبعد كده إدعكيها بشوية دقيق وملح ونص كوب خل .. وسيبيها متبله بيهم فتره في التلاجه وبعد كده أشطفيهم كويس ،حطيهم في حله فيها ميه مغليه .. وسيبيها تاخد غلوه واحده علي النار ..وأرفعيها وأشطفيها تاني هاتي حله نضيفه حطي فيها قطعة زبده صغيره علشان تسيحي فيها فصين مستكه .حطي ميه سخنه علي المستكه وبعد ما تغلي ضعي الكوارع ..ضيفي بصله مقطعه أو مبشوره ونص ملعقه صغيره حبهان مطحون .. وملحي الشوربه أتركيها تستوي علي نار عاليه في الأول وبعد كده وطي النار لغاية ما تتم سواها

فتة الكوارع
المقادير:
كورع ( نظيف ومقطع )+ملح - فلفل أسود - فصين مستكه – حبهان+2 بصله كبيره مقطعه ،مقادير الفته :عيش ناشف محمص ( بلدي - سن - شامي )+3 كوب رز مستوي بالزبده+م ك توم مفروم+ربع ك خل
الطريقة:
أول حاجه نغسل الكوارع كويس وندعكها بالملح وشوية دقيق وليمونه وشوية خل ونتركها حوالي ساعه .. وبعدين نشطفها نضعها في حله بها ماء علي النار وتاخد غلوتين .. وبعدها نغسلها تاني نحط في حله ملعقة سمنه ولما تسخن نضع المستكه ولما تسيح نضيف قطع الكوارع ونقلب وبعد كده البصل مقطع والحبهان والملح والفلفل .. وعلي طول نغطيها بماء مغلي ونتركها لتستوي ( كتير بيفضلوا يطفوا النار عليها بعد نص ساعه غليان ويتركوها حوالي 3 ساعات وبعدين يكملوا سواها .. يقال كده خواص الجيلاتين في الكورع تنزل في الشوربه )..عمل الفته :عمل الرز الأبيض .. يفضل نقعه نص ساعه ولتسويته في هذه الحاله ننقص الماء 3 كوب رز عليهم أقل من 3 كوب ماء + ملعقة زبده وملح نحمص العيش في الفرن ونكسره في طبق غويط ونسقيه بالشوربه في مقلايه نضع ملعقة سمن وملعقة ثوم مفروم وأول ما يبقي لون الثوم روز نضيف الخل وياخد غلوه .. علي طول نوزعه علي الفته نفرد الرز علي وش طبق الفته .. والكوارع في سلطانيه مع الشوربه

الكوارع بالخل و البقدونس
المقادير:
عدد 2 كوارع+3 لتر ماء+بصلة – جزرة+ملح – فلفل – 5 وحدات فلفل اسود صحيح+2 معلقة كبيرة زيت+2 معلقة كبيرة خل+معلقة صغيرة بقدونس +معلقة صغيرة بصل مفروم
الطريقة:
نسلق الكوارع فى الماء مع البصلة والجزرة و الملح والفلفل لحد ما تستوى تماما، نشيل اللحم من العضم ونسيب اللحم لحد ما يبرد، نخلط الزيت مع الخل مع البصل المفروم مع البقدونس مع بعض ،ونضعها على اللحم البارد ونقلبها ونسيبها حوالى نص ساعة بس كل شوية تقلبيها تقليبة مع التتبيله شيليها من التتبيلة وضعيها فى طبق التقديم مع شرايح الطماطم و الليمون

الكوارع بالدمعة
المقادير:
2 كوارع مسلوقة+كوب من شوربة سلق الكوارع+ربع كيلو طماطم متصفية+ملح – فلفل+معلقة كبيرة سمن+بصلة صغيرة مفرومة +معلقة كبيرة خل+5 فصوص ثوم
الطريقة
نضع السمن على النار ونحمر فية البصل ثم الثوم حتى يصفر،نضع الخل على البصل والثوم لحد ما يغلى ثم نضع الطماطم، ونتركها لحد ما تتسبك ثم نضع كوب شوربة الكوارع ونسيبها لحد ما تغلى ، شيلى من عضم الكوارع وضعية فى الدمعة على نار هادية لمدة ربع او ثلث ساعة وتغطيتها اثناء السوى رصصى الكوارع فى طبق التقديم وصبى عليها الدمعة ( الصلصة )

جزاكم الله خيرا يا نورا حاضر هارجع لها

عندي سؤال تاني

التمر هندي بيتعمل ازاى؟ يعني انا جبته ونقعته وصفيته وضربته في الخلاط مع السكر ونقطتين روح تمر هندي وطعمه طلع مش قد كده تفتكروا ايه الحل اضيف له كركديه يعني؟