جربت مكرونة نفس فكرة الفتتشويني بس من غير فراخ واعتقد ممكن تضيفي الفراخ المسلوقة

سلقت مكرونة على شكل زجزاج
وبعدين في الحلة بقى سيحت حتة زبدة تقريبا معلقتين كبار ولما ساحت ضفت لها المشروم وقلبت شوية وضفت شرايح زيتون اسود وقلبت ، شوية وجبنة رومي مبشورة ضفتهالها وبعدين آخر حاجة ضفت علبة جهينة ويبنج او ككوب كريمة لباني فريش وقلبت كويس ورحت ضايفة لهم المكرونة وحتة جبنة موتزاريلا علشان تسيح معهم سخنة وعلى نار هادية كله طبعا وبالهنا والشفا

الجلاش او البقلاوة الحلوة باعملها بطريقة روني هادور عليها واجيب لكم اللينك

السويسرول بطريقة الشيف حسن جربتها واعتمدتها عندى ولاقيت وصفات كتير هيا نفسها
اولا نفصل الصفار عن البياض انا بسميه ماينج اصفر ومارينج ابيض علشان اسهل فى الكتابه
المارينج الابيض 5 بياض بيض نضربهم مع رشه صغيره ملح واول ما يبداء يكون رغاوى نضيف 40 جرام سكر ونفضل نضرب لحد ما يتماسك ويتكون مارينج ابيض لامع جميل
المارينج الاصفر 5 صفار بيض + 150جرام سكر نضربهم مع بعض لحد ما اللون يفتح والقوام يبقى كريمى نقوم ضايفين عليهم 150 دقيق و 40 جرام نشا ونقلب يهدوء لحد ما يختفى الدقيق ويمتزج مع خالخليط كله بعد كده ناخد جزء من المارينج الابيض ونخلطه بهدوء من تحت لفوق لحد ما يخلص كل المارينج بعد كده نضع الخليط فى صاج مستطيل متبطن بالزبده وورقة زبده ويخبز فى الفرن على درجة 220 لمدة لا تزيد عن10 دقايق وهو عامة مش بياخد وقت واول ما يخرج تقلبيها على ورقة زبده عليها رشة سكر بودره وتلفيها رول بسرعه وتحطيها فى التلاجه بعد كده تخرجيها وتحشيها كريمه وتلفيها تانى وتزوقيها زى ما تحبى وترجعيها التلاجه تتماسك وبالهنا والشفاااااا

طمطم ازيك يا جميل منورانا والله انا كمان جربت بقلاوة رونى واعتمدتها عندى خصوصا فى رمضان
طبعا من اهم الوصفات اللى نزلتها واعتمدتها مؤخرا تشيز كيك باللبنه والكابتشينو والفضل لحنون حبيبتى والطريقه والصور من مطبخى
بصراحه قبل كده جربت اعمل التشيز كيك مرتين بس مش عارفه معجابنيش ومش زى ما توقعت خصوصا انى مش بحب طعم الجبنه يبقى ظاهر اوى المهم بعد البحث المتواصل عملت تركيبه وطلعت ليا الوصفه الجميله دى والفضل لاتنين المبدعه منال العالم ولحبيبتى واختى حنون الوصفه كانت مزيج من وصفتين تشيز كيك لمنال العالم بس انا عملت تغيير فيها من غير كتر كلام ندخل على المكونات على طول
الطبقه الاولى
2 كوب بسكوت مطحون انا عملت نوعين من البسكوت الاول اولكر والتانى بسكوت بالكاكاو والشكولاته
ملعقه كبيره كاكاو خام
نص كوب زبده
الطبقه التانيه
200جرام لبنه بينار
2كيس كريم شانتيه
1 كوب لبن مركز محلى( انا عملته فى البيت)
1ملعقه كبيره جيلاتين بودر
1 ملعقه كبيره نسكافيه
للتزيين كاكاو خام +2شكولاته فليك
فى البدايه ندوب الجيلاتين فى قليل من الماء الساخن وكذلك النسكافيه ونتركهم
تجهز الطبقه الاولى بطحن البسكوت واضافه الزبده الذائبه وفرد طبقة البسكوت فى قوالب السيلكون الخاصه للكب كيك ثم نضعها فى التلاجه
تجهز الطبقه التانيه بضرب الكريمه ثم اضافه اللبنه واللبن المركز والجيلاتين حتى نحصل على قوام كريمى جميل نضيف نصف هذه الكريمه على طبقة البسكوت المجهزه فى القوالب ثم النصف المتبقى من الكريمه نضيف عليها النسكافيه المعد مسبقاونخلط ونضيف المزيج فوق طبقه الكريمه البيضاء السابقه مع مراعاة الهدوء فى العمل حتى لا تختلط الطبقتين ثم ندخل القوالب الفريزر حتى تجمد طبقات الكريمه لمده لا تقل عن 6 ساعات ثم تخرج بهدوء من قوالب الكب كيك وتزيين برشة كاكاو دارك وشكولاته فليك ويبقى عندكم احلى مينى تشيز كيك بس باللبنه والكابتشينو شيك جدا فى التقديم والطعم يجنننننن تحفه بجد انصحكم تجربوه خصوصا للى مش بيحب طعم الجبنه زيى والعيال هيحبوه اووووووووووووى مستنين ايه يلا جربوه ومش هاتندمو
فضل اوريلكم الصور طبعالليحب انه يستفيد الخطوات موجوده بالتفصيل فى فيديو منال العالم اعملو سيرش هتلاقوه فعلا مفيد جدا وانا شخصيا اتعلمت حاجات كتير منها

أنا عاوزة اقول لكم على تكة صغيرة في الملوخية ممكن تكونا بتعملوها بس هاقولها

انا باعمل تقلية للملوخية واضيف لها الشوربة الأول ومكعب فاين فودز وبعدين لما اهريها غلي اضيف لها الملوخية ويدوب تبتبدي هتغلي اروح طافية واطشها بتقلية تاني علادية يعني الحركة دي بتديها طعم خزعبلي

الهامبرجر
بافرم اللحمة واضيف لها فول صويا منقوع بعد ما اصفيه وانشفه طبعا مع التوابل ملح وفلفل اسود ورشة بصل ورشة توم
واعمله قوالب واقليه زي البرجر الجاهز نفس الطعم