- احكيلي يا وحيد....هات لشوف...! شو وجعك....شو اللي شاغلك..؟
- الناس يا دكتور ...الناس..!
-شبهن الناس...؟ احكيلي و اتأكد إنو ماحدا من هالناس رح بيعرف إي شي
ال-ناس.....عم تركب سيارات المرسيدس و الكاديلاك...عم تلبس الجوخ و الحرير.....عم تصيّف بأوربا.....عم تناااام ع ريش نعام....عم تسهر بأرقى المحلات....عم تتعلم بأحسن المدارس....و عم و عم ....
آآآآآآآخ.....شو بدي إحكيلك لإحكيلك..؟!!
-طيب...! إنت وين مشكلتك بالموضوع..؟
-أنا....؟......أنا مابدي.....ما بدي يصير أي شي من هاد...ما بدي الناس تتهنى
-قصدك إنو الناس ما بتستاهل
-لأ....يمكن يكونو بيستاهلو...!....بس أنا ما بدي
-طيب قصدك إنو بدك تصير متلهن...؟
-يمكن...بس ما عم بقدر....فالأفضل هنن ينزلو إذا ما قدرت أنا إطلع....و إذا ما صار شي من الاتنين بنفجر
- هاهاااااا.....طيب
- شو دكتور عرفت وجعي...؟
-ايه....و دواك مو عندي....!
-لكى دكتور..؟
- لازم تشوف طبيب عيون
-دكتور عيون؟....لشو دكتور العيون؟
-لما بتروح لعندو....اشرحلو حالتك....و هو بيفهمك الوجع و بيعطيك الدوا...
في عيادة طبيب العيون
-و هاد يا دكتور كل يلي عم يصير معي
-مـــــــــــم...لكى الناس هنن السبب؟
-ايه والله يا دكتور
-طيب.....فتحلي عيونك منيح و قرب عالجهاز
-يلا..امرك دكتور.....(واضعا عينيه بعيني الجهاز) شو دكتور طمني..!
-(الدكتور ناظرا من الطرف الآخر من الجهاز)....طيب طيب ارجاع و اطمن....
-شو طلع معي؟
-يا وحيــــــــــد عينك اليمين بتوجعك شي...؟
-لأ....أبداً
-طبيعي لأنو الوجع عالاغلب بيكون نفسي.....بس سببو العين
-شغلتلي بالي دكتور....قلي شبها عيني اليمين؟
-يا وحيد.....إنت عينك ضيقة....سمعان بهيك شي....عينك ضيقة و لازمها توسيع
-ولي...بس طول عمري بتطلع بالمرايي و ما حسيت بهيك شي...
-هالشي ما بيبيّن إلا بالفحص
-طيب دكتو و الحل...؟
-هلأ..العين الضيقة ما بتجي هيك من الفراغ..!...هيي عادةً بتترافق مع حالة تانية
-كماااااان؟....شو دكتور؟
-بدي إسألك سؤال...!
-سآل دكتور ...اتفضل
-احكيلي عن وضعك...!
-أنا...؟....ماشي الحال....أنا بشتغل بالمقاولات...و دخلي عالي نوعا ما...و عندي سيارة حديثة و بيتي كبير...و مرتي وولادي ---بيحبوني.....بس مالي مرتااااح......مالي مرتاح
- هاهااااااا....هلأ عرفنا شو هو مرضك التاني....اتفضل معي عالجهاز
-طيب.....(عالجهاز)شو دكتور شبها عيني كمان؟
-هالمرة عينك الشمال يا وحيد....عينك الشماااال
-كمان....شبها دكتور عيني الشمال؟
-أكيد ما بتوجعك...!.... لأنو الوجع يلي بيتولد عن هالحالة هو نفسي أيضاً...
-شو هالحالة دكتور؟
-عينك الشمال يا وحيد ...
-شبها عيني الشماااااال؟
-..عينك فاضية....و ما في شي بيملا عينك....إلا شي واحد
-شو هالحكي دكتور....؟ معقول..؟
-ايه والله.....عينك فاضية تماما....و أنا مستغرب كيف عايش بهالحالة...و عم تقدر تشوف...!
-طيب دكتور و الحل..؟
-الحل .....بدنا نمليها..!
-بشو..؟.......بشو بدنا نمليها..؟
-يا وحيد....عينك ما بيملاها إلا التراب
-تراااااب؟؟.....قول غير هالحكي دكتور...لا لا لا ما بدي
-و الله...إنت بالنهاية حر....بس إذا ما عبيت عينك ممكن تتفاقم الحالة معك....و تتطور و تصير عينك جوعانة...
-وقتها شو بيصير دكتور..؟
-وقتها....ما بيقدر حدا يتحملك.......و بتصير عينك بتأثر بعيون الناس يلي بيشوفوك...!....
-شو بيصير بعيون الناس؟
-بتصير عينهن مفتحة عليك.....لأ و كمان حمرة....بس عليك.....بيصير كل الناس يورجوك العين الحمرة...وقتها بتنكسر عينك...و بيعود بإمكانك تشوف شي
-لا لا دكتور دخيلك.....كلو إلا العين الحمرة...اشتغل و اتوكل ع الله...أنا قبلان
- طيب...بس عينك يا وحيد جئرة.....يعني ما فينا نفتحها بسهولة
-كيف لكى؟
-بدنا نضطر نستخدم مخرز....لأنو هو الوحيد يلي ما فيها تقاومو.....و بعدين منفتحها......و منملاها بالتراااااب.......و ****لله بعد هالعملية.....بترجع طبيعي....و (ما بعينك شي).....و أوتوماتيكيا بتتوسع عينك الأولانية بمجرد إنو تمتلا عينك التانية
و لعيونك يا وحـــــــــــــيد
..........
حلوه الحكايه بس شوصار بعدين