بسم الله الرحمن الرحيم
مــاشــاء الله ، تــبــارك الــرحــمــن ..
(ام علاء)
بإذن الرحمن هالملف راح يكون للاطباق الساخنة اللي راح انزلها ان شاء الرحمن وراح يكون متجدد كل ما ربي سهل ..
وراح يكون الغالب فيه الاطباق السهلة واللي بالكثير تاخذ منج ساعة وأقل خصوصا للموظفة أو اللي ما عندها وقت ، وراح يحتوي على الاكلات التقليدية "الهريس "نوعين الحلو العادي والفلفل " والجريش والعصيدة وغيرها " ، الاطباق اللي نكسر فيها الروتين وبعد راح يكون في اكلات من دول مختلفة ان شاء الله هالملف يعجبكم يالغلا :26: ..
1- العصيدة ..
المقادير :
انا راح انزلها تقديرية لانها تعتمد على نوع الطحين المستخدم ..
2 1/2 ك ماء سلق اللحم أو الدجاج "ومصفى"
2 1/2 -3 ك طحين اسمر منخول
ملح وفلفل اسود
3-4 م ك زيت زيت "احنا نستخدم اما زيت عداني أو زيتون"
الطريقة:
سخني ماء سلق اللحم أو الدجاج واخلطي معاه الملح والفلفل وخليه لحد مايوصل لدرجة الغليان..
ضيفي الطحين كوب كوب عشان يختلط عدل ومايكتل ..
بس يبدا يصير مثل العجينة خلي احد يمسك الجدر لج واخلطي العجينة عدل واضربيها عشان تصير مالسة ..
خليها على النار من 10-15 دقيقة مع التحريك "اذا كانت جامدة ضيفي لها ماي واذا سايلة شوي ضيفي طحين بس مو وايد " ..
ولأسهل تشكيل بكيس سميك نظيف دهنيه بالزيت ونزلي العصيدة فيه وسكريه وشكليها بالشكل اللي انت تحبينه ..
وقدميها مع لحم مسلوق وماء سلق اللحم وبالعافية ..
2- التكا المشوية تاخذ منج بالكثير 30 دقيقة بس ..
المقادير:
كيلو لحم تكا وقطع من دهنه الخروف "الالية"
خضار "بصل صغير اذا وجد او كبير مقطع وفلفل اخضر "مقطع مربعات" وطماطم شيري"
التبيلة:
2 م ك صوص الثوم
2 م ك زيت زيتون
م م اورغانوا
م م فلفل اسود
هذي صورة الصوص:
الطريقة:
انقعي اللحم بالتتبيلة وخليهم من ساعة إلى 12 ساعة بالثلاجة..
شكي اللحم بالاسياخ على ذوقج أو "بصل فلفل اخضر لحم دهن لحم بصل فلفل اخضر لحم دهن لحم طماطم "..
حطيهم على الشواية "انا استخدمت الكهربائية ، نوعها كنوود " وابدي دهنيهم بالتتبيلة ..
قلبي الاسياخ مع دهن التتبيلة والاسياخ راح تاخذ منج مابين 10-15 دقيقة عشان تستوي ..
اذا تحبين الطماطم مستوية وايد خليهت معاهم "احنا نحبها جامدة شوي ، عشان جذي شلتها بعد 10 دقايق "..
قدميهم مع صوص الباربكيو والبطاطا الشيبس وبالعافية ..