بجد ياجماعة اللهم بارك ماشاء الله عليكم وهميين
انا عمالة اقرا الملف كله احلى من بعضه وكلكم اخر شطارة
وطبعا اشطرنا دندوووووووووووووون القمر

انا بقى طريقتي المعتمدة في اللازانيا اللي اكتشفت النهاردة انها متناقلة في المنتديات من غير حتى ما يكتبوا انها منقولة
بجد الناس دي حاجة غريبة

المهم دي طريقتي



المقادير:
1- الباشميل:
معلقتين كبار سمنة
نص كوب دقيق
3-2 بيض حسب الحجم
كيلو لبن وزيادة شوية
فلفل- ملح

2- العصاج:
بصلتين وسط
نص كيلو لحمة مفرومة احمر
صلصة(معجون طماطم)
مكعب مرقة فراخ
سمنة للتحمير
فلفل-ملح

3- خلطة الجبنة:
نص علبة جبنة ريكوتا
كوب جبنة موزاريلا
كوب جبنة بارميزان مبشورة
بيضة
رشة ريحان مجفف

4- لازانيا:
انا افضل المستوردة لها طعم احلى وكمان مش بتلزق مع بعضها
وفي منها اللي لونها اخضر معمولة من السبانخ جميلة برضه
العلبة على قد الصينيه بتاعتي تعملها مرتين


الطريقة:

1-الباشميل:
نسخن السمنة ونحط عليهم الدقيق ونحمره لحد ما يصفر شوية
نحط اللبن عليهم ونفضل نقلب مش نسيبه الا لما يدوب الدقيق في اللبن ويبقى تقيل بس يكون اخف شوية من باشميل المكرونة بالفرن بعدها تضيفي البيض وتضربيه بالمضرب عشان الباشميل سخن والبيض ممكن يستوي
بعدها تحطي الملح والفلفل وتسيبيه...

2-العصاج:
نفرم البصل ونحطه على السمنة لحد مايبقى ذهبي بعدين نضيف له اللحمة ونقلبهم ولما نحس ان اللحمة استوت نضيف نصف برطمان الصلصة ومكعب الماجي وكوب ماء او كوب وربع ونخليهم يتسبكوا شوية..
ونحط ملح خفيف عشان المكعب مالح وفلفل
أختياري
ممكن نضيف جزر مبشور مع خلطة العصاج ويستوي معاها

3- الجبنة:
نخلط الأنواع مع بعض ومع البيض والريحان

دلوقتي احنا حضرنا كل حاجة
نجيب صينية كبيرة ونحط فيها مية وملح وشوية زيت ولما تغلي نحط قطع اللآزانيا تقريبا اربعة او 3 مش كلهم مع بعض عشان مش يلزقوا مع بعض....
في الوقت دا نحضر صينيتنا اللي هنعمل فيها
1-ندهن الصينية في قعرها شوية باشاميل
2-نحط اول طبقة من اللآزانيا بعدين طبقة من العصاج ونرش من خلطة الجبنة على العصاج بعدين طبقة باشميل وماتقلقوش انهم يدخلوا في بعض عادي..
3- نضع طبقة تانية من اللآزانيا ونعيد نفس الخلطة.
4-نضع طبقة اخرى من اللآزانيا ودي اخر طبقة بعدين نغطيها بالباشميل فقط ونرش جبنة موزاريلا وبارميزان.
توضع في فرن ساخن حرارته 200 درجة لحد مايتحمر من الأطراف بعدها تشغلي الشواية اللي فوق عشان تحمري وجهها..
بالهنا والشفا

ملحوظات:
1-الطريقة دي تنفع من غير جبنة الريكوتا والريحان لو مش متواجدين,,,
بس انا دقتها في مطعم ايطالي كانوا فيها عجبتني جدا وبقت في وصفتي دايما...

2-ممكن تزودي الطبقات بنفس الطريقة حسب عمق الصينية بس الحقيقة هي كده كفاية عشان تعرفوا تاكلوها ومش تكون تقيلة..بس اهم حاجة ان اللآزانيا تكون اخر طبقة

3-ممكن تحسوا ان الطريقة صعبة بس حقيقي هي سهلة لو جمعتي كل الأحتياجات وبجد محدش داقها عندي الا لما نسفوهاااااااااااا
منقول

مها
الف سلامه على ايدك حبيبتى
طمنينا عليكى

ريهام
الوصفات اللى انتى حطاها تجنن
كتى بتسألى على الجبن الكرفت انا شفتها ف مترو
وكمان ممكن تخدى الصفيح دى وتبشريها بتبقى رووووعه على المكرونه العاديه
او على وش اى صنينه

حد كان بيسأل عن الدقيق
زمزم رقم واحد
الضحى سئ جدا
وفيه الصقر كويس والخمس نجوم

والله تحططططططمت اوي ,
دآ انا بقوول حدخل اشوف الردود :(
ولا عشان انا غريبه :(

يلا معذورين ..

جراح امه
تلاقيها فى المحلات اللى بتبيع منتجات الالبان

جراح امه علي فكره احنا مش من طبعنا ابدا منردش علي سؤال لا من غريب ولا من قريب ولو انت متبعانا هتعرفي ان عمرنا ما حد الحمد لله سال سؤال وطنشنا احنا بس اللي مشغولين بالوصفات والاكل طب بذمتك في حد يشوف الاكلات اللي بيحطهوها دي ويفكر يبص علي اي اساله المهم يا ستي زي ما قلتلك ام زوما عند المالكي هتلاقيها وكمان معلش هوصفلك واحد بس معلش مش عارفه اسمه هو عارفه اخر ساعه اللي في اول عباس هتمشي جمبه شويه هتلاقي مخبوزات عز في عماير قسم اول مدينه نصر جمبه بقي بتاع البان هتلاقي عنده اللي انت عاوزاه قشطه وكريمه وجبن وكله .

كمان عندك في الشارع الموازي لعباس العقاد قدام ويسترن يونيون في بتاع ابس كريم برده عنده ومنتجات الالبان معلش اصلي مش بحفظ الاسامي.

واي خدمه يا باشا احنا بس مزغللين وتعبانين من النقل اصلهم بينقلو معايا الشقه كل يوم واللي بيفضل منهم بينزل الوصفات.


ايمو يا رب منحرم منك انت وابله دندون ابدا طب عاوزاني ليه بقي دا انت فله اهو طب تصدقي يا ايمو ان الابياري ده فعلا زي ما انت بتقولي كنت بشوفه وعمري ما دخلته قلت دا هيبقي اسعاره موت بس باذن الله اروح ابص عليه.

بسوم اه ممكن الكاسترد العلب بس قللي كميه الحليب عشان يبقي تقيل.

دندونه زايد ماشي خليكي كده اكتبلك ولا تعبريني محدش غيرك عمل السينابون ولا ايه يعني.