بنات انتو ليه مش بتشتركو كتير علشان الموضوع يحلو ونستفيد كلنا

يابنوتات انا عايزه أقول لكم ان جويا عامله تخفيضات بتوصل ل 50 % على اللانجيريهات
وعايزه اعرف منكم حد راح معرض النخفيضات اللى فى ارض المعارض ياريت اللى راح يقولى أخباره ايه واشتريته منه ايه؟والأسعار

أنا عندى كذا استفسار
حد يعرف فى فرع لفتح الله فى القاهره ولا لاء؟
كريم العروسه بتاع حراز ايه وظيفته بالظبط؟ وياترى حد جربه؟
ايه الفرق بين المقشر والصنفره؟
ياللا شدوا حيلكم عايزه أجابه من كل واحده

يابسكوته
ماتفكريش فى المصروف هيا ح تيجى بطبيعتها مع الاحتكاك بالظروف فى السعوديه و التعود مع جوزك فى الحياه الجديده و
احلى دنيا الحبوبه بارك الله فبها
قالت لك مافيه الكفايه بس ح تتبسطى

عزيزه المنال
الكريستال البوهيمى من الانواع الغاليه للكريستالات للزينه زى الفازات

shewawa
الفوطه يا قمر مش محتاجه توديها للخياطه انت مع مشاويرك خديها و عدى على بتاع الكلف هاتى مقاسها بالون المناسب لناحيه واحده بس و بالليل وانت قاعده سرجيها الاول و بعدين امشى عليها دور لقطه خفيفه بالابره برضوووو و مشى المكوه عليها ح تفرحى بيها اكتر اما تكون عمل اديك الحلوه مش ح تاخد منك الا دقائق
شكرا عن معلومتك عن جويا عايزا اروح

يابنات ياجميلات
لو سمحتووووووو
شيدوووووووو حيلكم فى المنتدى شويه بلاش كسل



اقروا الموضوع ده وياريت تعلقوا عليه فى صفحته
http://forum.hawaaworld.com/showthread.php?t=956225

بسم الله الرحمن الرحيم


الأخوات العزيزات

كنت مشغولة الفترة السابقة في التجهيزات

و آخر الأخبار

بالنسبة ل جويا ذهبت بالأمس و عرفت انه بدا التخفيضات من ثلاثة أيام

و اشتريت حاجات كثير كله عليه تخفيض لكن التخفيض 50% علي حاجات معينة

و انصح البنات الممتلئات الذهاب سريعا قبل ما المقاسات الكبيرة تخلص

صراحة المحل كان زحمة جدا جدا …. أنا ذهبت فرعين الأول بتاع صلاح الدين و كانت البروفة حر جدا و ضيقة موووت و كانت واحدة بس

و لكني وجدت كل طلباتي و دي ميزة فيه

و رحت فرع روكسي اشتريت الانروير لانه بيعرضه بطريقة افضل كتيير

**

بالنسبة للتصوير حجزت في كادو فرع الطيران .. لازم تحجزي قبلها ب 15 يوم علي الأقل

عندهم 3 باقات
أولهم 6 صور كبيرة مش الحجم العادي و كارت ( طبعا قالت مقاسه بس راح من دماغي ) ب 200ج و 7 صور و كارت اكبر ( هي قالت تنفع للعرايس ) كانت 250 ج و الثالثة 8 صور ة كارت اكبر ب 300 ج و معاهم ( جميع الباقات ) افتكر 2 صورة ابيض و اسود و مش عارفة كام صورة صغيرة حوالي 4 و البوم للصور و سي دي عليه الصور سليد شو

***
بالنسبة للكوافير
حجزت عند نورا في السراج

لكتب الكتاب المكياج 200 ج كان 250 ج عملت لي تخفيض عشان هعمل عندها مكياج الفرح و ربط الطرحة بيبدأ من 75 ج
يعني مكياج و طرحة بس 275ج و حجزت قلبها بشهر كامل و اللي هتعمل المكياج ( ندي ) أخت نورا جربتها في حفلة كتب الكتاب بصراحة المكياج بتعها روعة

بالنسبة للفرح نورا أسعارها للمحجبات 1600 ج بتشمل مكياج + طرحة + هاي لايت + 2 رسمة حنة + مانكير و باديكير + تنظيف البشرة ( ماسك بس ) و اعتقد إنها بتعمل الشعر عادي

و لما فكرت الغي الهاي ليت ( لما الشعر بيطول بكون شكله مش حلو ) قالت لي 1300 ج

المهم عرفت أن أختهم الثالثة اسمها ( نهله ) بتعمل مكياج العرايس ب 850 ج بصراحة الشيطان لعب في دماغي قلت ما أوفر عشان أنا مش عاملة فرح دي عزومة علي الماشي كده

