بقولكم هل فى خلطة تتبيلالواحد ممكن يعتمدها فى كل و لا كل اكل ليه بهاراته طيب ياريت تساعدونى بقى

1- الفراخ المشوية

الفراخ المقرمشة او البانيه

السمك المشوى

السمك البانيه

السمك المقلى

الجمبرى المقلى

الجمبرى البانية

الكبدة العادية

سلق اللحمة و الفراخ ( يعنى احط ايه فى المية و انا بسلق )




اه صحيح بهارات الطبخ بقى زى البامية و الوبيا الطبخ عامة تبقى بهاراته ايه

عشان يبقى طعم مميز مع العلم انا اكلى مش حار عشان عندى مشاكل فى المعدة



معلش يا جماعة انا اسئلتى ممكن تكون بدائية لانسان او تافهة معلش اعذورونى

اصلى مليش حد غيركم فى الدنيا انا مقطوعة من شجرة فياريت تسحملونى شوية

انا عارفه انكم اتكلمتم كتير فى موضوع التوم والبصل بس قلت مجتش عليا باه انا كمان اقول رأيى :cook: انا الاول كنت باعمل التوم والبصل واحطه فى التلاجه بس لما بقيت شاطره (شويه) فى المطبخ بقيت باعمل البصل فى ساعتها على طول ومبقاش بياخد منى وقت خااالص علشان باقطعه بطريقه الشيفات على البورد (محدش يضحك عليا ) وباقطعه بالطول والعرض زى طريقتهم بالظبط فبيكون سهل فعلا وسريع اوى اوى لكن لو عايزه كميه للمحشى مثلا فابعمله فى الكبه وخلاص
اما بالنسبه للتوم فالاااااا يمكن حابطل احطه فى الفريرز ابدا لانى باكره ريحته موووت ومعنديش استعداد كل يوم تكون ريحة ايدى وصوابعى توم من التقشير فابجيب كميه من التوم الكبير وانقعه فى ميه الاقى القشره طلعت وحدها افرمه فى الكبه واحطه فى علبه واغطيها ببلاستك تحت الغطا واقفل عليه الغطا وبعدين الفه فى بلاستيك تانى علشان اضمن ان مفيش حاجه فى الفريرز تلقط ريحته وبس على كده
رغايه اوى .. صح ؟؟؟

تسلم ايديكى يا جميل انا نزلته وهشوفه على رواقة

تقريبا ما شاء الله كل البنات ردو عليكى بس بالنسبة للثوم فى طريقة حلوة برضه انه بتفرميه فى الكبة كمية كبيرة وتخلطيه مع زيت زيتون وبعدين هيبقى زى العجينة تفرديع على كيس بلاستيك او سوليفان وتغطيه وتحطيه فى الفريزر وكل ما تحبى تستعملى منه تكسرى منها حتة وعلى الحلة والزيت على طول
بالنسبة للبصل انا مثلا لو بسلق فراخ او لحمة وكانت البصلة اللى هحطها للشوربة كبيرة باخد نصها استعملها واخلى النص التانى زى ماهو من غير تقطيع فى الفريزر ولما اجى اسلق مرة تانية بسقطها فى الشوربة وهى مجمدة على طول

تسلم ايديكى يا جميل
انا كان قصدى برضه نفيد بعض وندى افكار جديدة
يعنى انا مثلا بعمل تبولة وفتوش وسلطة خضرا طبعا فيها يجى 8 اصناف او اكتر وكول سلو العادى او بحط معاه مرات بشر تفاح واناناس بيبقى رهيب وسلطة الخيار المخلل والبنجر وبقدونسية وسلطة بطاطس بالمسطرده وفتة باذنجان بتاعة رواء وسلطة مقالي
ده اللى فاكراه دلوقتى

منتحرمش يا قمر

انا بحط فى الفريزر حتى فى الايام العادية من غير رمضان شوربة عدس بحطها فى علب عل ىقد المرة وبجمدها وكبيبة وكبة بطاطس وسمبوسك واللحمة المفرومة بعصجها ولو فاض منها بشيله فى الفريزر برضه



فكرة كويسة برضه بيبقى زى برطمنات الثوم الجاهز بس انضف وافيد بدون مواد حافظة والزيت بتاعة بالمرة خدى منه معلقتين تلاتة فى اى حمام زيت ممكن تعمليه لشعرك واهو اخدتى فايدة الثوم منه

اولا انا زعلانة عشان اكلتى العيال برة وكمان شاورمة انتى مابتسمعيش اللى بيحصل فى الدنيا يا بنتى لحوم خنازير ولحوم فاسدة وعدم نضافة وقلة ضمير ارجوكى امنعى اكل برة ده لو مصرة يعنى يبقى فى راى يا اسماك يا كشري فى محل كبير ومعروف زى التحرير مثلا ومش كتير يعنى مرة فى الشهر 2 بالكتير على اساس التغيير

ثانيا اكل برة ده السبب الاساسي اللى بيخلى الاولاد يكرهوا اكل البيت عشان مخهم اتبرمج واتعود على فلافور المواد المصنعة والنكهات اللى بيحطوها فى اكل برة

