رشا البقاء الله الله يرحمه ويصبر اهله
دينا جزاكى الله خيرا على التحذير
ايمان مبروك الشوايه وماكينه البيتزا وحاجتك تجنن حقيقى فناااااااااااااااااااانة
دندونه شكرا على الخاص
كهرمانه كرات الشيكولاته شكلها حلو
ام زوما القرص شكلها تحفة بس دسمة اوى
مى فين الاكلات الصحية مستنياها بفارغ الصبر
ربنا يخليكو يا احلي بنات وعظم الله اجركم اللي توفي جوز اخت جوزي بس كان بني ادم محترم جدا وفعلا كانت صدمه كبيره لينا بس الحمد لله ربنا استرد ودعته ومش هنقدر نقول حاجه غير الحمد لله
الصفحة الأخيرة
باستا فلورا بالاسكندرانى !!
باستا فلورا اختراع سكندرى مستوحى و محرف من الاختراع الايطالى الاصل "pasta frolla و بالدراسه و البحث و التقصى رغم ان اختكم نص نص فى الايطالى لقيت ان الباستا فرولا هى نفسها عجينه الشورت بريد او التارت بالايطالى طيب ايه حكايه الباستا فلورا الاسكندرانى دى و اللى لا هى كيكه و لا هى تارت.....يعنى حاجه وسط بين الاتنين..الاسكندرانيه الافذاذ لما نقلوها من طنط ماريا الايطاليه غيروا مكان الحرف من باستا فرولا الى باستا فلورا... لا كمان تخنوا الكراست لدرجه تجعله ينتقل من مجرد انه تارت او كراست لتارت الى انه يكون شئ اشبه بين الكيك و كمان التارت...طيب خدوا المقادير دى و جربوا و افردوا العجينه رفيع..هتحصلوا على عجينه تارت....طيب افردوا تخين اوى هتطلع المخلوق السكندرى اللى اسمه باستا فلورا..بحثى وراها كان لسبب وجيه انى حبيتها و حبيتها اوى و اعتقد مش انا لوحدى دليل طلبات الناس ليا دايما انى انزل طريقتها....
المقادير
2 كوب دقيق
2 بيضه
نص كوب سمن او زبد
من نص الى تلات ارباع كوب سكر بودره
2 م.ص بيكنج باودر
فانيليا
نضرب السمن او الزبد مع السكر حتى يصير كريمى القوام..يضاف البيض بيضه بيضه بالتناوب مع الفانيليا او بشر الليمون او البرتقال او القرفه حسب نوع المربى اللى حابه تضيفيها
كونى مبدعه حيث لم ينزل فى الكتب السماويه اننا نعملها بمربى مشمش او حتى فراوله..ممكن توت ..ممكن تفاح ممكن برتقال و جزر و ممكن كمان بلح انتى او انت و دماغك العاليه و نكهه العجينه كمان مخمخ لها.
هنضيف الدقيق المخلوط و المنخول مع البيكنج باودر. و نخلط هنلاقى عجينه دبقه ممكن نشكلها بايدينا....نحط تلتين العجينه فى صينيه و نفرشها بايدينا و ننزل عليها المربى و نحط تلت العجينه الباقى فى قمع و نعمل الاشكال اللى حابينها ممكن تتخنى العجينه باضافة المزيد من الدقيق لها و تتلجيها و تبشريها على الوش..يعنى افكار كتير و انتى برضه و دماغك العاليه.
تخبز فى فرن متوسط الحراره 180 حتى تاخد لون دهبى متميز
ملحوظاتي
أنا أضفت للعجينة برش برتقال إداها طعم وريحة وااو أضفتها في مرحلة الزبدة والبيض
متضيفيش الدقيق مرة واحدة سيبي شوية في الأخر بحيث لما توصلي بالعجينة للسمك بتاع بتيفور القمع يعني ممكن تتشكل بالقمع شيلي شوية للوش عشان ترسمي على وشها بقمع الكريمة
والباقي ضيفيله باقي الدقيق
وممكن تحتاجي زيادة دقيق
بس القوام النهائي لزج على فكرة شبه عجينة البتيفور الطرية إدهني الصينية وإيديكي زيت خفيف وإنتي بتفرديه في الصينية وراعي كويس يكون السمك واحد بعدين إفردي المربى ثم إرسمي بالقمع براحتك
عندي فكرة حلوة نفسي أجربها فيها بس مكسلة شوية
عايزة أعمل نفس العجينة بس على كاكاو وأحشيها طوفي سمكه متوسط ومعاها حبيبات شوكولا وعين جمل أو بندق وأكمل عادي
حاسة غنها هتبقى واااااااااااااااااااااااااو
أنا بقى المية لسه قاطعه من شوية ربنا يجيبها على خير
معليش يا ايمى انا عارفه اسئلتى كترت بس حد قالك تنزلى حجات حلوه كده عايزه اسال دى طريقة القرص بعجينة البريوش ولا طريقه تانيه وياريت تقولينا عليها برضه
أنا فعلا بستخدم نفس مقادير عجينة البريوش تقريبا بس أخر مرة خليت البيض واحدة بس بدل 3 وبستخدم سمن بلدي ومنكهات مناسبة
المقادير
كيلو إلا ربع دقيق
100 جرام سمن بلدي
50 زيت (وممكن كله سمنة)
شمر وينسون مطحونين
ربع كوب سكر
معلقة صغيرة ملح
معلقة صغيرة بودر(ده بتغني عن المحسنات)
تاخديهم على بعض وتفضلي تبسي فيهم لحد ماتلاقي الدقيق إتشرب السمنة كويس وريحته فحفحت بالشمر والينسون
أنا بشغل عليهم العجانة الدراع الكف وأسيبهم ييجي 7 دقايق بتبقى واااو
دوبي معلقة كبيرة خميرة في ربع كوب مية دافيه ومعلقة صغيرة سكر وسيبيهم شوية
إضربي بيضة بالشوكة مع نص كوب لبن وممكن رشة فانليا
على فكرة ممكن تستغني عن البيضة
بس إعجني العجينة بالسوائل يدوب تلم معاكي يعني متطوليش في العجن يدوب تلم وتنعم
سويها عادي زي أي قرص