اللينكات اللى حاطاها ام مرام واحدة فيهم الزبادى كتير قوى والثانية الطحينة كتيرة قوى على كمية الباذنجان هو على الباذنجانياية الوسط معلقة طحينة ومعلقتين زبادي معقول

شكرا يام مرام علي اللينكات انا قلبت فيهم اخدت فكرة برضو
نورا ياجميل شكرا حبيبتي فعلا انا استغربت فيه طريقة منهم كوب زبادي انا اخدت افكار برضو وان شاءالله اجربها ويارب تطلع مظبوطة انا مشكلتي اني مش بهتم بالسلطات علي السفرة مع انها مهمة جدا وساعات بتاكل اكتر مالاكل العادي

سؤال كمان بما انك موجودة يانورا انتي بتحطي عصير لمون علي ورق العنب؟؟

نورا الله يكرمك ردي علي دلوقتي ولو عندك طريقة ابلة دون في ورق العنب نزليهالي دلوقتي لاني ان شاءالله عاوزة اعمله بكرة انا عملته كتير الحمد لله بس برضو عاوزة اعرف طرق مختلفة لقيت كتير بيحطوا عليه عصير لمون فيه ناس بتحط في الحشوة وناش بتحط شرايح علي وش الحلة خايفة يمزز المحشي

على فكرة يا قمرات

كتاب منال العالم تحفة وفي حجات حلوة قوي

وبنسأل عليها

مرسي يا فراشة:)

بعد عناء تم كشف سر الكفته المشويه على الفحم الموضوع للاخت مهاني 2010 من فتكات جزاها الله خيرا
السر ده عرفته بعد مجهود جامد قوى قوى قوى
بس مش خساره فيكم علشان الرجاله بس ماتقولش أنهم بيعملوا اللى مانعرفش نعمله
و على فكره راجل هو اللى اكتشف السر ده و قالهولى

المكونات دى لكيلو لحمه و يقاس عليها عند زيادة الكمية
1- اللحمه تكون مفرومه فرم خشن مش ناعم
2- يضاف 20% دهن بتلو (من عند الجزار أسمه نطر)
3- تتبل الكفته بملح و فلفل و بشر بصله متوسطه مصفاه تماما من المياه لإننا هانحتاج الميه عند الشوى يعنى احتفظى بيها
4- معلقتين برغل ينقعوا فى ماء لمده ساعه ثم يصفوا من الماء تمام و يتم فرمهم مع اللحم و البصل
5- يقسم الكيلو على حسب عدد الأسياخ و يوضع على شكل كرات فى الثلاجه لمده 3 ساعات
6- فى طبق او صينيه ضعى مياه البصل و عليها معلقه بيكربونات صوديوم (بيكينج باودر)
طبعا فى ماده تانيه بتستخدم لكن صعب تلاقيها عند أى عطار عموما هاقول عليها اللى يقدر يجيبها يحطها بدل البيكربونات اسمها (عطرون) و هى على شكل الملح الخشن و يتم تذويبها فى ماء و تصفيتها من الشوائب و طبعا يفضل إذابتها فى ماء البصل
7- طلعى الكفته من التلاجه قبل الشوى على طول و تمسكى قطعه الكفته على ايدك و تحطى السيخ عليها من المنتصف و تضغطى اللحمه عليها و تبدى تفرديها على السيخ بالضغط المتواصل لفوق و تحت لحد ماتتفرد على السيخ بالسمك المناسب ماتبقاش تخينه قوى و لا رفيعه و الأهم بعد ماتفرديها بللى ايدك بميه البصل اللى عليها كربونات او عطرون و اضغطى على مسافات متباعده بصوابعك علشان تعملى فروق فى السيخ ماتبقاش الكتله كلها حته واحده ده بيقلل من وزن الكفته على الشيخ و ماتقعش
(فايده البيكربونات أو العطرون انه بيخلى اللحمه تتماسك بسرعه اول ماتشم النار و بكده تقدرى تشمعى السيخ بسرعه و تقلبى الجنبين و بعدها تسويه براحتك بقى بعد ماتماسك)
بعد ماتشيلى السيخ اللى استوى فى صينيه مفروشه بالعيش و عليه بقدونس متقطع حطى الكفته و غطيها و حطيها فى فرن البوتجاز و اقفلى عليه و هكذا لحد ماتخلصى المقدار كله

أحلى كفته ممكن تاكليها فى البيت و أرخص طبعا من اى محل و أنضف و نسخه طبق الأصل بل أفضل فى الطعم و طبعا ده على حسب نوع اللحم

طبعا فى حاجه تانيه بتتحط على الكفته اللى بتخلى الناس ماتقبلش طعم اى كفته غير من المحلات
الماده دى هى محسن طعم أسمها مونوصوديوم أو ملح صينى تشبه السكر فى شكلها و موجوده فى الهايبرات الكبيره زى كارفور مثلا الكيلو ب 20 جنيه و طبعا ده يفضل عندك سنه و اكتر لأنك بتحطى معلقتين بس على الكيلو منه

الكلام ده ماحدش هايلاقيه على النت غير هنا و لا حد يعرف السر ده غير صنايعية الكباب و الكفته فقط