ثانيا نيجى للاطفال الحلوين اول حاجة حطى فى دماغك ان ده الطبيعى بتاع الاطفال خاصة فى السن الظريف ده يعنى متتخيليش ان فى طفل فى سن اولادك مامتة تحطلة الاكل ياكله كله لوحدة ويقول يا سلام يا مامى الاكل جميل
لأ مفيش كلهم مقرفين فى الاكل وبياكلوا بطلوع الروح

نيجى بقى ازاى نعود معدتهم على الاكل عشان يتعلم يجوع وياكل بعد كده
لازم يكون فى اغراءات يعنى مثلا شوفى اللى بيحبوه كارتون او لعبة معينة او نوع شوكلاتة مثلا
وتقولى الحاجة دى اهية قصاد عينهم ومش هانخدها الا لما ناكل مش بس كده طبعا هما مش هايمسكوا الطبق ياكلوه على طول
لأ لازم تقعدى زى الشاطرة كده على ترابيزة او على الارض وتلميهم حواليكى توفيرا للوقت وطبق و3 معالق وكل واحد معلقة ومين الشاطر اللى هاياكل دى همممممم او اللعبة الشهيرة طيارة 707 داخلة المطااااااااااار مين هايفتح بقة يبقى المطار اللى تدخل فيه الطيارة وتعمليلهم كأنه سباق والشاطر اللى يفتح بقة الاول وهكذا

تحكيلهم حدوتة وانتى بتأكليهم يعنى فكرى كده هاتلاقى افكار طتير اوى


انا عملت مع بناتى وخاصة الكبيرة من وهى صغيرة حاجة هى علميا مش صح بس فعلا كانت متعبة لدرجة غير طبيعية وجربت معاها كل اللى قريته واعرفة وفشلت ايه الطريقة دى الهانم كانت بتحب الشوكلاتة والعصير جدااااااااااااااااااااااااااااااا وطبعا مابتحبش اى اكل تانى جداااا جداااااااا فاللاسف اتطريت عشان اكلها اجيب بار شوكلاتة او علبه عصير ويلا لازم تاكلى المعلقة النونو دى عشان ناخد شفطة عصير او قطعة شوكلاتة واقطع الشوكلاتة صغير بحيث على ما خلصلها طبق الاكل يكون اكلنا حتة مش كبيرة شوكلاتة بضحك عليها يعنى بس حطاها قدامها اغراء عشان تاكل شوية شوية لما اتعودت تاكل شوية منعت الموضوع ده على الاكل وبقى لما نخلص اكلنا ناخد حاجة حلوة

الاطفال كمان بتشجع بعض على الاكل لو واحد اكل الكل يبقى عايز يقلده

حاجة تانية شوفى هما مايلين لنوعيات اية واعمليهلهم لان مينفعش طبعا تحت اى اغراء ياكلوا حاجة مبيحبوهاش

يعنى شوفى هما بيحبوا المكرونة ولا الرز عادة معظم الاطفال ومنهم ولادى يحبوا الرز حاف من غير لحمة ولا خضار


ماشي امشي معاهم واحدة واحدة مرة رز حاف مرة ضيفى عليه شوية عصاج صغيرين على خفيف مستخبين فى وسط الرز

ممكز رز تزودى عليه معلقتين شوربة مغذى برضه

ابشرى عليه جزرة او اعمليه بجزر وبسلة يبقى شكلة ملون وحلو

شوفى لو بيحبوا السجق او كفتة او بانية او شاورمة اعمليهم ساندوتشات فى البيت نضيفة شبة بتاعة برة

من الاخر ما تيأسيش افضلى ااقرى وجربى والنت ملياااااان وصفات مش هاتخلص واكيد ان شاء الله حاجات منهم هاتعجب اولادك

هو فى نقطة تانية الجو اليومين دول سادد نفس الكل كبير وصغير حتى لو بياكل عادى هاتلاقيه فى الحر نفسه اتسدت

فى بعض الناس اعرفها بيلجءوا انهم يدوا اطفالهم دواء عبارة عن فيتامين مقوى وفاتح للشهية فى نفس الوقت بس انا محبتش اجربة الحقيقة


افتكرت حاجة تانية كل اطفال مصر بيحبوها رز وملوخية جميلة والملوخية معمولة بشوربة فراخ او لحمة تماما جدا ولذيذة
وكمان الملوخية فيها ميزة عن اى اكل انك ممكن تخبى فيها نساير فراخ او لحمة او عصاج مش هايبان فيها خالص وهايكلوها ان شاء الله

ادى مثلا حاجة ممكن تعملهلهم كل اسبوع مرة وخلصنا من يوم :)

شكرا يا جماعة على افكار التوم والبصل

انا طول السنة مش بخزنهم يعني جربت مرة تقريبا وكان كويس

بس انا ناوية اعملهم كدة عشان رمضان ان شاء الله

رررباب

شكرا على طريقة المكرونة هاجربها ان شاء الله


ام مرام

انا كمان ابنى مش بياكل خصوصا فطار وعشا يعني بيبقى جعان ولما اجيبي الاكل يقول لا مش عاجبه
ومايرضاش غير بالفاكهة او عصير

ربنا يهديهم

انا فاكرة مرة انيا سبانش
قالت انها بتعمل عجينة اللازانيا ومن غير ماكينة بتفردها كويس ومش لازم شكلها يبقى مظبط اوى لانها هتستوى وتتقطع يعني تتظبط في الصينية

بس انا مش مجرباها