المهم حجزت عند نهلة و يا ب ييسر الامر
**

رحت الجيم اللي في السراج جنب محل نورا اعتقد اسمه VIP عنده باكدج للعرايس 450ج سويت كامل+ حمام مغربي + دلكه+ تنظيف بشرة + نصف ساعة جاكوزي + نصف ساعة ساونا + نصف ساعة تدليك + حمام عسل و زبادي + 2 رسمة حناء


المهم عشان الذكاء الخارق بتاعي

قلت انا معنديش وقت لكل ده طيب عملت إيه ؟؟؟

حجزت سويت + تنظيف البشرة + حمام مغربي و قلت لها احسبي
قالت لي 420ج ….. هههههه

و أنا زي طبعا زي الشاطرة وافقت

طيب ده الفرق 30 ج بس ليه عملت في نفسي كده ش عارفة ..

المهم قالت أن تنظيف البشرة لوحده ب 250ج

أنا بقي ش فاهمة هل الاهتمام بيكون قليل لما بتاخدي الباكدج كلها … علي العموم هنجرب و نشوف

**
بالنسبة للأخت اللي سالت علي جزمه الفرح ممكن تتفصل عند محلات النمرسي اللي في عباس العقاد أمام الحديقة الدولية و الطرحة كمان بتتطرز هناك بس بلاش تتأخري لانهم ممكن بيخدو وقت

***
بالنسبة للمفارش

السرير … السفرة … الصالون … الليفنج

كله موجود في المعرض السوري بأرض المعارض رحت و اشتريت مفرش سفره و 3 قطع لصالون و 1 قطعة للفنج كله كان ب 500ج
طبعا فاصلت لما مت …بتبدئي بتزيل السعر للنصف و يبدأ يعلي معاكي شويه


و مفارش السرير كانت روعة و لكن الميزانية خرمت … فيه حاجات حلوة ب 300ج و ممكن تفضلي طبعا

***
بالنسبة للفستان أنا عملته ضيق من تحت لاني ممتلئة فريحت نفسي من الجيبونة و مشاكلها

و لسه بوكيه الورد مجبتوش .. أسعار الجاهز غالية أوى و مش حلوين

احتمال اعمل فكرة صديقة لي اشترت ورد صناعي و تل و ملت هي البوكيه الكلام ده من سنتين كلفها 120ج و احتفظت بيه في منزلها

**
اشتريت الشبكة من محل في ميدان الجامع اسمه الباز حاجاته حلوة كانت أول مرة أروحه توكلت علي الله و دخلت المحل و الحمد الله

**

اشتريت جزمه الفرح من جنينه مول … صندل ابيض عادي و كان ب 95ج محل في الدورالأرضي أول ما تدخلي من ناحية سوبر ماركت مترو

و اشترت جزمه كتب الكتاب من محل( ريم ) في جنينه في الأرضي عنده بصراحة كل الألوان الصعبة … ما كنت اتوقع اجد لون الفستان و كان صندل ب 120 ج

و الطرح فيه محل في حنينه برضوا اسمه الحلوة في الأرضي بس غالي شوي عجبتني طرحة ب 120ج و قالت علي جثتي اشتريها ..ههه

فيه محلات كثير أوى في جنينه فيها طرح و طرح للمحجبات للفرح بيضاء و مطرزة و فيه كمان تل

و الله الدنيا اتطورت أوى

**

بالنسبة للفوط اللي بالدانتيل أنا عملتها .. جبت شريط ستان لون الفوطة و ركبت الشريط و عملت في النصف فيونكه و نازل منها شريطين

و نفس اللون و الطريقة للبشاكير

و نفس الطريقة ل باسكت الحمام بيكون قطعة قماش بتلفيها و تركبي الشريط

**

اشتريت النجف من درب البرابرة و لقيت أن النجف الصيني مغرق الدنيا

اشتريت لغرفة النوم نجفه صيني عماله زي بوكيه الورد كانت ب 250ج بس و كانت تحفة سوداء مأكسدة و الورد زجاجي منغبش لونة عسلي

و اشتريت 2 اباجورة نفس الاستايل ب 350ج … طبعا كانوا اغلي من النجفة و لكني قالت شكلهم جديد موت و مميز و انا احب اكون مميزة و اخدتهم ب 300 ج

في محل في مصفي النحاي مع تقاطع مكرم عبيد امام التوحيد و النور فيه تبلوهات تحفة و الاسعار معقولة جدا

بس ده الجديد عندي

و أي استفسار انا موجوده


تحياتي